 |
ການພົບປະຄັ້ງນີ້, ທັງສອງຝ່າຍໄດ້ຜັດປ່ຽນກັນແຈ້ງສະພາບການພັດທະນາເສດຖະກິດ-ສັງຄົມຂອງແຕ່ລະແຂວງໃຫ້ກັນຊາບ, ພ້ອມທັງແລກປ່ຽນບົດຮຽນ, ວິທີການເຮັດວຽກທີ່ດີເດັ່ນ ໃນວຽກງານສະຫະພັນແມ່ຍິງຂອງແຕ່ລະແຂວງ ພ້ອມດຽວກັນນັ້ນ, ກໍໄດ້ຕີລາຄາສູງຕໍ່ຜົນການຈັດຕັ້ງປະຕິບັດບົດບັນທຶກການຮ່ວມມືໃນໄລຍະຜ່ານມາ ພ້ອມທັງໄດ້ຕົກລົງເປັນເອກະພາບລົງນາມໃນບົດບັນທຶກການຮ່ວມມືສະບັບໃໝ່ (ໄລຍະ 2026-2028) ເພື່ອສືບຕໍ່ຊຸກຍູ້ການຮ່ວມມືໃນຫຼາຍດ້ານທີ່ສໍາຄັນເຊັ່ນ: ເພີ່ມທະວີການສຶກສາອົບຮົມສະມາຊິກແມ່ຍິງ ແລະ ປະຊາຊົນ ໃຫ້ຮັບຮູ້ ແລະ ຮັກສາມູນເຊື້ອຄວາມສາມັກຄີແບບພິເສດ ລາວ-ຫວຽດນາມ, ຊີ້ນໍາສະຫະພັນແມ່ຍິງທ້ອງຖິ່ນເຂດຊາຍແດນໃຫ້ປະສານງານກັນຢ່າງໃກ້ຊິດ ເພື່ອປົກປັກຮັກສາຊາຍແດນໃຫ້ເປັນເສັ້ນຊາຍແດນແຫ່ງສັນຕິພາບ, ມິດຕະພາບ ແລະ ໝັ້ນຄົງ, ປຸກລະດົມແມ່ຍິງເຂດຊາຍແດນໃຫ້ປະຕິບັດລະບຽບການລົງທະບຽນພັກອາໄສ ແລະ ການແຕ່ງງານໃຫ້ສອດຄ່ອງກັບຮີດຄອງປະເພນີ, ຕ້ານການແຕ່ງງານກ່ອນໄວອາຍຸ ແລະ ການແຕ່ງງານໃນສາຍ ໂລຫິດດຽວກັນ, ພ້ອມທັງສະກັດກັ້ນຕ້ານການຄ້າມະນຸດ, ແລກປ່ຽນບົດຮຽນການສ້າງອົງການຈັດຕັ້ງໃຫ້ເຂັ້ມແຂງ, ການຄຸ້ມຄອງແຫຼ່ງທຶນ, ການຊ່ວຍເຫຼືອແມ່ຍິງເລີ່ມຕົ້ນທຸລະກິດ, ຫຼຸດຜ່ອນຄວາມທຸກຍາກ ແລະ ການສ້າງຄອບ ຄົວໃຫ້ມີຄວາມຜາສຸກ, ການເພີ່ມພູນຄູນສ້າງຄຸນຄ່າຄອບຄົວໃນຍຸກ (4.0) ແລະ ຕົກລົງຈັດກອງປະຊຸມພົບປະສະຫຼຸບວຽກງານໝູນວຽນກັນທຸກໆ 2 ປີ ພ້ອມທັງສ້າງເງື່ອນໄຂໃຫ້ພະນັກງານ ແລະ ນັກທຸລະກິດຍິງຂອງສອງແຂວງໄດ້ພົບປະແລກປ່ຽນບົດຮຽນຊຶ່ງກັນ ແລະ ກັນຢ່າງເປັນປະຈຳ.
 |
ການລົງນາມໃນຄັ້ງນີ້ ຖືເປັນຂີດໝາຍອັນສຳຄັນໃນການສືບຕໍ່ຮັດແໜ້ນຄວາມສາມັກຄີ, ຊ່ວຍເຫຼືອຊຶ່ງກັນ ແລະ ກັນ ພ້ອມທັງເພີ່ມພູນຄູນສ້າງສາຍພົວພັນອັນດີງາມລະຫວ່າງ ແມ່ຍິງສອງແຂວງຄໍາມ່ວນ ແລະ ກວາງຈິ ໃຫ້ໝັ້ນຄົງຕະຫຼອດໄປ. ຂ່າວ: ກອງຄໍາ
ຄໍາເຫັນ