ບົດລາຍງານລະບຸວ່າ: ລະບົບດັ່ງກ່າວແມ່ນການພັດທະນາຮ່ວມກັນລະຫວ່າງບໍລິສັດ GLONASS ແລະ ບໍລິສັດ Element Group. ໂດຍລະບົບດັ່ງກ່າວສາມາດຕິດຕັ້ງແບບຝັງລົງໃນໂດຣນພົນລະເຮືອນໄດ້ທຸກລຸ້ນ ເພື່ອໃຊ້ GLONASS ຫຼື ລະບົບກຳນົດຕຳແໜ່ງດາວທຽມລະດັບໂລກຂອງຣັດເຊຍ ໃນການຕິດຕາມໂດຣນ ຊຶ່ງຊ່ວຍຮັກສາການລະບຸຕົວຕົນ ແລະ ຕຳແໜ່ງໄດ້ ເຖິງແມ່ນວ່າຢູ່ໃນພື້ນທີ່ທີ່ບໍ່ມີສັນຍານໂທລະສັບມືຖື. ຫາກເກີດສະຖານະການສຸກເສີນ ຫຼື ມີການບິນທີ່ຜິດກົດໝາຍເກີດຂຶ້ນ ເຈົ້າໜ້າທີ່ຄຸ້ມຄອງສາມາດສົ່ງຄຳສັ່ງໂດຍກົງໄປຫາໂດຣນເພື່ອບັງຄັບໃຫ້ລົງຈອດໄດ້ທັນທີ.
ສື່ມວນຊົນຣັດເຊຍລາຍງານ ໂດຍອ້າງອີງຄຳສຳພາດຂອງຜູ້ບໍລິຫານຈາກບໍລິສັດພັດທະນາລະບົບດັ່ງກ່າວວ່າ: ລະບົບນີ້ໃຊ້ເຕັກໂນໂລຊີການເຂົ້າລະຫັດໃນລະຫວ່າງການສົ່ງຄຳສັ່ງ ເພື່ອປ້ອງກັນການດັດແປງ ຫຼື ການປ່ຽນແປງຂໍ້ມູນໂດຍບໍ່ໄດ້ຮັບອະນຸຍາດ.
ປັດຈຸບັນ, ລະບົບດັ່ງກ່າວໄດ້ຜ່ານການທົດສອບເບື້ອງຕົ້ນແລ້ວ ແລະ ມີແຜນທີ່ຈະຂະຫຍາຍການນຳໃຊ້ໄປສູ່ຍານພາຫະນະອັດຕະໂນມັດອື່ນໆ ໂດຍສະເພາະແມ່ນລົດບັນທຸກທີ່ບໍ່ມີຄົນຂັບໃນອະນາຄົດ.
ໃນຊຸມປີມໍ່ໆມານີ້, ຈຳນວນການບິນໂດຣນພົນລະເຮືອນໃນຣັດເຊຍໄດ້ເຕີບໂຕຢ່າງໄວວາ ໂດຍສ່ວນໃຫຍ່ແມ່ນໃຊ້ໃນການຂົນສົ່ງ, ກະສິກຳ, ການກວດກາ ແລະ ການຖ່າຍຮູບທາງອາກາດ.
ຜູ້ຊ່ຽວຊານດ້ານໂດຣນຂອງຣັດເຊຍກ່າວວ່າ: ອີງຕາມກົດໝາຍຂອງຣັດເຊຍທີ່ກ່ຽວຂ້ອງ, ລະບົບໂດຣນທຸກຊະນິດທີ່ປະຕິບັດງານໃນນ່ານຟ້າຂອງຣັດເຊຍ ຕ້ອງຖືກອອກແບບໃຫ້ສາມາດລະບຸຕົວຕົນ ຫຼື ສາມາດຖືກສະກັດກັ້ນ ເພື່ອບັງຄັບໃຫ້ລົງຈອດໂດຍອົງການປ້ອງກັນທາງອາກາດໄດ້.
ຄໍາເຫັນ