ປຶກສາຫາລື ການຈັດຕັ້ງປະຕິບັດໂຄງການປະກັນໄພການທ່ອງທ່ຽວ ແບບທັນສະໄໝ

ທ່ານ ໄຊສົມບັດ ບຸນນະຜົນ ກ່າວເປີດກອງປະຊຸມວ່າ: ໂຄງການປະກັນໄພການທ່ອງທ່ຽວ ແບບທັນສະໄໝ ເປັນອີກວຽກງານໜຶ່ງທີ່ມີຄວາມໝາຍ ຄວາມສໍາຄັນ ຕໍ່ວຽກງານການທ່ອງທ່ຽວ ສປປ ລາວ ໂດຍໄດ້ຮັບການຊີ້ນໍາຈາກລັດຖະບານໂດຍກົງ ແລະ ການຮ່ວມມືຈາກກະຊວງທີ່ກ່ຽວຂ້ອງ ໃນການຊຸກຍູ້ສົ່ງເສີມໂຄງການ ໃຫ້ເກີດເປັນຮູບປະທຳ ແລະ ນໍາມາຊຶ່ງຜົນປະໂຫຍດ ໃນດ້ານງົບປະມານ ແລະ ການບໍລິຫານຈັດການຄວາມສ່ຽງ ທີ່ເກີດຈາກອຸບັດຕິເຫດ ໃນຂົງເຂດວຽກງານການທ່ອງທ່ຽວ ຂອງ ສປປ ລາວ, ຊຶ່ງຜ່ານມາບັນຫາທີ່ເກີດຂຶ້ນ ກ່ຽວກັບນັກທ່ອງທ່ຽວ ໄດ້ສົ່ງຜົນກະທົບໂດຍກົງ ຕໍ່ຊີວິດ, ຊັບສິນ ແລະ ຄ່າເສຍຫາຍຫຼາຍດ້ານ, ອັນເປັນບັນຫາຕິດພັນກັບ ຄວາມຮັບຜິດຊອບໂດຍທາງກົງ ແລະ ທາງອ້ອມ ຂອງລັດຖະບານ ແລະ ອົງການຈັດຕັ້ງລັດ ທີ່ກ່ຽວຂ້ອງ. ເພື່ອເຮັດໃຫ້ວຽກງານປະກັນໄພການທ່ອງທ່ຽວ ກາຍເປັນຜະລິດຕະພັນທ່ອງທ່ຽວຮູບແບບໃໝ່ ທັງຮັບປະກັນໄດ້ ຄວາມເປັນ ລະບຽບຮຽບຮ້ອຍ, ຄວາມສະຫງົບປອດໄພ, ການບໍລິການ ມີຄວາມສະດວກວ່ອງໄວ, ໂປ່ງໃສ ແລະ ສາມາດກວດສອບໄດ້ ເຮັດໃຫ້ໂຄງການດໍາເນີນໄປ ບົນພື້ນຖານກົດໝາຍ ແລະ ລະບຽບການທີ່ກ່ຽວຂ້ອງ ສອດຄ່ອງກັບການຫັນເປັນທັນສະໄໝ, ສີຂຽວ ແລະ ຍືນຍົງ ບໍລິສັດຜູ້ພັດທະນາຈຶ່ງດຳເນີນການສ້າງລະບົບການຂາຍປະກັນໄພ ໂດຍໄດ້ຮັບການອານຸຍາດຈາກຫຼາຍພາກສ່ວນ ເພື່ອເຮັດໃຫ້ການທ່ອງທ່ຽວໃນ ສປປ ລາວ ໄດ້ຮັບຄວາມນິຍົມຫຼາຍຂຶ້ນ.

ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງ ການຜ່ານນິຕິກຳທີ່ກ່ຽວຂ້ອງ ແລະ ການລາຍງານຫຍໍ້ກ່ຽວກັບຄວາມເປັນມາຂອງໂຄງການ ພາຍຫຼັງດຳເນີນການມາແຕ່ປີ 2019 ແລະ ເລີ້ມທົດລອງຢູ່ແຂວງຫຼວງນ້ຳທາ. ຈາກນັ້ນ, ໄດ້ມີການພັດທະນາເປັນລະບົບແອັບພີເຄຊັນ ແລະ ເວັບໄຊ ເພື່ອໃຫ້ນັກທ່ອງທ່ຽວໄດ້ເຂົ້າເຖີງການຊື້ປະກັນໄພໄດ້ງ່າຍ ແລະມີຫຼາຍຮູບແບບ, ພ້ອມນັ້ນ ໄດ້ມີການແນະນຳລະບົບປະກັນໄພນັກທ່ອງທ່ຽວ ແບບທັນສະໄໝ ເພື່ອໃຫ້ຜູ້ເຂົ້າຮ່ວມເຂົ້າໃຈ ເຖິງກົນໄກການເຮັດວຽກທີ່ສະດວກ ແລະ ວ່ອງໄວ. ພາຍຫຼັງສຳເລັດກອງປະຊຸມ, ຜູ້ເຂົ້າຮ່ວມໄດ້ໄປຢ້ຽມຢາມ ແລະ ສໍາຫຼວດຈຸດຂາຍປະກັນໄພ ຢູ່ສະໜາມບິນສາກົນ ຫຼວງພະບາງ ອີກດ້ວຍ.

(ຂ່າວ-ພາບ: ເພັດສາຄອນ)