ສະແດງທົດລອງຄັ້ງທີ 2 ສວນສະໜາມສະຫຼອງ 50 ປີວັນສະຖາປະນາ ສປປ ລາວ

ເພື່ອຮັບປະກັນໃຫ້ແກ່ການຈັດຕັ້ງປະຕິບັດໜ້າວຽກກະກຽມດ້ານເນື້ອໃນກໍາລັງພົນເຂົ້າຮ່ວມ, ເຄື່ອງອຸປະກອນການປະກອບ, ວິທີການ, ວາລະດໍາເນີນການຈັດຕັ້ງງານໂຮມຊຸມນຸມ ແລະ ການຈັດຕັ້ງຫັດແອບສວນສະໜາມສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 50 ປີໃຫ້ເປັນເອກະພາບ, ມີເນື້ອໃນ, ມີຄວາມໝາຍເລິກເຊິ່ງ ແລະ ສົມກຽດ. ກົມໃຫຍ່ເສນາທິການກອງທັບໃນນາມຄະນະຊີ້ນໍາກ້ອນສວນສະໜາມໄດ້ປະສານສົມທົບກັບບັນດາອົງການກະຊວງ ແລະ ກົມກອງກຳລັງຫຼວງ, ກຳລັງທ້ອງຖິ່ນສ້າງແຜນການຈັດຕັ້ງສະແດງທົດລອງຄັ້ງທີ 2 ການເດີ່ນຂະບວນສວນສະໜາມສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ 50 ປີໃນຄັ້ງນີ້ເພື່ອລະນຶກເຖິງວັນສໍາຄັນທາງປະຫວັດສາດຂອງຊາດ, ເອກອ້າງຜົນງານໃນການສ້າງສາ ແລະ ພັດທະນາປະເທດຊາດຕະຫຼອດໄລຍະ 50 ປີຕໍ່ແຂກພາຍໃນ ແລະ ຕ່າງປະເທດ, ພ້ອມທັງຖືເອົາໂອກາດນີ້ເຕົ້າໂຮມຄວາມສາມັກຄີປອງດອງຊາດຂອງປະຊາຊົນລາວບັນດາເຜົ່າໃນທົ່ວປະເທດໂດຍພາຍໃຕ້ການນຳພາຂອງພັກປະຊາຊົນ ປະຕິວັດລາວ ໃຫ້ເປັນປຶກແຜ່ນ, ສືບຕໍ່ປົກປັກຮັກສາ ແລະ ສ້າງສາພັດທະນາປະເທດຊາດຕາມທິດຊີ້ນໍາຂອງພັກວາງອອກໃຫ້ບັນລຸຕາມຈຸດປະສົງຄາດໝາຍ.

ໂອກາດນີ້, ສະຫາຍພົນຕີ ສາຍໃຈ ກົມມະສິດ ໄດ້ສະແດງຄວາມຍ້ອງຍໍຊົມເຊີຍຕໍ່ທຸກພາກສ່ວນທີ່ໄດ້ເອົາໃຈໃສ່ໃນການຫັດແອບຜ່ານການຕິດຕາມສົມທຽບໃສ່ກັບຄັ້ງທີ 1 ເຫັນວ່າດີຂຶ້ນກວ່າເກົ່າຫຼາຍມີການພັດທະນາຫຼາຍຮູບການໂດຍສະເພາະແມ່ນການຈັດຮູບແຖວ, ຈັງຫວະຕ່າງໆ, ແຕ່ຕ້ອງໄດ້ສືບຕໍ່ຝຶກຝົນຕໍ່ໄປເພາະຍັງມີບາງດ້ານຍັງບໍ່ທັນໄດ້ດີເທົ່າທີ່ຄວນ, ໄລຍະຫ່າງແຕ່ລະຈຸໃຫ້ສະເໝີ ກັນ, ເອົາໃຈໃສ່ຈັງຫວະບຸກຄົນ, ລວມໝູ່, ຕ້ອງກໍານົດຈຸດຢືນແຕ່ລະຈຸໃຫ້ລະອຽດ, ພ້ອມທັງເນັ້ນໃຫ້ຄະນະກົມກອງ, ຫົວໜ້າກ້ອນກຳລັງແລະພະນັກງານ-ນັກຮົບເອົາໃຈໃສ່ຈັດຕັ້ງຫັດແອບຕາມແຜນການທີ່ຂັ້ນເທິງມອບໝາຍໃຫ້ບັນລຸຕາມແຜນການ.

ຈາກນັ້ນ, ບັນດາຄະນະນຳແຕ່ລະກ້ອນກຳລັງກໍໄດ້ຜັດປ່ຽນກັນປະກອບຄຳຄິດເຫັນເພື່ອເອກະພາບກັນທາງດ້ານເນື້ອໃນ, ຮູບແບບການຝຶກຊ້ອມ, ຈັງຫວະທ່າທີຕ່າງໆ, ວິທີການຮັກສາສຸຂະພາບ, ວິທີການຢູ່ຮ່ວມກັນ ແລະ ສະເໜີວິທີການແກ້ໄຂໃຫ້ມີປະສິດທິພາບດີຂຶ້ນ.

ຂ່າວ: ແສງເດືອນ