ໃນວັນທີ 13 ພຶດສະພານີ້ທີ່ ກະຊວງການຕ່າງປະເທດ, ສະຫາຍ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ຫຼິວ ຫົງຈ້ຽນ ເລຂາພັກນະຄອນຄຸນໝິງ, ແຂວງຢຸນໜານ ສປ ຈີນ ພ້ອມດ້ວຍຄະນະໃນໂອກາດເດີນທາງມາຢ້ຽມຢາມເຮັດວຽກຢູ່ ສປປ ລາວ.
ໂອກາດນີ້, ສະຫາຍຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການຢ້ຽມຢາມ ສປປ ລາວ ຂອງຄະນະຜູ້ແທນຈາກນະຄອນຄຸນໝິງໃນຄັ້ງນີ້. ພ້ອມນີ້, ສະຫາຍຮອງນາຍົກລັດຖະມົນຕີ ກໍໄດ້ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ, ການເປັນຄູ່ຮ່ວມຍຸດທະສາດຮອບດ້ານ, ໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກຳ ລາວ-ຈີນ, ຈີນ-ລາວ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ. ພ້ອມດຽວກັນນັ້ນ, ສະຫາຍຮອງນາຍົກລັດຖະມົນຕີ ກໍໄດ້ສະແດງຄວາມຊົມເຊີນມາຍັງ ນະຄອນຄຸຸນໝິງ ກໍຄື ແຂວງຢຸນນານ ເນື່ອງໃນໂອກາດໄດ້ຮັບມອບໝາຍຈາກສູນກາງ ໃນການຊຸກຍູ້, ເສີມຂະຫຍາຍການພົວພັນ ແລະ ຮ່ວມມືຮ່ວມກັບ ສປປ ລາວ, ກໍຄືການຈັດຕັ້ງປະຕິບັດບັນດາໂຄງການຮ່ວມມືແບບຢ່າງ ທີ່ການນຳສູງສຸດຂອງສອງປະເທດຕົກລົງເຫັນດີເປັນເອກະພາບກັນໃຫ້ເປັນຮູບປະທຳ.
ທັງສອງຝ່າຍຍັງໄດ້ປຶກສາຫາລືກ່ຽວກັບການຊຸກຍູ້ການຮ່ວມມືດ້ານເສດຖະກິດຕາມແລວທາງລົດໄຟລາວ-ຈີນ, ໂດຍສະເພາະການສ້າງເງື່ອນໄຂອຳນວຍຄວາມສະດວກໃຫ້ແກ່ການຂົນສົ່ງສິນຄ້າຂອງ ສປປ ລາວ ສູ່ ສປ ຈີນ ໃຫ້ນັບມື້ນັບຫຼາຍຂຶ້ນ. ພ້ອມນັ້ນ, ສະຫາຍ ສະເຫຼີມໄຊ ກົມມະສິດ ໄດ້ຖືເອົາໂອກາດ ໃນການເປີດປີທ່ອງທ່ຽວລາວ 2024 ເຊື້ອເຊີນບັນດານັກທ່ອງທ່ຽວ ຈາກ ສປ ຈີນ ກໍຄື ນະຄອນຄຸນໝິງ ມາທ່ອງທ່ຽວ ສປປ ລາວ ໃຫ້ຫຼາຍຂຶ້ນ.
ໃນໂອກາດດຽວກັນນີ້, ສະຫາຍ ຫຼິວຫົງຈ້ຽນ ໄດ້ຕາງໜ້າໃຫ້ຄະນະສະແດງຄວາມຂອບອົກຂອບໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງສະແດງຄວາມຍິນດີຈະສືບຕໍ່ຊຸກຍູ້ເພີ່ມທະວີການຮ່ວມມືລະຫວ່າງນະຄອນຄຸນໝິງແລະ ບັນດາອຳນາດການປົກຄອງທ້ອງຖິ່ນຂອງ ສປປ ລາວ ໃນຂະແໜງການທີ່ທັງສອງຝ່າຍເຫັນວ່າມີທ່າແຮງຮ່ວມກັນ.
(ຂ່າວ-ພາບ: ກະຊວງການຕ່າງປະເທດ)
ຍົກລະດັບການຄຸ້ມຄອງປະກັນສັງຄົມ ແລະ ສິດທິແຮງງານຊາວກະສິກອນ 32,000 ກວ່າຄົນໃນ 7 ແຂວງ
ກະຊວງແຮງງານ ແລະ ສະຫວັດດີການສັງຄົມ (ຮສສ) ຮ່ວມກັບອົງການສາກົນເປີດ “ໂຄງການສ້າງຄວາມກ້າວໜ້າໃຫ້ລະບົບປົກປ້ອງສັງຄົມ ແລະ ສິດທິດ້ານແຮງງານສຳລັບຊາວກະສິກອນໃນຂະແໜງກາເຟ, ຊາ ແລະ ປ່າໄມ້ (SOLAR II)” ໃນວັນທີ 29 ກັນຍາຜ່ານມາ ທີ່ນະຄອນຫຼວງວຽງຈັນ ເປັນກຽດກ່າວເປີດໂດຍທ່ານ ນາງ ແກ້ວ ຈັນທະວີໄຊ ຮອງລັດຖະມົນຕີ ກະຊວງ ຮສສ, ມີທ່ານ ມາກ ກາລາເຮີ (Marc Gallagher) ເອກອັກຄະລັດຖະທູດສະຫະພາບເອີຣົບ ປະຈຳ ສປປ ລາວ, ມີທ່ານ ລາສ ໂຢຮັນເຊນ (Lars Johansen) ຮອງຜູ້ອຳນວຍການ ຫ້ອງການອົງການແຮງງານສາກົນ (ILO) ປະຈຳປະເທດໄທ, ກຳປູເຈຍ ແລະ ສປປ ລາວ, ທ່ານ ພອນສານ ວິໄລເມັ້ງ ຮອງປະທານສູນກາງສະຫະພັນກຳມະບານລາວ, ທ່ານ ໄຊບັນດິດ ລາດສະພົນ ຮອງປະ ທານສະພາການຄ້າ ແລະ ອຸດສາຫະກຳແຫ່ງຊາດລາວ, ມີບັນດາຫົວໜ້າອົງການປະກັນສັງຄົມແຫ່ງຊາດ, ຜູ້ຕາງໜ້າອົງການ ILO, ພະແນກ ຮສສ ແຂວງ ແລະ ແຂກຖືກເຊີນເຂົ້າຮ່ວມ.
ຄໍາເຫັນ