ສຳນັກຂ່າວສານຊິນຮວາລາຍງານໃນວັນທີ 21 ກັນຍາ ຜ່ານມາວ່າ: ທ່ານນາງ ເອລລາ ແພມຟີໂລວາ ຫົວໜ້າຄະນະກຳມະການເລືອກຕັ້ງສູນກາງຂອງຣັດເຊຍ ໄດ້ເປີດເຜີຍວ່າ, ຣັດເຊຍໄດ້ສະກັດກັ້ນການໂຈມຕີທາງໄຊເບີຫຼາຍກວ່າ 100 ລ້ານຄັ້ງທີ່ແນໃສ່ແພລັດຟອມການເລືອກຕັ້ງ ໃນລະຫວ່າງການເລືອກຕັ້ງສະພາ Duma. ໂດຍຫຼາຍແພລັດຟອມເຊັ່ນ: ເວັບໄຊການເລືອກຕັ້ງທາງການ, ໄດ້ຖືກໂຈມຕີແບບ DDoS (ການໃຊ້ຊັບພະກອນຈາກຫຼາຍແຫຼ່ງເພື່ອໂຈມຕີເປົ້າໝາຍດຽວ) ແລະ ຍັງມີຄວາມພະຍາຍາມທີ່ຈະແຮັກເຂົ້າໄປໃນເຊີບເວີເວັບໂດຍກົງດ້ວຍ.
ອົງການດັ່ງກ່າວຍັງໄດ້ກວດພົບຄວາມພະຍາຍາມທີ່ຈະໃຊ້ປະໂຫຍດຈາກຊ່ອງຫວ່າງຂອງລະບົບ ແລະ ໂຈມຕີພື້ນຖານໂຄງລ່າງໂທລະຄົມມະນາຄົມຂອງປະເທດ. ຢ່າງໃດກໍຕາມ, ຣັດເຊຍສາມາດກວດພົບ ແລະ ສະກັດກັ້ນຄວາມພະຍາຍາມແຮັກລະບົບທັງໝົດໄວ້ໄດ້, ເຖິງວ່າຈະປະເຊີນກັບການໂຈມຕີທີ່ຮ້າຍແຮງແບບບໍ່ເຄີຍມີມາກ່ອນ. ໂດຍການໂຈມຕີສ່ວນໃຫຍ່ແມ່ນແນໃສ່ລະບົບການລົງຄະແນນທາງສຽງທາງໄກທາງເອເລັກໂທຣນິກຂອງຣັດເຊຍ ໂດຍມີຕົ້ນກຳເນີດມາຈາກຕ່າງປະເທດ ແລະ ບາງສ່ວນໃຊ້ທີ່ຢູ່ IP ຂອງຣັດເຊຍ ເພື່ອຫຼີກລ່ຽງການກວດພົບ.
ຄໍາເຫັນ