ຈຸດປະສົງແມ່ນການນຳສະເໜີ ຄວາມກ້າວໜ້າດ້ານນະວັດຕະກຳ ເຕັກໂນໂລຊີ ຂອງ ເມືອງຊອງນຳ ພ້ອມທັງສົ່ງເສີມການພົວພັນຄູ່ຮ່ວມມືຍຸດທະສາດ ແລະ ຊອກຫາໂອກາດໃໝ່ ໃນຕະຫຼາດ. ກິດຈຳກຳສົ່ງເສີມການຄ້າຄັ້ງນີ້ແມ່ນອອກແບບມາໃຫ້ເໜາະສົມສຳລັບການເຈລະຈາທຸລະ ກິດແບບສອງຝ່າຍ (one-on-one meeting) ແລະ ເພີ່ມທະວີການພົວພັນດ້ານເສດຖະກິດລະຫວ່າງ ບໍລິສັດ ຈາກເກົາຫຼີ ແລະ ບັນດາທຸລະກິດໃນລາວ ຊຶ່ງກິດຈະກຳຄັ້ງນີ້ບໍ່ພຽງແຕ່ຈະສົ່ງເສີມການພັດທະ ນາແບບຍືນຍົງເທົ່ານັ້ນ, ແຕ່ຍັງຈະຮັດແໜ້ນການຮ່ວມມືໃນຂະແຫນງການຕ່າງໆ ເຊັ່ນ: ເຕັກໂນໂລຊີສີຂຽວ, ຂົງເຂດສຸຂະພາບ, ອຸປະກອນດ້ານຄວາມງາມ, ຄວາມປອດໄພ ແລະ ນະວັດຕະກໍາ ICT ຊຶ່ງ 13 ບໍລິສັດຂອງ ສ ເກົາຫຼີ ໄດ້ເຂົ້າຮ່ວມງານດັ່ງກ່າວ.
ບໍລິສັດທີ່ເຂົ້າຮ່ວງານຄັ້ງນີ້ລວມມີ GTWAVE Co., Ltd., ຊຶ່ງກໍ່ຕັ້ງຂຶ້ນໃນປີ 1997 ມີຄວາມສ່ຽວຊາຍດ້ານ ເຄືອຂ່າຍໄຮ້ສາຍ (wireless) ໃນອຸດສາຫະກຳ ແລະ ລະບົບເຝົ້າລະວັງໄພ. ບໍລິສັດ ACT Inc ສ້າງຕັ້ງຂຶ້ນໃນປີ 1988 ຊຶ່ງເປັນບໍລິສັດທີ່ຜະລິດ ສິ່ງປະດິດນະວັດຕະກຳທີ່ຊ່ວຍພັດທະນາຄຸນນະພາບຊີວິດໃຫ້ດີຂຶ້ນເຊັ່ນ: ການທຳຄວາມສະອາດ ແລະ ອຸປະກອນດ້ານຄວາມງາມ ແລະ ອື່ນໆ. ໜຶ່ງໃນຈຸດປະສົງຕົ້ນຕໍຂອງງານຄັ້ງນີ້ແມ່ນເພື່ອ ອໍານວຍຄວາມສະດວກໃຫ້ແກ່ການພົບປະລະຫວ່າງ 13 ບໍລິສັດຂອງ ສ ເກົາຫຼີ ແລະ 47 ບໍລິສັດທ້ອງຖິ່ນຂອງລາວ, ໂດຍມີການເຈລະຈາແບບ 2 ຝ່າຍ ຫຼາຍກວ່າ 92 ຄັ້ງລະຫວ່າງຜູ້ຕາງໜ້າດ້ານ ICT, ຂົງເຂດການບິນ, ການແພດ ແລະ ຄວາມງາມຈາກພາກລັດ ແລະ ເອກະຊົນ.
ການພົບປະສອງຝ່າຍຄັ້ງນີ້ ໄດ້ເປີດໂອກາດໃຫ້ຜູ້ເຂົ້າຮ່ວມໄດ້ແລກປ່ຽນຂໍ້ມູນຂ່າວສານ, ສອບຖາມລາຍລະອຽດຂອງຜະລິດຕະພັນ ແລະ ປະເມີນໂອກາດດ້ານຕະຫຼາດຂອງຜະລິດຕະພັນເກົາຫຼີໃນລາວ. ນອກຈາກນັ້ນ, ກິດຈະກຳສົ່ງເສີມການຄ້າຄັ້ງນີ້ ຍັງສົ່ງເສີມຄວາມເຂົ້າໃຈກ່ຽວກັບວິໄສທັດທຸລະກິດຂອງເກົາຫຼີ, ເຮັດໃຫ້ຜູ້ເຂົ້າຮ່ວມຈາກ ລາວ ໄດ້ຮຽນຮູ້ປະສົບການ ແລະ ຍຸດທະສາດຂອງພວກເຂົາ. ໃນລະຫວ່າງກິດຈຳກຳຄັ້ງນີ້ ມີການເຊັນບົດບັນທຶກຄວາມເຂົ້າໃຈລະຫວ່າງບໍລິສັດ ACT Inc., ຜູ້ຜະລິດອຸປະກອນເສີມຄວາມງາມຂອງເກົາຫຼີ ແລະ Be Beauty, ຕົວແທນຈຳໜ່າຍໃນລາວ ຊຶ່ງບົດບັນທຶກຄັ້ງນີ້ມີອາຍຸສັນຍາ 1 ປີ. ໃນວັນທີ 8 ສິງຫາ ຜ່ານມາ ຄະນະຜູ້ແທນການຄ້າຈາກ ເກົາຫຼີ ທີ່ເຂົ້າຮ່ວມງານກິດຈຳກຳສົ່ງເສີມການຄ້າເມືອງຊອງນຳ (Seongnam) ປະຈຳປີ 2025 ໄດ້ເຂົ້າຢ້ຽມຢາມ ສູນອິນເຕີເນັດແຫ່ງຊາດ ເພື່ອຮຽນຮູ້ກ່ຽວກັບໂຄງຮ່າງ ແລະ ນະໂຍບາຍດ້ານ ICT ຂອງລາວ ແລະ ຍັງໄດ້ພົບກັບບໍລິສັດ SOLUTEK SYSTEM LAO ຊຶ່ງເປັນບໍລິສັດ ເຕັກໂນໂລຊີ ຂອງ ເກົາຫຼີ ທີ່ສົ່ງເສີມທຸລະກິດເລີ່ມຕົ້ນ (Start-up) ໃນລາວ. ທ່ານ ປັກ ຈຸນກິວ (Mr. park Jungwe) ຜູ້ອຳນວຍການໃຫຍ່ ອົງການ KOTRA Vientiane ກ່າວວ່າ: ກິດຈຳກຳສົ່ງເສີການຄ້າ ເມືອງຊອງນຳ ປະຈຳປີ 2025 ຄັ້ງນີ້ ເປັນບາດກ້າວທີ່ມີຄວາມໝາຍໃນການຮັດແໜ້ນສາຍພົວພັນຄູ່ຮ່ວມມືດ້ານເສດຖະກິດ ແລະ ເຕັກໂນໂລຊີລະຫວ່າງ ສ ເກົາຫຼີ ແລະ ລາວ. ພວກເຮົາໄດ້ນໍາເອົານະວັດຕະກຳ ທີ່ມີຄວາມຄິດປະດິດສ້າງຂອງບໍລິສັດຊັ້ນນໍາຂອງ Seongnam ມາສູ່ຕະຫຼາດລາວ ແລະ ເຊື່ອ ວ່າການພົບປະສອງຝ່າຍໃນຄັ້ງນີ້ໄດ້ວາງພື້ນຖານສໍາລັບການຮ່ວມມືໃນໄລຍະຍາວ ຊຶ່ງຕ່າງຝ່າຍຕ່າງຈະໄດ້ຮັບຜົນປະໂຫຍດ.
ທ່ານກ່າວຕື່ມວ່າ: KOTRA ຈະສືບຕໍ່ເປັນຂົວຕໍ່ທີ່ໜ້າເຊື່ອຖືລະຫວ່າງທຸລະກິດເກົາຫຼີ ແລະ ລາວ, ສະໜັບສະໜູນການຮ່ວມມືແບບຍືນຍົງ ແລະ ການຂະຫຍາຍຕົວໃນຂະແໜງການຫຼັກໆ ເຊັ່ນ: ສາທາລະນະສຸກ, ICT ແລະ ນຳວັດຕະກຳເຕັກໂນໂລຊີສີຂຽວ.
ຂ່າວ: ພູວຽງຄຳ
ຄໍາເຫັນ