ບົດລາຍງານລະບຸວ່າ: ໃນປີນີ້, ສ ເກົາຫຼີ ມີປະຊາກອນອາຍຸ 65 ປີຂຶ້ນໄປທັງໝົດ 10.51 ລ້ານຄົນ ຊຶ່ງກວມເອົາ 20.3% ຂອງປະຊາກອນທັງໝົດ. ໂດຍຄາດວ່າອັດຕາສ່ວນປະຊາກອນຜູ້ອາຍຸສູງ ຈະເກີນ 30% ໃນປີ 2036 ແລະ 40% ໃນປີ 2050.
ນອກຈາກນັ້ນ, ອົງການສະຫະປະຊາຊາດ (UN) ນິຍາມໄວ້ວ່າ: ປະເທດທີ່ມີອັດຕາສ່ວນປະຊາກອນຜູ້ອາຍຸສູງຫຼາຍກວ່າ 7% ຈະຈັດເປັນສັງຄົມຜູ້ອາຍຸສູງ, ຫຼາຍກວ່າ 14% ເປັນສັງຄົມຜູ້ອາຍຸສູງຢ່າງສົມບູນ ແລະ ຫຼາຍກວ່າ 20% ຖືເປັນສັງຄົມຜູ້ອາຍຸສູງລະດັບສູງສຸດ.
ນອກຈາກນີ້, ອັດຕາສ່ວນການເພິ່ງພາອາໃສຂອງຜູ້ອາຍຸສູງ ຫຼື ອັດຕາສ່ວນຂອງປະຊາກອນຜູ້ອາຍຸສູງຕໍ່ປະຊາກອນໄວເຮັດວຽກ ອາຍຸລະຫວ່າງ 15-64 ປີຄາດວ່າຈະເພີ່ມຂຶ້ນຈາກ 29.3 ໃນປີ 2025 ເປັນ 47.7 ໃນປີ 2035 ແລະ 77.3 ໃນປີ 2050. ສຳລັບປີນີ້ ອັດຕາປະຊາກອນຜູ້ອາຍຸສູງຂອງແມ່ຍິງແມ່ນ 22.6%, ສູງກວ່າອັດຕາຂອງຜູ້ຊາຍ 18.0%.
ຈຳນວນຄົວເຮືອນທີ່ຫົວໜ້າຄອບຄົວ ມີອາຍຸ 65 ປີຂຶ້ນໄປໃນປີ 2025 ມີຈຳນວນ 6.18 ລ້ານຄົວເຮືອນ, ກວມເອົາ 27.6% ຂອງຄົວເຮືອນທັງໝົດໃນ ສ ເກົາຫຼີ ແລະ ຄາດວ່າອັດຕາສ່ວນຄົວເຮືອນຜູ້ອາຍຸສູງຈະເພີ່ມຂຶ້ນເປັນ 41.3% ໃນປີ 2038 ແລະ 50.6% ໃນປີ 2052.
ຄໍາເຫັນ