ສ ເກົາຫຼີ ຊ່ວຍປັບປຸງດ້ານສາທາລະນະສຸກ ສປປ ລາວ ຫຼາຍໂຄງການ

ທ່ານ ຈອງ ຢອງຊູ ໄດ້ກ່າວວ່າ: ກິດຈະກຳຄັ້ງນີ້ ເປັນໜຶ່ງໃນຫຼາຍກິດຈະກຳ ທີ່ ສ ເກົາຫຼີ ແລະ ສປປ ລາວ ໄດ້ຮ່ວມກັນຈັດຂຶ້ນເພື່ອສະຫຼອງ ຄົບຮອບ 30 ປີ ຂອງການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ເກົາຫຼີ, ເພື່ອເປັນການລະນຶກເຖິງຜົນສໍາເລັດສາຍພົວພັນການຮ່ວມມືໃນໄລຍະຜ່ານມາ ແລະ ເປັນພື້ນຖານການຮ່ວມມືໃນອະນາຄົດເຮັດໃຫ້ທັງສອງປະເທດນັບມື້ມີສາຍພົວພັນການຮ່ວມມືທີ່ແໜ້ນແຟ້ນຍິ່ງໆຂຶ້ນ, ໃນນີ້ການຮ່ວມມືດ້ານສາທາລະນະສຸກ ສ ເກົາຫຼີ, ປະເທດທີ່ໃຫ້ການຊ່ວຍເຫຼືອຫຼາຍທີ່ສຸດໃນບັນດາປະເທດທີ່ມີການຈັດຕັ້ງປະຕິບັດໂຄງການດ້ານສາທາລະນະສຸກສອງຝ່າຍ, ໄດ້ໃຫ້ຄວາມສໍາຄັນ ແລະ ລົງທຶນໃສ່ໃນວຽກພັດທະນາເປັນການປະກອບສ່ວນສໍາຄັນໃນການປັບປຸງດ້ານສາທາລະນະສຸກ ແລະ ຊີວິດການເປັນຢູ່ຂອງປະຊາຊົນລາວໃຫ້ດີຂຶ້ນ.

ໂອກາດນີ້, ທ່ານ ນາງ ອາພອນ ວິຊາເທບ ໄດ້ຕາງໜ້າໃຫ້ລັດຖະບານລາວກໍຄືກະຊວງທາສາລະນະສຸກ ສະແດງຄວາມຮູ້ບຸນຄຸນ ແລະ ຂອບໃຈ ມາຍັງ ສ ເກົາຫຼີ ແລະ ອົງການຮ່ວມມືສາກົນຕ່າງໆຂອງ ສ ເກົາຫຼີ ທີ່ໄດ້ໃຫ້ການຊ່ວຍເຫຼືອ ແລະ ສຸມໃສ່ວຽກງານການປັບປຸງສຸຂະພາບທົ່ວປວງຊົນ ໂດຍສະເພາະວຽກງານ ແມ່ ແລະ ເດັກນ້ອຍ ໃນ ສປປ ລາວ ຊຶ່ງເຮັດໃຫ້ອັດຕາການເສຍຊີວິດຂອງແມ່ ແລະ ເດັກ ໄດ້ຫຼຸດລົງ ແລະ ຍັງໄດ້ສ້າງຂີດຄວາມອາດສາມາດໃຫ້ບຸກຄະລາກອນການແພດ, ການປັບປຸງຄຸນນະພາບການບໍລິການສຸຂະພາບໃນໂຮງໝໍ, ການມີສ່ວນຮ່ວມຂອງຊຸມຊົນ ແລະ ການປັບປຸງສຸຂະພາບຊຸມຊົນ ລວມທັງການປັບປຸງລະບົບສາທາລະນະສຸກ ແລະ ຫວັງວ່າຈະໄດ້ຮັບການສືບຕໍ່ໃຫ້ການສະໜັບສະໜູນ ເຂົ້າໃນວຽກງານສຸຂະພາບ ເພື່ອໃຫ້ປະຊາຊົນລາວ ມີສຸຂະພາບທີ່ດີຂຶ້ນ.

ກິດຈະກຳຄັ້ງນີ້ ຍັງໄດ້ໄປຢ້ຽມຢາມເບິ່ງຜົນສຳເລັດການຮ່ວມມືໃນໂຄງການທີ່ສໍາຄັນ ເປັນຕົ້ນ: ໂຮງໝໍເດັກ ຊຶ່ງເປັນໂຮງໝໍຂັ້ນສູນກາງແຫ່ງດຽວໃນ ສປປ ລາວ ທີ່ຮັບການສົ່ງຕໍ່ຄົນເຈັບທີ່ເປັນເດັກນ້ອຍຈາກບັນດາແຂວງ ແລະ ໃຫ້ການປິ່ນປົວດ້ວຍອຸປະກອນທີ່ທັນສະໄໝ ແລະ ມີບຸກຄະລາກອນທີ່ຊຽວຊານສະເພາະທາງໃນການປິ່ນປົວ. ຢ້ຽມຢາມມະຫາວິທະຍາໄລວິທະຍາສາດສຸຂະພາບ, ໃນນີ້ໄດ້ມີກິດຈະກຳບໍລິຈາກເລືອດ ຊຶ່ງເປັນໜຶ່ງໂຄງການທີ່ ສ ເກົາຫຼີ ໃຫ້ການຮ່ວມມື, ໂຄງການນີ້ໄດ້ສະໜອງລົດອອກຮັບການບໍລິຈາກເລືອດເຄື່ອນທີ່ ແລະ ຝຶກອົບຮົມພະນັກງານແພດຊຸດເຄື່ອນທີ່ ເພື່ອເສີມສ້າງຂີດຄວາມສາມາດໃນການບໍລິຈາກເລືອດດ້ວຍຄວາມສະໝັກໃຈ, ທັກສະທາງວິຊາການ ແລະ ປັບປຸງປະສິດທິພາບການປະຕິບັດວຽກງານ. ຢ້ຽມຢາມສູນວິເຄາະ ແລະ ລະບາດວິທະຍາ, ໂຄງການຍັງໄດ້ແນໃສ່ການປ້ອງກັນ ແລະ ຄວບຄຸມພະຍາດຕິດຕໍ່, ຊ່ວຍເສີມສ້າງຂີດຄວາມສາມາດ ໃນການກວດພົບເຊື້ອແບັດທີເຣຍ, ຕິດຕາມການລະບາດຂອງພະຍາດທີ່ຊັດເຈນ, ເຂົ້າໃຈລັກສະນະທາງກຳມະພັນຂອງເຊື້ອພະຍາດ, ຊຸກຍູ້ການສ້າງຄວາມຍືນຍົງໃຫ້ການປະຕິບັດງານດ້ານການວິເຄາະ ແລະ ສົ່ງເສີມຄວາມປອດໄພດ້ານສາທາລະນະສຸກໃນທ້ອງຖິ່ນ; ຢ້ຽມຢາມສູນສະໜອງຢາ ແລະ ອຸປະກອນການແພດ ຊຶ່ງເປັນສູນທີ່ຈັດສົ່ງອຸປະກອນການແພດທີ່ຈໍາເປັນຢ່າງທັນເວລາ ແລະ ຈັດຝຶກອົບຮົມໃຫ້ຄວາມຮູ້ ເພື່ອການບໍລິຫານຈັດການອຸປະກອນການແພດທີ່ມີປະສິດທິພາບ ແລະ ມີຄວາມຍືນຍົງ, ຢ້ຽມຢາມໂຄງການກໍ່ສ້າງໂຮງໝໍມະຫາວິທະຍາໄລວິທະຍາສາດສຸຂະພາບ ໃນທຶນກູ້ຢືມດອກເບ້ຍຕໍ່າຈາກກອງທຶນຮ່ວມມືເພື່ອພັດທະນາເສດຖະກິດ ສ ເກົາຫຼີ (EDCF ‘ Economic Development Cooperation Fund’), ໂຄງການນີ້ມີເປົ້າໝາຍເພື່ອປັບປຸງລະບົບສາທາລະນະສຸກຂອງ ສປປ ລາວ ໃຫ້ດີຂຶ້ນ ແລະ ກໍ່ສ້າງໂຮງໝໍທີ່ມະຫາ ວິທະຍາໄລ ຂະໜາດ 400 ຕຽງ ແຫ່ງທຳອິດ ທີ່ມີອຸປະກອນການແພດ ແລະ ລະບົບຂໍ້ມູນຂ່າວສານ-ການສື່ສານທີ່ທັນສະໄໝ ຊຶ່ງຈະເປັນໂຄງການໜຶ່ງທີ່ຊ່ວຍເສີມສ້າງພື້ນຖານໂຄງລ່າງທາງສາທາລະນະສຸກ ຂອງ ສປປ ລາວ.

ຂ່າວ: ຍຸພິນທອງ