ສະຫາຍ ພັນເອກ ນາງ ໄພວອນ ອິນທະບຸດ ຄະນະບໍລິຫານງານສູນກາງສະຫະພັນແມ່ຍິງລາວຫົວໜ້າຫ້ອງການສະຫະພັນແມ່ຍິງກອງທັບ ໄດ້ຫວນຄືນປະຫວັດມູນເຊື້ອການກຳເນີດ, ການເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວຂອງອົງການຈັດຕັ້ງສະຫະພັນແມ່ຍິງລາວ ກໍຄືແມ່ຍິງລາວບັນດາເຜົ່າທີ່ໄດ້ອຸທິດຕົນ ເພື່ອພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ກໍຄື ພາລະກິດ ພັດທະນາແມ່ຍິງຕະຫຼອດໄລຍະ 69 ປີ ຊຶ່ງເອື້ອຍນ້ອງແມ່ຍິງລາວໃນເມື່ອກ່ອນແມ່ນໄດ້ປະກອບສ່ວນອຸທິດເຫື່ອແຮງ, ສະຕິປັນຍາ ເຂົ້າໃນພາລະກິດຕໍ່ສູ້ກູ້ຊາດຄຽງບ່າຄຽງໄຫຼ່ກັບເພດຊາຍ ດ້ວຍຄວາມອົງອາດກ້າຫານ, ຈົນມາຮອດ ວັນທີ 20 ກໍລະກົດ 1955 ພັກໄດ້ຈັດຕັ້ງໜ່ວຍຄົ້ນຄວ້າແມ່ຍິງຂຶ້ນ ກໍຄືຕົ້ນກໍາເນີດຂອງອົງການຈັດຕັ້ງສະຫະພັນແມ່ຍິງລາວ ໃນປັດຈຸບັນ, ເພື່ອນໍາພາແມ່ຍິງໃນທົ່ວປະເທດປະກອບສ່ວນເຂົ້າ ໃນພາລະກິດຕໍ່ສູ້ປົດປ່ອຍຊາດ, ແມ່ຍິງລາວຈໍານວນບໍ່ໜ້ອຍຖືກສັດຕູຈັບຄຸມຂັງ, ທຸບຕິທໍລະມານ, ຖືກບັງຄັບໃຫ້ໄຂຄວາມລັບ ແຕ່ແມ່ຍິງເດັດຂາດບໍ່ຍອມຈໍານົນ, ບໍ່ຍອມໄຂຄວາມລັບ, ເດັດດ່ຽວຕໍ່ສູ້ຢ່າງພິລາດອາດຫານ, ອັນໄດ້ເຮັດໃຫ້ແມ່ປ້ານ້າອາຂອງແມ່ຍິງລາວ ໄດ້ຮັບນາມະຍົດເປັນວິລະຊົນແຫ່ງຊາດ, ນັກຮົບແຂ່ງຂັນ ແລະ ໄດ້ຮັບຄັດເລືອກໃຫ້ເປັນແບບຢ່າງທີ່ດີເດັ່ນປະກອບສ່ວນເຂົ້າໃນຂົງເຂດວຽກງານຕ່າງໆ ພ້ອມທັງໄດ້ຮັບການຍ້ອງຍໍຈາກ ພັກ ແລະ ລັດຖະບານຫຼາຍລະດັບ. ພາຍຫຼັງປະເທດຊາດໄດ້ຮັບການປົດປ່ອຍ ແມ່ຍິງລາວບັນດາເຜົ່າ ໄດ້ສືບຕໍ່ເສີມຂະຫຍາຍທາດແທ້ມູນເຊື້ອອັນສະຫງ່າງາມ ແລະ ຕັ້ງໜ້າປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນໍາພາຂອງພັກ-ລັດແມ່ຍິງລາວໃນຂອບເຂດທົ່ວປະເທດ ສາມາດຈັດຕັ້ງປະຕິບັດພາລະບົດບາດ ແລະ ໜ້າທີ່ການເມືອງຂອງຕົນ, ພ້ອມທັງຜັນຂະຫຍາຍມະຕິກອງປະຊຸມ ໃຫຍ່ຂອງຜູ້ແທນແມ່ຍິງລາວ ແຕ່ລະຄັ້ງມາເປັນແຜນງານ, ໂຄງການຢ່າງລະອຽດ ແລະ ໄດ້ຮັບຜົນສໍາເລັດໃນແຕ່ລະໄລຍະ.
ໂອກາດນີ້, ສະຫາຍ ພົນຕີ ໄພວັນ ຈັນທະພົມມາ ໄດ້ມີຄຳເຫັນໂອ້ລົມ ຊຶ່ງກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ຂອງອົງການຈັດຕັ້ງສະມາຊິກ ສະຫະພັນແມ່ຍິງກອງທັບ ກໍຄື ສະຫະພັນແມ່ຍິງແຕ່ລະສະຫາຍ ຈົ່ງກຳແໜ້ນໄດ້ພາລະບົດບາດ, ໜ້າທີ່ ແລະ ເສີມຂະຫຍາຍທາດແທ້ມູນເຊື້ອຜົນງານການເຄື່ອນໄຫວ ຂອງບັນດາແມ່ຍິງຮຸ່ນກ່ອນສ້າງມາເຂົ້າໃນການເຄື່ອນໄຫວປະຕິບັດໜ້າທີ່ໃນປັດຈຸບັນ ຢ່າງມີວິທະຍາສາດ, ປະດິດສ້າງ ເຮັດໃຫ້ບົດບາດຊື່ສຽງຂອງແມ່ຍິງລາວ ກໍຄືແມ່ຍິງກອງທັບສູງເດັ່ນຂຶ້ນ. ນອກນີ້ ສະຫາຍຍັງເນັ້ນໜັກໃຫ້ຄະນະນຳສະຫະພັນແມ່ຍິງ ຈົ່ງພ້ອມກັນເປັນເຈົ້າການປັບປຸງກໍ່ສ້າງອົງການຈັດຕັ້ງສະຫະພັນແມ່ຍິງ, ນຳພາສະມາຊິກສະຫະພັນແມ່ຍິງ ໃຫ້ມີຄວາມໜັກແໜ້ນເຂັ້ມແຂງ, ມີແບບແຜນວິທີໃນການເຮັດວຽກ, ຕັ້ງໜ້າປະຕິບັດເນື້ອໃນຂໍ້ແຂ່ງຂັນແມ່ຍິງ 3 ດີ ໃຫ້ເປັນຂະບວນການຟົດຟື້ນກວ້າງຂວາງຍິ່ງໆຂຶ້ນໆ.
ຂ່າວ: ສຸກສາຄອນ
ຄໍາເຫັນ