ວັນທີ 9 ພຶດສະພາ 2024, ແຂວງສາລະວັນ ໄດ້ຈັດພິທີປາຖະກະຖາ ວັນກຳມະກອນສາກົນ ຄົບຮອບ 138 ປີ ( ວັນທີ 1 ພືດສະພາ 1886 - 1 ພຶດສະພາ 2024) ຕິດພັນກັບການບໍລິຈາກເລືອດເພື່ອຊ່ວຍເຫຼືອສັງຄົມ ພາຍໃຕ້ຄຳຂວັນ" ຄວາມຍຸດຕີທຳໃນສັງຄົມ ແລະວຽກທີ່ມີຄຸນຄ່າເປັນທຳສຳລັບທຸກຄົນ" ໂດຍເປັນກຽດປາຖະກະຖາຂອງ ທ່ານ ຄຳເຫຼັກ ອິນດາວົງ ອາດີດກຳມະການພັກແຂວງ ອາດີດປະທານຄະນະບໍລິຫານງານສະຫະພັນກຳມະບານແຂວງ, ມີຄະນະປະຈຳພັກແຂວງ, ກຳມະການພັກແຂວງ, ອາດີດພະນັກງານບຳນານ, ສະມາຊິກກຳມະບານຈາກຮາກຖານອ້ອມຂ້າງແຂວງເຂົ້າຮ່ວມ.
ທ່ານ ຄຳເຫຼັກ ອິນດາວົງ ໄດ້ຍົກໃຫ້ເຫັນປະຫວັດຄວາມເປັນມາຂອງວັນກໍາມະກອນສາກົນ ວັນທີ 1 ພຶດສະພາ ເປັນວັນກຳມະກອນສາກົນ ທີ່ໄດ້ໝູນວຽນມາອີກວາລະໜຶ່ງ ຊຶ່ງປີນີ້ຄົບຮອບ 138 ປີ ເປັນວັນທີ່ມີຄວາມໝາຍສຳຄັນຢ່າງຍິ່ງສຳລັບຊົນຊັ້ນກຳມະກອນໃນທົ່ວໂລກ ເພາະເປັນມື້ແຫ່ງການເຕົ້າໂຮມພະລັງຂອງຊົນຊັ້ນກໍາມະກອນ ຕໍ່ສູ້ກັບຊົນຊັ້ນນາຍທຶນ ເພື່ອທວງເອົາຜົນປະໂຫຍດອັນຊອບທຳຂອງຕົນຢູ່ໃນທົ່ວໂລກ, ໃນປີ 1764 ໄດ້ເກີດມີຂະບວນຕໍ່ສູ້ດຸເດືອດຂອງກໍາມະກອນ ຢູ່ປະເທດອັງກິດ ເພື່ອທວງເອົາຜົນປະໂຫຍດ ແລະ ແລກເອົາຄ່າແຮງງານ ຫຼື ເງິນເດືອນທີ່ບໍ່ໄດ້ຮັບຄວາມເອົາໃຈໃສ່ ດ້ານສະຫວັດດີການສັງຄົມແຕ່ຢ່າງໃດ ເຮັດໃຫ້ຊີວິດການເປັນຢູ່ຂອງກຳມະກອນ ມີຄວາມຫຍຸ້ງຍາກລຳບາກ. ຂະບວນລຸກຮື້ຂຶ້ນຂອງກຳມະກອນໄດ້ ແຜ່ລາມເປັນບໍລິເວນກວ້າງໄປທົ່ວໂລກ. ມາຮອດວັນທີ 1 ພຶດສະພາ 1886 ໄດ້ມີຂະບວນນັດຢຸດງານ ຄັ້ງໃຫຍ່ຂອງກຳມະກອນໃນໂຮງຈັກ, ໂຮງງານ ຈຳນວນ 5 ພັນກວ່າແຫ່ງ ໃນອາເມລິກາ ໂດຍໄດ້ທວງ ໃຫ້ນາຍທຶນຕ້ອງຍອມຫຼູດຜ່ອນເວລາເຮັດວຽກມື້ໜຶ່ງບໍ່ໃຫ້ເກີນ 8 ຊົ່ວໂມງ, 8 ຊົ່ວໂມງໃຫ້ໄດ້ ພັກຜ່ອນ ແລະ 8 ຊົ່ວໂມງ ໃຫ້ໄດ້ມີໂອກາດຮໍ່າຮຽນ, ທວງໃຫ້ນາຍທືນເພີ່ມເງິນເດືອນ ແລະ ເອົາໃຈໃສ່ ເບິ່ງແຍງຊີວິດການເປັນຢູ່ຂອງກໍາມະກອນ, ຈາກສະພາບການຄືແນວນັ້ນ, ມາໃນວັນທີ 14 ກໍລະກົດ ປີ 1889 ກອງປະຊຸມພັກກອມມູນິດສາກົນຄັ້ງທີ II ໄດ້ໄຂຂຶ້ນຢູ່ທີ່ນະຄອນຫຼວງປາຣີ (ປະເທດຝັ່ຣງ),ທີ່ປະຊຸມໄດ້ຜ່ານໂຄງການດໍາເນີນງານສໍາຄັນຄື: ຊົນຊັ້ນກໍາມະກອນສາມັກຄີຕໍ່ສູ້ແມ່ນທວງເອົາສິດ ແລະ ຜົນປະໂຫຍດຂອງຕົນຢູ່ບັນດາປະເທດທຶນນິຍົມ ແລະ ລັດເຊຍໂດຍໂຄ່ນລົ້ມລະບອບນາຍທຶນ ເພິ່ອປະຕິບັດຄໍາຂັວນ“ມື້ໜຶ່ງເຮັດວຽກ 8 ຊົ່ວໂມງ ແລະ ກໍານົດເອົາວັນທີ 1 ພຶດສະພາ 1886 ເປັນວັນກໍາມະກອນສາກົນ”, ນັບແຕ່ນັ້ນມາ “ວັນທີ 1 ພຶດສະພາຂອງທຸກໆປີຈຶ່ງໄດ້ກາຍເປັນວັນບຸນໃຫຍ່ຂອງຊົນຊັ້ນກໍາມະກອນໃນທົ່ວໂລກ”.
ພິທີກໍ່ໄດ້ມີກິດຈະກຳບໍລິຈາກເລືອດເພື່ອຊ່ວຍເຫຼືອສັງຄົມ ແລະກິດຈະກຳຖາມ-ຕອບຄວາມຮູ້ຮອບຕົວຕື່ມອີກ.ພາບ-ຂ່າວ: ທິດລານີ ໂຄດໂຍທາ.
ຄໍາເຫັນ