 |
ທ່ານ ວິໄລ ວົງຂະເສີມ ໄດ້ກ່າວວ່າ: ການປັບປຸງຄ່າແຮງງານຂັ້ນຕ່ຳ ມີການປັບປຸງເປັນແຕ່ລະໄລຍະອີງຕາມຄວາມຈຳເປັນທາງດ້ານເສດຖະກິດ, ຄ່າຄອງຊີບ, ລາຍຮັບ, ຄ່າໃຊ້ຈ່າຍ, ການປັບຂຶ້ນຄ່າແຮງງານຂອງບັນດາປະເທດໃກ້ຄຽງ ແລະ ບັນຫາອື່ນໆ ທີ່ກະທົບໃຫ້ພວກເຮົາຕ້ອງມີການປັບປຸງຄ່າແຮງງານຂັ້ນຕ່ຳ, ໃນການປັບຂຶ້ນຄ່າແຮງງານຂັ້ນຕໍ່າຄະນະກຳມະການແຮງງານແຫ່ງຊາດ ຫຼື ຄະນະກຳມະການສາມຝ່າຍ ກໍໄດ້ມີການຄົ້ນຄວ້າການນຳສະເໜີຂໍ້ມູນຂອງແຕ່ລະຝ່າຍ ປືກສາຫາລື ແລະ ກຳນົດໂຕເລກຂອງແຕ່ລະຝ່າຍ ເພື່ອໃຫ້ພາກລັດຖະບານເປັນຜູ້ຕັດສິນ. ສະນັ້ນ, ຮຽກຮ້ອງບັນດາທ່ານ ທີ່ເຂົ້າຮ່ວມກອງປະຊຸມໃນຄັ້ງນີ້, ຈົ່ງພ້ອມກັນຍົກສູງຄວາມຮັບຜິດຊອບ, ຄົ້ນຄວ້າ ແລະ ແລກປ່ຽນບົດຮຽນຊຶ່ງກັນ ແລະ ກັນ, ປຶກສາແກ້ໄຂບັນຫາໃນສ່ວນທີ່ພວກເຮົາຂາດ ເວົ້າລວມ, ເວົ້າສະເພາະບັນຫາຄວາມເປັນເອກະພາບໃນການກຳນົດສູດຄິດໄລ່ ຫຼື ວິທີການທີ່ເປັນເອກະພາບກັນ ໃນການປັບຂຶ້ນຄ່າແຮງງານຂັ້ນຕ່ຳສຸດ (ໃໝ່) ຂອງຜູ້ອອກແຮງງານພາກວິສາຫະກິດ ເພື່ອເປັນການປະ ກອບສ່ວນຮັບປະກັນຄຸນນະພາບ, ຍົກສູງຊີວິດການເປັນຢູ່ຂອງຜູ້ອອກແຮງງານ ການຈ້າງງານທີ່ເປັນທຳຮັບປະກັນໄດ້ຜົນປະໂຫຍດຂອງຊາດ, ຜົນປະໂຫຍດຂອງຜູ້ໃຊ້ແຮງງານ ແລະ ຜູ້ອອກແຮງງານໃຫ້ດີຂຶ້ນ, ພັດທະນາເສດຖະກິດ ແລະ ສັງຄົມຂອງຊາດໃຫ້ຈະເລີນກ້າວໜ້າຂຶ້ນໄປເລື້ອຍໆ.
 |
ກອງປະຊຸມໃນຄັ້ງນີ້, ຈັດຂຶ້ນເພື່ອຮັບຟັງການນໍາສະເໜີສະພາບລວມໃນການປັບປຸງຄ່າແຮງງານຂັ້ນຕ່ຳສຸດ ແລະ ຜົນການລົງສຳຫຼວດລາຄາສິນຄ້າຢູ່ແຕ່ລະແຂວງ; ເພື່ອປຶກສາຫາລື ແລະ ແລກປ່ຽນກ່ຽວກັບການຄົ້ນຄວ້າຄ່າແຮງງານຂັ້ນຕໍ່າ (ໃໝ່) ພາກວິສາຫະກິດໃນ ສປປ ລາວ ແລະ ບັນ ຫາແຮງງານອື່ນໆ ທີ່ກ່ຽວຂ້ອງກັບບັນຫາແຮງງານ ທີ່ເຫັນວ່າຢາກຈະນຳສະເໜີໃຫ້ມີການພິຈາລະນາ ໃນກອງປະຊຸມຄະນະກຳມະການແຮງງານແຫ່ງຊາດ ຄັ້ງທີ III.
ຂ່າວ-ພາບ: ວັນເພັງ
ຄໍາເຫັນ