 |
ສະຫາຍ ມອນໄຊ ລາວມົວຊົ່ງ ກ່າວປິດກອງປະຊຸມວ່າ: ກອງປະຊຸມຄັ້ງນີ້ ເປັນການຢັັ້ງຢືນເຖິງຄວາມສາມັກຄີ ເປັນເອກະພາບ ແລະ ຄວາມຮັບຜິດຊອບ ທາງດ້ານການເມືອງ ຂອງບັນດາສະຫາຍຜູ້ແທນກອງປະຊຸມ ໄດ້ສະເເດງໃຫ້ເຫັນເຖິງຄວາມຕັດສິນໃຈເດັດດ່ຽວຢຶດໝັ້ນການນຳພາໂດຍກົງ ຮອບດ້ານຂອງພັກ, ປະຕິບັດແນວທາງການປ່ຽນແປງໃໝ່ຮອບດ້ານທີ່ມີຫຼັກການຂອງພັກ, ໃນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII, ການຈັດຕັ້ງປະຕິບັດຂະບວນການຂໍ້ແຂ່ງຂັນ 4 ບຸກຂອງຊາວໜຸ່ມ, 3 ດີ 4 ຮູ້ ຂອງເຍົາວະຊົນ ຕິດພັນກັບການປະຕິບັດຂໍ້ແຂ່ງຂັນຮັກຊາດ ແລະ ພັດທະນາ.
ຈາກນັ້ນ, ບັນດາສະຫາຍຜູ້ແທນກອງປະຊຸມ ໄດ້ຍົກສູງຄວາມຮັບຜິດຊອບເສີມຂະຫຍາຍສິດ ປະຊາທິປະໄຕ ເລືອກເອົາ ຄຊປປລ ສະໄໝທີ IX ຊຶ່ງບັນດາສະຫາຍ ລ້ວນແລ້ວແຕ່ໄດ້ຜ່ານການທົດສອບ ແລະ ເຕີບໃຫຍ່ໃນຂະບວນການວຽກງານຕົວຈິງ ຂອງຊາວໜຸ່ມ ແມ່ນຜູ້ທີ່ມີບົດຮຽນໃນການເຄື່ອນໄຫວ ນຳພາຕົວຈິງຮັບປະກັນລັກສະນະສືບທອດປ່ຽນແທນ ແລະ ໄດ້ຮັບຄວາມໄວ້ເນື້ອເຊື່ອໃຈຈາກຊາວໜຸ່ມ, ເຍົາວະຊົນລາວ ບັນດາເຜົ່າໃນທົ່ວປະເທດ ກໍຄືກອງປະຊຸມເພື່ອເປັນແບບຢ່າງນຳພາຊາວໜຸ່ມ, ເຍົາວະຊົນໃນການພັດທະນາຕົນເອງ, ຄອບຄົວ, ການຈັດຕັ້ງ ແລະ ປະເທດຊາດ. ບັນດາຜູ້ແທນກອງປະຊຸມ ໄດ້ພ້ອມກັນໃຊ້ສິດຂອງຕົນປ່ອນບັດເລືອກເອົາ ຄຊປປລ ສະໄໝທີ IX ບົນພື້ນຖານຫຼັກການລວມສູນປະຊາທິປະໄຕ ແລະ ຖືກຕ້ອງສອດຄ່ອງກັບມາດຖານເງື່ອນໄຂ ທີ່ກໍານົດໄວ້. ມີບັນດາຜູ້ແທນສະໝັກລົງເລືອກຕັ້ງ ຄຊປປລ ສະໄໝທີ IX ທັງໝົດ 67 ສະຫາຍ ຍິງ 17 ສະຫາຍ. ກອງປະຊຸມຄັ້ງປະຖົມມະລືກໄດ້ເຫັນດີເປັນເອກະສັນເລືອກຕັ້ງເອົາ ຄຊປປລ 13 ສະຫາຍ ຍິງ 3 ສະຫາຍ ໂດຍເລືອກເອົາສະຫາຍ ທອງລີ ສີສຸລິດ ເປັນເລຂາ ຄຊປປລ, ສະຫາຍ ສຸລິຍາ ແກ້ວພິລາວົງ, ສະຫາຍ ນາງ ມີນາ ສີວິໄລ, ສະຫາຍ ນາງ ປານີ ກິນດາວົງ ເປັນຮອງເລຂາ, ເລືອກເອົາສະຫາຍ ສຸລິຍາ ແກ້ວພິລາວົງ ເປັນປະທານກວດກາ ຄຊປປລ, ສະຫາຍ ແກ້ວອຸດອນ ແສງມະນີວົງ ເປັນຮອງປະທານ. ໃນນັ້ນ, ເລືອກເອົາສະຫາຍ ນາງ ແສງອ່ອນ ປວງມະນີ, ສະຫາຍ ພົນໂທ ບຸນທັນ ຟອງປະດິດ, ສະຫາຍ ອຸດົມລິດ ຈັນທະຈັກ ເປັນກໍາມະການກວດກາ.
 |
ໂອກາດນີ້, ສະຫາຍ ບຸນທອງ ຈິດມະນີ ໄດ້ໃຫ້ກຽດໂອ້ລົມ ເນັ້ນໜັກຕໍ່ຄະນະບໍລິຫານງານຊາວໜຸ່ມຊຸດໃໝ່ຮີບຮ້ອນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ເທື່ອນີ້ ເປັນແຜນງານ, ໂຄງການ ແລະ ຫັນເປັນນິຕິກຳລະອຽດ; ຈັດຕັ້ງເຜີຍແຜ່, ເຊື່ອມຊຶມ ໃນຄະນະບໍລິຫານງານຊາວໜຸ່ມແຕ່ລະຂັ້ນ, ສະມາຊິກຊາວໜຸ່ມ, ເຍົາວະຊົນ ໃຫ້ທົ່ວເຖິງ ເພື່ອສ້າງຄວາມຮັບຮູ້-ເຂົ້າໃຈ ແລະ ເປັນເອກະພາບຕໍ່ເນື້ອໃນ, ຄາດໝາຍສູ້ຊົນໃນຕໍ່ໜ້າ ເພື່ອສ້າງທັດສະນະ ແລະ ຄວາມຮັບຜິດຊອບໃນການນໍາພາຍູ້ຂະບວນການຕົວຈິງໃຫ້ມີການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ໃນວຽກງານຊາວໜຸ່ມ-ເຍົາວະຊົນລາວ; ໃຫ້ຮີບຮ້ອນແບ່ງວຽກ, ແບ່ງຄວາມຮັບຜິດຊອບ ພາຍໃນ ຄຊປປລ ກໍຄື ຄະນະນໍາ ຂອງສູນກາງຊາວໜຸ່ມ ໃຫ້ລະອຽດ, ຈະແຈ້ງ ເພື່ອນໍາພາ-ຊີ້ນໍາວຽກງານຊາວໜຸ່ມ, ເຍົາວະຊົນ ກໍຄືການປະຕິບັດມະຕິກອງປະຊຸມເທື່ອນີ້ເຂົ້າສູ່ຂະບວນການຕົວຈິງໂດຍໄວ; ຕ້ອງປົກປັກຮັກສາ ແລະ ຮັດແໜ້ນຄວາມສາມັກຄີ ພາຍໃນ ຄຊປປລ, ເປັນຫຼັກແຫຼ່ງນໍາພາເຕົ້າໂຮມຄວາມສາມັກຄີຄະນະຊາວໜຸ່ມແຕ່ລະຂັ້ນ-ຄວາມສາມັກຄີ ເປັນປຶກແຜ່ນໃນຖັນແຖວສະມາຊິກຊາວໜຸ່ມປະຊາຊົນ ປະຕິວັດລາວ, ໄວໜຸ່ມ ແລະ ເຍົາວະຊົນລາວບັນດາເຜົ່າ; ເຊີດຊູຄວາມເປັນເຈົ້າການຮັບຜິດຊອບຕໍ່ໜ້າທີ່ການເມືອງ, ທຸ່ມເທເຫື່ອແຮງ, ສະຕິປັນຍາ, ຄວາມຮູ້-ຄວາມສາມາດ, ມີຄວາມເສຍສະຫຼະ ເພື່ອເຮັດສໍາເລັດໜ້າທີ່ ທີ່ຖືກມອບໝາຍ; ຄະນະບໍລິຫານງານສູນກາງຊາວໜຸ່ມ ຍາມໃດກໍຕ້ອງຢຶດໝັ້ນ ແລະ ປະຕິບັດຢ່າງເຂັ້ມງວດຕໍ່ບັນດາຫຼັກການ, ລະບອບແບບແຜນນຳພາ-ວິທີເຮັດວຽກຕາມກົດລະບຽບ ແລະ ກົດໝາຍຂອງຕົນ; ຮັບຜິດຊອບໂດຍກົງຕໍ່ຜົນໄດ້-ຜົນເສຍ ຕໍ່ວຽກງານຊາວໜຸ່ມ-ເຍົາວະຊົນ; ເດັດຂາດແກ້ໄຂ ຕໍ່ການປະພຶດແບບອາດຍາສິດ, ຂາດຄວາມເປັນແບບຢ່າງ, ຕ້ອງສ້າງໄດ້ຄວາມເຊື່ອໝັ້ນຂອງມະຫາຊົນ ຕໍ່ການນໍາພາລວມ ແລະ ຕໍ່ແຕ່ລະສະຫາຍໃນ ຄຊປປລ; ບັນດາສະຫາຍ ຄຊປປລ ຊຸດໃໝ່ ຕ້ອງຕັ້ງໜ້າຄົ້ນຄວ້າຮໍ່າຮຽນ, ຝຶກຝົນຫຼໍ່ຫຼອມຕົນເອງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ຄວາມເປັນແບບຢ່າງນໍາໜ້າດ້ານຕ່າງໆ; ມີຄວາມສາມັກຄີຮັກແພງ ຈິງໃຈຊ່ວຍເຫຼືອກໍ່ສ້າງຊຶ່ງກັນ ແລະ ກັນ ໃຫ້ມີຄວາມເຂັ້ມແຂງ, ດໍາລົງຊີວິດປອດໃສ, ປະຢັດ, ຕ້ານການຟຸ່ມເຟືອຍ, ບໍ່ສ້າງຄວາມເສຍຫາຍມາສູ່ວຽກງານຊາວໜຸ່ມ-ເຍົາວະຊົນ, ກະທົບເຖິງບົດບາດ ແລະ ຄວາມເຊື່ອໝັ້ນ ຕໍ່ຕົນເອງ ແລະ ການຈັດຕັ້ງ.
(ຂ່າວ-ພາບ: ວັນເພັງ)
ຄໍາເຫັນ