 |
ກອງປະຊຸມຄັ້ງນີ້ ເພື່ອທາບທາມ ແລະ ລະດົມຄວາມຄິດ ກ່ຽວກັບການສ້າງຕະຫຼາດກາງຄືນ ຢູ່ເທດສະບານເມືອງສາລະວັນ ໃນການສ້າງພື້ນທີ່ການຄ້າຂາຍທີ່ເປັນລະບຽບ, ສົ່ງເສີມສິນຄ້າທ້ອງຖິ່ນ, ເພີ່ມສີສັນໃຫ້ແກ່ເທດສະບານ ແລະ ສ້າງຈຸດໝາຍປາຍທາງໃໝ່ໃຫ້ແກ່ນັກທ່ອງທ່ຽວ ເພາະປັດຈຸບັນ ການຄ້າຂາຍປະເພດອາຫານ, ເຄື່ອງດື່ມ ແລະ ເສື້ອຜ້າ ຕາມແຄມທາງ ແລະ ທາງຮ່ອມຕ່າງໆ ຍັງມີລັກສະນະກະແຈກກະຈາຍ ແລະ ຂາດການຈັດລະບຽບ ລວມສູນ.
ສໍາລັບຈຸດທີ່ຕັ້ງຕະຫຼາດກາງຄືນ ໄດ້ສະເໜີ 4 ຈຸດ ຄື: ເສັ້ນທາງເລກທີ 15 ຈາກສີ່ແຍກທາງໄປໂຮງໝໍແຂວງ ຫາ ຂົວຂ້າມນ້ຳເຊໂດນ ແລະ ຜາມໄຊ; ຕະຫຼາດເອບີໂຊກ; ເດີ່ນສວນໄມ້ດູ່ຫຼັງເດີ່ນອົງແກ້ວ ແລະ ຄິວລົດ ເມສາລະວັນ.
ໃນບັນດາຈຸດດັ່ງກ່າວ ເຫັນວ່າ ເສັ້ນທາງຈາກສີ່ແຍກທາງໄປໂຮງໝໍແຂວງ ຜ່ານສີ່ແຍກຫ້ອງວ່າການແຂວງ, ສີ່ແຍກທາງໄປ ປກສ ແຂວງ ແລະ ລວງໄປທາງຊຽງຍືນ ເປັນຈຸດທີ່ເໝາະສົມ, ສ່ວນສິນຄ້າທີ່ ຈະນຳມາຈຳໜ່າຍ ຈະເນັ້ນໃສ່ ຫັດຖະກຳ-ຈັກສານ, ອາຫານປຸງສຸກ, ເຄື່ອງດື່ມ, ເສື້ອຜ້າ, ເຄື່ອງເທດ, ເຄື່ອງປະດັບ ແລະ ເຟີນີເຈີ.
ການສ້າງຕະຫຼາດກາງຄືນ ຄາດວ່າຈະສ້າງຜົນດີຕໍ່ເສດຖະກິດ, ການທ່ອງທ່ຽວ, ຈະເປັນຊ່ອງທາງເພີ່ມອາຊີບ ແລະ ສ້າງລາຍຮັບໃຫ້ປະຊາຊົນ, ເພີ່ມມູນຄ່າຫັດຖະກຳທ້ອງຖິ່ນ, ຈະເປັນເວທີເຜີຍແຜ່ສິລະປະ, ດົນຕີ, ການແຕ່ງກາຍ, ອາຫານ ແລະວັດທະນະທຳທີ່ເປັນເອກະລັກຂອງແຂວງສາລະວັນ.
ພາບ-ຂ່າວ: ສ.ພະຈັນ
ຄໍາເຫັນ