ສະແດງສີລະປະດົນຕີ ລາວ-ຣັດເຊຍ ຢູ່ນະຄອນຫຼວງວຽງຈັນ

ຂປລ. ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບ ສະຖານທູດ ແຫ່ງສະຫະພັນຣັດເຊຍ ປະຈຳລາວ ຈັດງານສະແດງດົນຕີຣັດເຊຍ ໃນວັນທີ 22 ພຶດສະພາ ຜ່ານມາ ທີ່ ຫໍວັດທະນະທຳແຫ່ງຊາດ ນະຄອນຫຼວງວຽງຈັນ ໂດຍມີ ທ່ານ ສົມມາດ ພົນເສນາ ຮອງປະທານສະພາແຫ່ງຊາດ, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖວທ, ທ່ານ ທອງສະຫວັນ ພົມວິຫານ ຫົວໜ້າຄະນະພົວພັນຕ່າງປະເທດສູນກາງພັກ, ທ່ານ ວລາດິມີຣ ອານາໂຕລີເຢວິດຊ ກາລິນິນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສະຫະພັນຣັດເຊຍ ປະຈຳລາວ ພ້ອມດ້ວຍມວນຊົນເຂົ້າຮ່ວມຮັບຊົມ. 
ທ່ານ ນາງ ບົວໄຂ ເພັງພະຈັນ ຫົວໜ້າກົມສິລະປະ-ວັດທະນະທຳກະຊວງ ຖວທກ່າວໃນງານວ່າ: ງານສະແດງດົນຕີ ຂອງນັກສິລະປິນ ທີ່ມີຊື່ສຽງຂອງນະ ອນຊານເປີເຕີສະເບີກ ສະຫະພັນຣັດເຊຍ ແລະ ນັກສິລະປິນ, ນັກກາຍະສິນ ຂອງສາທາລະນະລັດປະຊາທິປະໄຕປະຊາຊົນລາວ ໃນຄ່ຳຄືນນີ້, ເປັນການປະກອບສ່ວນຮັດແໜ້ນ ສາຍພົວພັນທາງການທູດ ແລະ ການຮ່ວມມືຂອງສອງປະເທດທີ່ມີມາແຕ່ດົນນານແລ້ວ, ຍາມໃດທັງສອງປະເທດ ກໍພ້ອມກັນຍົກສູງພາລະບົດບາດ ແລະ ໃຫ້ຄວາມສຳຄັນຕໍ່ວຽກງານວັດທະນະທໍາ ໂດຍສະເພາະວຽກງານສິລະປະການສະແດງ ຊຶ່ງເປັນວຽກງານທີ່ເຜີຍແຜ່ມູນເຊື້ອສິລະປະວັດທະນະທຳ, ຮີດຄອງປະເພນີອັນດີງາມຂອງຊາດ ຂອງເຜົ່າ, ນໍາເອົາຜະລິດຕະພັນດ້ານສິລະປະການສະແດງ, ຜົນງານໃນພາລະກິດປົກປັກຮັກສາ ແລະ ພັດທະນາປະເທດຊາດ ອອກສູ່ສັງຄົມ ທັງພາຍໃນ ແລະ ຕ່າງປະເທດຢ່າງກວ້າງຂວາງ. ການຈັດງານສະແດງດົນຕີໃນຄັ້ງນີ້, ມີຄວາມໝາຍຄວາມສໍາຄັນຢ່າງຍິ່ງ ເພາະເປັນການສະແດງໃຫ້ເຫັນເຖິງການເພີ່ມທະວີການແລກປ່ຽນ ແລະ ການຮ່ວມມືທາງດ້ານສິລະປະ-ວັດທະນະທຳ ຂອງສອງປະເທດ ລາວ-ຣັດເຊຍ, ຣັດເຊຍ-ລາວ ໃຫ້ນັບມື້ນັບເຕີບໃຫຍ່ຂະຫຍາຍຕົວ ຢ່າງບໍ່ຢຸດຢັ້ງ.
ພ້ອມນີ້, ທ່ານ ນາງ ບົວໄຂ ເພັງພະຈັນ ກໍສະແດງຄວາມຍ້ອງຍໍຊົມເຊີຍ ສະຫະພັນຣັດເຊຍ ທີ່ໄດ້ສ້າງນັກສິລະປິນທີ່ມີຊື່ສຽງ, ມີບົດຮຽນປະສົບການ, ມີຜົນງານໃນການສະແດງຢ່າງຫຼວງຫຼາຍ ແລະ ໄດ້ສະແດງຢູ່ໃນຫຼາຍເວທີ ທັງພາຍໃນ ແລະ ຕ່າງປະເທດ, ສະແດງຄວາມຂອບໃຈມາຍັງສະຖານທູດຣັດເຊຍ ປະຈຳ ສປປ ລາວ, ສູນວິທະຍາສາດ, ວັດທະນະທໍາຣັດເຊຍ  ທີ່ໄດ້ສ້າງເງື່ອນໄຂ, ອຳນວຍຄວາມສະດວກ ພ້ອມທັງນຳເອົານັກສິນລະປິນທີ່ມີຊື່ສຽງ ມາສະແດງໃຫ້ມວນຊົນໃນນະຄອນຫຼວງວຽງຈັນ ໄດ້ຮັບຊົມໃນຄັ້ງນີ້. 
(ຂ່າວ: ກິດຕາ, ພາບ: ຂັນໄຊ)