 |
ພິທີດັ່ງກ່າວ ໄດ້ຈັດຂຶ້ນຢ່າງສົມກຽດ ໂດຍການໃຫ້ກຽດເຂົ້າຮ່ວມເປັນປະທານຂອງ ສະຫາຍ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກຜູ້ປະຈຳການເລຂາທິການສູນກາງພັກມີຜູ້ຕາງໜ້າຈາກຄະນະຈັດຕັ້ງສູນກາງພັກ, ຫ້ອງວ່າການສູນກາງພັກ, ຄະນະໂຄສະນາອົບຮົມສູນກາງພັກ, ບັນດາສະຫາຍຄະນະບໍລິຫານງານພັກ, ຄະນະນຳ, ພະນັກງານຫຼັກແຫຼ່ງ, ຄູ-ອາຈານ ພ້ອມດ້ວຍນັກສຶກສາ, ນັກຄົ້ນຄວ້າ ພາຍໃນ ສມປຊ ເຂົ້າຮ່ວມ.
ໃນວາລະເລີ່ມຕົ້ນຂອງພິທີ, ສະຫາຍ ພູວົງ ອຸ່ນຄຳແສນ ກໍາມະການສູນກາງພັກຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ (ຜູ້ເກົ່າ) ໄດ້ຂຶ້ນຜ່ານບົດສະຫຼຸບຫຍໍ້ ກ່ຽວກັບການເຄື່ອນໄຫວວຽກງານການນໍາພາ-ຊີ້ນໍາ ຮອບດ້ານໃນໄລຍະທີ່ຜ່ານມາ. ຕະຫຼອດໄລຍະເວລາທີ່ສະຫາຍໄດ້ດຳລົງຕຳແໜ່ງ, ສະຫາຍໄດ້ສຸມສະຕິປັນຍາ ແລະ ເຫື່ອແຮງ ຮ່ວມກັບຄະນະພັກ-ຄະນະນຳ ຂອງ ສມປຊ ໃນການປັບປຸງຫຼັກສູດການຮຽນ-ການສອນ ທິດສະດີການເມືອງ-ການປົກຄອງ ໃຫ້ມີລັກສະນະວິທະຍາສາດ ແລະ ທັນສະໄໝ, ສອດຄ່ອງກັບສະພາບການພັດທະນາຂອງປະເທດໃນໄລຍະໃໝ່. ພາຍໃຕ້ການນຳພາຂອງສະຫາຍ, ວຽກງານຄົ້ນຄວ້າວິທະຍາສາດ ໄດ້ມີຜົນງານພົ້ນເດັ່ນຫຼາຍດ້ານ, ການກໍ່ສ້າງພະນັກງານນຳພາ-ຄຸ້ມຄອງ ຂອງພັກ ແລະ ລັດ ໄດ້ຮັບການຍົກລະດັບທາງດ້ານຄຸນນະພາບ, ເຮັດໃຫ້ ສມປຊ ສືບຕໍ່ເປັນສູນກາງແຫ່ງການບຳລຸງສ້າງ ແລະ ຄົ້ນຄວ້າທິດສະດີ ທີ່ເຂັ້ມແຂງຂອງພັກເຮົາ.
ຕໍ່ຈາກນັ້ນ, ຜູ້ຕາງໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານເອກະສານນິຕິກຳສຳຄັນຂອງພັກ ຈຳນວນ 2 ສະບັບ ຕາມແຈ້ງການເລກທີ 135/ຄຈສພ ລົງວັນທີ 23 ມັງກອນ 2026 ຄື:
ຄຳສັ່ງຂອງກົມການເມືອງສູນກາງພັກ ວ່າດ້ວຍການຍົກຍ້າຍພະນັກງານການນຳຂັ້ນສູງໄປຮັບໜ້າທີ່ໃໝ່: ຕົກລົງຍົກຍ້າຍ ສະຫາຍ ພູວົງ ອຸ່ນຄຳແສນ ກໍາມະການສູນກາງພັກເລຂາຄະນະບໍລິຫານງານພັກຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ໄປຮັບໜ້າທີ່ໃໝ່ ຢູ່ ແຂວງຊຽງຂວາງ.
ມະຕິຕົກລົງຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງພະນັກງານການນຳຂັ້ນສູງ: ຕົກລົງແຕ່ງຕັ້ງ ສະຫາຍ ອານຸພາບ ຕຸນາລົມ ເລຂາທິການສູນກາງພັກ ເປັນ ເລຂາຄະນະບໍລິຫານງານພັກຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ (ຜູ້ໃໝ່).
ໃນບັນຍາກາດອັນມີຄວາມໝາຍສຳຄັນນີ້, ສະຫາຍ ວິໄລ ຫຼ້າຄຳຟອງ ໄດ້ໃຫ້ກຽດມອບຄຳສັ່ງຍົກຍ້າຍ ໃຫ້ແກ່ ສະຫາຍ ພູວົງ ອຸ່ນຄຳແສນ ແລະ ມອບມະຕິຕົກລົງແຕ່ງຕັ້ງ ໃຫ້ແກ່ ສະຫາຍ ອານຸພາບ ຕຸນາລົມ. ຫຼັງຈາກນັ້ນ, ທັງສອງສະຫາຍ ຫົວໜ້າຜູ້ເກົ່າ ແລະ ຜູ້ໃໝ່ ກໍໄດ້ລົງລາຍເຊັນໃນບົດບັນທຶກມອບ-ຮັບ ໜ້າທີ່ ຢ່າງເປັນທາງການ ຕໍ່ໜ້າຄະນະປະທານ ແລະ ແຂກທີ່ເຂົ້າຮ່ວມ ເພື່ອເປັນການຢັ້ງຢືນເຖິງການສືບຕໍ່ພາລະກິດ ແລະ ຄວາມຮັບຜິດຊອບໃນການນຳພາ ສມປຊ ໃນຕໍ່ໜ້າ.
ໃນຕອນທ້າຍຂອງພິທີ, ສະຫາຍ ວິໄລ ຫຼ້າຄຳຟອງ ໄດ້ໃຫ້ກຽດມີຄຳເຫັນໂອ້ລົມ ທີ່ມີເນື້ອໃນເລິກເຊິ່ງ ແລະກວ້າງຂວາງ ຊຶ່ງກ່ອນອື່ນ, ສະຫາຍໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງ ຕໍ່ຜົນງານ, ຄຸນງາມຄວາມດີ ແລະຄວາມບຸກບືນພະຍາຍາມ ຂອງ ສະຫາຍ ພູວົງ ອຸ່ນຄຳແສນ ທີ່ໄດ້ທຸ່ມເທເຫື່ອແຮງຕະຫຼອດໄລຍະເວລາໃນການນຳພາ ສມປຊ, ສາມາດສ້າງພື້ນຖານອັນໜັກແໜ້ນທາງດ້ານວິຊາການ ແລະ ພື້ນຖານໂຄງລ່າງ ໃຫ້ແກ່ສະຖາບັນ. ການຍົກຍ້າຍໄປຮັບໜ້າທີ່ໃໝ່ ຢູ່ແຂວງຊຽງຂວາງ ເຊິ່ງເປັນແຂວງຍຸດທະສາດສຳຄັນ ແມ່ນສະແດງເຖິງຄວາມໄວ້ເນື້ອເຊື່ອໃຈຂອງກົມການເມືອງສູນກາງພັກ ທີ່ມີຕໍ່ສະຫາຍ ໃນການໄປກໍ່ສ້າງຮາກຖານການເມືອງ ແລະ ພັດທະນາທ້ອງຖິ່ນໃຫ້ເຂັ້ມແຂງ.
 |
ພ້ອມດຽວກັນນັ້ນ, ສະຫາຍ ວິໄລ ຫຼ້າຄຳຟອງ ກໍໄດ້ເນັ້ນໜັກ ແລະ ມອບທິດທາງໜ້າທີ່ ໃຫ້ແກ່ ສະຫາຍ ອານຸພາບ ຕຸນາລົມ ຫົວໜ້າ ສມປຊ ຜູ້ໃໝ່. ດ້ວຍຄວາມຮູ້, ຄວາມສາມາດ ລະດັບປະລິນຍາເອກ ແລະ ປະສົບການທີ່ສູງສົ່ງໃນຖານະ ເລຂາທິການສູນກາງພັກ, ເຊື່ອໝັ້ນວ່າ ສະຫາຍຈະເປັນຄັນທຸງສືບຕໍ່ນຳພາ ສມປຊ ໃຫ້ມີບາດກ້າວຂະຫຍາຍຕົວໃໝ່ທີ່ແຂງແຮງກວ່າເກົ່າ. ສະຫາຍ ປະທານພິທີ ໄດ້ເນັ້ນໜັກບາງບັນຫາສຳຄັນ ຄື:
1.ສືບຕໍ່ຮັກສາມູນເຊື້ອຄວາມສາມັກຄີ: ໃຫ້ຄະນະພັກ-ຄະນະນຳ ຊຸດໃໝ່ ເພີ່ມທະວີຄວາມສາມັກຄີພາຍໃນໃຫ້ເປັນປຶກແຜ່ນ, ຢຶດຖືຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ ແລະ ແບ່ງວຽກໃຫ້ບຸກຄົນຮັບຜິດຊອບຢ່າງຈະແຈ້ງ.
2. ຍົກສູງຄຸນນະພາບການກໍ່ສ້າງພະນັກງານ: ຕ້ອງສຸມໃສ່ປັບປຸງເນື້ອໃນການຮຽນ-ການສອນ ໃຫ້ເລິກເຊິ່ງ, ຕິດພັນກັບພຶດຕິກຳຕົວຈິງຂອງປະເທດລາວ, ສ້າງພະນັກງານທີ່ມີທາດແທ້ການເມືອງໜັກແໜ້ນ, ມີຄຸນສົມບັດສິນທຳປະຕິວັດ ແລະ ມີຄວາມຮູ້ຄວາມສາມາດທີ່ແທ້ຈິງ.
3. ວຽກງານຄົ້ນຄວ້າທິດສະດີ ແລະ ພຶດຕິກຳ: ສມປຊ ຕ້ອງເປັນເສນາທິການທາງດ້ານທິດສະດີໃຫ້ແກ່ສູນກາງພັກ, ຄົ້ນຄວ້າບັນຫາທີ່ພົ້ນເດັ່ນໃນສັງຄົມ, ສະຫຼຸບຖອດຖອນບົດຮຽນຈາກພຶດຕິກຳ ເພື່ອເສີມຂະຫຍາຍແນວທາງຂອງພັກ ໃຫ້ສົມບູນຍິ່ງຂຶ້ນ.ການກໍ່ສ້າງພັກ-ພະນັກງານ: ເອົາໃຈໃສ່ສຶກສາອົບຮົມການເມືອງ-ນຳພາແນວຄິດ ໃຫ້ສະມາຊິກພັກ, ພະນັກງານ-ຄູອາຈານ ໃຫ້ມີສະຕິຕໍ່ການຈັດຕັ້ງ, ມີລະບຽບວິໄນ ແລະ ຈັນຍາບັນຂອງຄູສອນການເມືອງ.
ໃນຕອນທ້າຍພິທີ, ສະຫາຍ ອານຸພາບ ຕຸນາລົມ ໄດ້ຂຶ້ນກ່າວຮັບຄຳໂອ້ລົມ ແລະ ໃຫ້ຄຳໝັ້ນສັນຍາວ່າ: ຈະສືບຕໍ່ສືບທອດມູນເຊື້ອອັນດີງາມ ຂອງ ສມປຊ, ຈະທຸ້ມເທສະຕິປັນຍາ ເພື່ອປະຕິບັດໜ້າທີ່ການເມືອງທີ່ພັກ-ລັດ ມອບໝາຍໃຫ້ ໃຫ້ປະສົບຜົນສຳເລັດ, ສ້າງ ສມປຊ ໃຫ້ກາຍເປັນສູນກາງທາງດ້ານວິຊາການ ແລະ ທິດສະດີການເມືອງ ທີ່ທັນສະໄໝ ແລະ ເຂັ້ມແຂງຂອງຊາດ.
ຂ່າວ: ຕາອັອດ ແສນທະວີສຸກ, ພາບ: ຫສພ
ຄໍາເຫັນ