ສະຫາຍ ຄໍາພັນ ພົມມະທັດ ໄດ້ຮັບການແຕ່ງຕັ້ງເປັນເລຂາພັກກະຊວງຍຸຕິທຳຜູ້ໃໝ່

ສະຫາຍ ໄພວີ ສີບົວລິພາ ກຳມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີກະຊວງຍຸຕິທຳ ໄດ້ຂຶ້ນຜ່ານບົດສະຫຼຸບການຊີ້ນຳ-ນຳພາວຽກງານຮອບດ້ານໄລຍະຜ່ານມາວ່າ: ກະຊວງຍຸຕິທຳປະກອບມີ 11 ຫົວໜ່ວຍຂຶ້ນກັບ ຄື: ຫ້ອງການ, ກົມຈັດຕັ້ງ ແລະ ພະນັກງານ, ກົມກວດກາ, ກົມກົດໝາຍ, ກົມໂຄສະນາເຜີຍແຜ່ກົດໝາຍ, ກົມຄຸ້ມຄອງການປະຕິບັດຄໍາຕັດສິນຂອງສານ, ກົມຄຸ້ມຄອງ ແລະ ສົ່ງເສີມວຽກງານຍຸຕິທຳ, ກົມທະ ບຽນສານ, ກົມຮ່ວມມືສາກົນ, ສູນແກ້ໄຂຂໍ້ຂັດແຍ່ງທາງດ້ານເສດຖະກິດ ແລະ ສະຖາບັນຍຸຕິທຳແຫ່ງຊາດ. ນອກນັ້ນ, ຍັງມີຫົວໜ່ວຍວິຊາການລະດັບ 2 ຂຶ້ນກັບ ຄື: ສະຖາບັນຍຸຕິທຳແຫ່ງຊາດ 3 ສາຂາ; ມີ 5 ກອງ ແລະ 11 ຫ້ອງປະຕິບັດຄໍາຕັດສິນຂອງສານ, ສຳລັບກົງຈັກການຈັດຕັ້ງທ້ອງຖິ່ນ ທີ່ຢູ່ພາຍໃຕ້ການຊີ້ນຳດ້ານວິຊາການຂອງກະຊວງຍຸຕິທຳມີຄື: ພະແນກຍຸຕິທຳ ນະຄອນຫຼວງວຽງຈັນ ແລະ ບັນດາແຂວງ 17 ແຂວງ ແລະ ຫ້ອງການຍຸຕິທໍາບັນດາເມືອງ, ນະຄອນ 148 ເມືອງ; ມາເຖິງປັດຈຸບັນມີພະນັກງານ-ລັດຖະກອນ ຂະແໜງການຍຸຕິທໍາໃນຂອບເຂດທົ່ວປະເທດທັງໝົດ 2,303 ຄົນ ຍິງ 873 ຄົນ. ໃນນີ້ຢູ່ກະຊວງຍຸຕິທຳມີ 675 ຄົນ ຍິງ 244 ຄົນ. ຜົນການຈັດຕັ້ງປະຕິບັດວຽກງານໄລຍະ 5 ປີຜ່ານມາ, ດ້ານການເມືອງ-ແນວຄິດ ໄດ້ຖືສຳຄັນວຽກງານສຶກສາອົບຮົມນຳພາການເມືອງ-ແນວຄິດໃຫ້ສະມາຊິກພັກ, ພະນັກງານ-ລັດຖະກອນ ດ້ວຍການຈັດຕັ້ງເຊື່ອມຊຶມບັນດາມະຕິ, ຄຳສັ່ງ ແລະ ເອກະສານສຳຄັນຕ່າງໆ ຂອງພັກ-ລັດ, ຜ່ານຜ່າຄວາມຫຍຸ້ງຍາກດ້ານຕ່າງໆ ໃຫ້ມີຄວາມສະຫງົບ ພ້ອມກັນເຮັດສຳເລັດໜ້າທີ່ການເມືອງຂອງຕົນ ແລະ ສ້າງຄວາມເຊື່ອໝັ້ນຂອງສັງຄົມ ຕໍ່ວຽກງານຍຸຕິທຳນັບມື້ນັບຫຼາຍຂຶ້ນ. ດ້ານວຽກງານວິຊາສະເພາະ ໄດ້ເອົາໃຈໃສ່ຊີ້ນຳ-ນຳພາການສ້າງ ແລະ ປັບປຸງກົດໝາຍທີ່ຢູ່ໃນຄວາມຮັບຜິດ ຊອບຂອງກະຊວງຍຸຕິທໍາ ລວມມີ 5 ກົດໝາຍ, ໄດ້ຖືກຮັບຮອງ ແລະ ປະກາດໃຊ້ແລ້ວທັງ 5 ສະບັບ; ເອົາໃຈໃສ່ປະຕິບັດໜ້າທີ່ເປັນໃຈກາງປະສານສົມທົບກັບບັນດາກະຊວງ, ອົງການທີ່ຮັບຜິດຊອບໃນການສ້າງ ແລະ ປັບປຸງກົດໝາຍ ພ້ອມທັງຄົ້ນຄວ້າ, ຮຽບຮຽງ, ກວດກາ ຄວາມສອດຄ່ອງທາງດ້ານກົດໝາຍຂອງຮ່າງກົດໝາຍທັງໝົດ 87 ສະບັບ, ກົດໝາຍສ້າງໃໝ່ 24 ສະບັບ ແລະ ປັບປຸງ 63 ສະບັບ, ໃນນີ້ ມີກົດໝາຍທີ່ນອນໃນແຜນການສ້າງ ແລະ ປັບປຸງກົດໝາຍ 5 ປີ (2021-2025) ມີ 76 ສະບັບ, ກົດໝາຍສ້າງໃໝ່ 23 ສະບັບ ແລະ ປັບປຸງ 53 ສະບັບ. ນອກຈາກນີ້, ຍັງໄດ້ເຂົ້າຮ່ວມປັບປຸງລັດຖະທຳມະນູນ ສະບັບປີ 2025. ພ້ອມນັ້ນ ກໍໄດ້ກວດກາຄວາມສອດຄ່ອງທາງດ້ານກົດໝາຍຂອງຮ່າງລັດຖະບັນຍັດໄດ້ 8 ສະບັບ, ຮ່າງດຳລັດໄດ້ 104 ສະບັບ, ໃນນີ້ມີດຳລັດທີ່ຢູ່ໃນຄວາມຮັບຜິດຊອບຂອງກະຊວງຍຸຕິທໍາ ຈໍານວນ 7 ສະບັບ; ຄົ້ນຄວ້າ ແລະ ປະກອບຄຳເຫັນຕໍ່ສັນຍາການລົງທຶນ, ສັນຍາສຳປະທານ ແລະ ສັນຍາກູ້ຢືມ ທີ່ລັດຖະບານເປັນຄູ່ສັນຍາໃຫ້ມີຄວາມສອດຄ່ອງກັບນະໂຍບາຍ ແລະ ກົດໝາຍໄດ້ທັງໝົດ 56 ສະບັບ; ເອົາໃຈໃສ່ຊີ້ນຳພະແນກຍຸຕິທຳຂັ້ນແຂວງ, ຫ້ອງການຍຸຕິທໍາເມືອງ ເຮັດໜ້າທີ່ເປັນເສນາທິການ ໃຫ້ອົງການປົກຄອງທ້ອງຖິ່ນ ໃນການກວດກາຮ່າງນິຕິກຳຕ່າງໆ ກ່ອນຈະສະເໜີອົງການ ຊຶ່ງເປັນການປະກອບສ່ວນສຳຄັນ ເຂົ້າໃນການຄຸ້ມຄອງລັດດ້ວຍກົດໝາຍເທື່ອລະກ້າວ.

ສະຫາຍ ວຽນທອງ ສິງຄຳພັນ ຄະນະພັກ ຫົວໜ້າກົມຈັດຕັ້ງ ຄະນະຈັດຕັ້ງສູນກາງພັກ ໄດ້ຂຶ້ນຜ່ານຄຳສັ່ງ ແລະ ມະຕິຕົກລົງຂອງກົມການເມືອງສູນກາງພັກ ວ່າດ້ວຍການຍົກຍ້າຍສະຫາຍ ໄພວີ ສີບົວລິພາ ກຳມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີກະຊວງຍຸຕິທຳ ໄປຮັບໜ້າທີ່ໃໝ່ຢູ່ສານປະຊາຊົນສູງສຸດ ແລະ ແຕ່ງຕັ້ງສະຫາຍ ຄໍາພັນ ພົມມະທັດ ກຳມະການກົມການເມືອງສູນກາງພັກ ເປັນເລຂາ ຄະນະບໍລິຫານງານພັກ ລັດຖະມົນຕີກະຊວງຍຸຕິທຳ (ຜູ້ໃໝ່). ໃນພິທີໄດ້ເຊັນມອບ-ຮັບໜ້າທີ່ລະຫວ່າງສະຫາຍ ໄພວີ ສີບົວລິພາ ກຳມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີກະຊວງຍຸຕິທຳຜູ້ເກົ່າ ແລະ ສະຫາຍ ຄໍາພັນ ພົມມະທັດ ກຳມະການກົມການເມືອງສູນກາງພັກ ເປັນເລຂາຄະນະບໍລິຫານງານພັກ ລັດຖະມົນຕີກະຊວງຍຸຕິທຳ (ຜູ້ໃໝ່).

ໂອກາດນີ້, ສະຫາຍ ພົນເອກ ວິໄລ ຫຼ້າຄຳຟອງ ໄດ້ໃຫ້ກຽດມອບໃບຍົກຍ້າຍ ແລະ ໃບແຕ່ງຕັ້ງ ພ້ອມທັງໃຫ້ກຽດໂອ້ລົມເນັ້ນໜັກ ໃຫ້ຄະນະພັກ-ຄະນະນໍາ ກໍຄືພະນັກງານຫຼັກແຫຼ່ງກະຊວງຍຸຕິທຳ ເອົາໃຈໃສ່ຮັກສາຄວາມສາມັກຄີພາຍໃນ, ປະຕິບັດຖືກຕ້ອງຄົບຖ້ວນຕາມຫຼັກການນຳພາຂອງພັກ ມີຄວາມເປັນເອກະພາບໃນການຄົ້ນຄວ້າຕັດສິນບັນຫາ, ແບບແຜນວິທີເຮັດວຽກຕ້ອງແທດຕົວຈິງ, ໂປ່ງໃສ; ມີການແບ່ງງານ, ການມອບໝາຍຄວາມຮັບຜິດຊອບຢ່າງຈະແຈ້ງ; ເປັນແບບຢ່າງໃນການນຳພາ, ມີທັດສະນະ ແລະ ແບບແຜນດຳລົງຊີວິດທີ່ປອດໃສ, ປະຕິບັດໜ້າທີ່ດ້ວຍຄວາມບໍລິສຸດຊັດຊື່, ມີຈັນຍາບັນ, ມີຄວາມສະດຸ້ງໄວຕໍ່ສະພາບການໃນເງື່ອນໄຂ ໃໝ່. ຍາມໃດກໍຕ້ອງມີສະຕິກຽມພ້ອມປະຕິບັດໜ້າທີ່ ທີ່ໄດ້ຮັບມອບໝາຍ; ຕ້ອງເຂັ້ມງວດຕໍ່ຕົນເອງ, ຕໍ່ໜ້າທີ່ການເມືອງທີ່ໄດ້ຮັບມອບໝາຍຢ່າງເຂັ້ມງວດ.

ຂ່າວ-ພາບ: ບຸນຕອມ