ວັນທີ 20 ພະຈິກ ຜ່ານມາ ທີ່ຫ້ອງປະຊຸມຫ້ອງວ່າການແຂວງສາລະວັນ; ໄດ້ຈັດກອງປະຊຸມປຶກສາຫາລື ກະກຽມຈັດຕັ້ງປາຖະກະຖາ ວັນເກີດປະທານ ຄໍາໄຕ ສີພັນດອນ ອະດີດປະທານພັກປະທານປະເທດ ແຫ່ງ ສປປ ລາວຄົບຮອບ 100 ປີ (8 ກຸມພາ 1924-8 ກຸມພາ 2024) ໂດຍການເປັນປະທານຂອງ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງຜູ້ຊີ້ນໍາວຽກງານການເມືອງ-ແນວຄິດ, ວຽກພັກ-ພະນັກງານ ທັງເປັນຫົວໜ້າຄະນະຊີ້ນໍາ, ມີບັນດາທ່ານຄະນະປະຈໍາພັກແຂວງ, ກຳມະການພັກແຂວງ, ຄະນະນຳ 8 ເມືອງ, ຫົວໜ້າ-ຮອງຫົວໜ້າພະແນກການທີ່ກ່ຽວຂ້ອງ ເຂົ້າຮ່ວມ.
ທ່ານ ຈັນສະໝອນ ພົມມະແສງ ຄະນະປະຈໍາພັກແຂວງ ຫົວໜ້າໂຄສະນາອົບຮົມແຂວງໄດ້ຜ່ານບົດລາຍງານການກະກຽມ ປາຖະກະຖາ ວັນເກີດ ທ່ານປະທານ ຄຳໄຕ ສີພັນດອນ ຄົບຮອບ 100 ປີ ຊຶ່ງແຕ່ລະພາກສ່ວນກໍໄດ້ເຄື່ອນໄຫວຕາມພາລະບົດບາດຂອງຕົນຢ່າງແຂງແຮງໂດຍສະເພາະແມ່ນຄະນະໂຄສະນາອົບຮົມແຂວງ ໄດ້ມີການປະສານສົມທົບກັບຄະນະໂຄສະນາອົບຮົມສູນກາງພັກ ເລື່ອງເນື້ອໃນເອກະສານປາຖະກະຖາ, ໄດ້ປະສານກັບບັນດາເມືອງໃນການສ້າງນິຕິກຳເປັນຂອງເມືອງມາຮອດນີ້ສຳເລັດແລ້ວ 2 ເມືອງ (ເມືອງຕຸ້ມລານ ແລະເມືອງເລົ່າງາມ), ໂຮງຮຽນການເມືອງ-ການປົກຄອງ ໄດ້ເອົາໃຈໃສ່ສັງລວມການເຄື່ອນໄຫວຂອງທ່ານປະທານ ຄຳໄຕ ສີພັນດອນ ທີ່ລົງມາເຄື່ອນໄຫວຢູ່ພາຍໃນແຂວງສາລະວັນໃນແຕ່ລະໄລຍະ, ແນວລາວສ້າງຊາດກໍໄດ້ເຄື່ອນໄຫວນໍາພາສ້າງຂະບວນການອອກແຮງງານລວມໃນຂອບເຂດ ເທດສະບານແຂວງ, ເຄື່ອນໄຫວເຕົ້າໂຮມຄວາມສາມັກຄີປະຊາຊົນບັນດາເຜົ່າຢ່າງຕໍ່ເນື່ອງ, ວຽກງານ ປກຊ-ປກສ ກໍໄດ້ມີການເຄື່ອນໄຫວຈັດຕັ້ງເວນຍາມຕາມຈຸດສຳຄັນຕ່າງໆ ພາຍໃນເທດສະບານແຂວງ, ຕາມຈຸດຫຼໍ່ແຫຼມບໍລິເວນຂອບເຂດຊາຍແດນລະຫວ່າງ ແຂວງກັບແຂວງ ແລະພາຍໃນແຂວງ ອັນພົ້ນເດັ່ນ ແມ່ນໄດ້ແຂ່ງຂັນກັນສະຫຼຸບສັງລວມວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກໍໄດ້ສຸມໃສ່ພັດທະນາແຫຼ່ງທ່ອງທ່ຽວ ແຫ່ງຕ່າງໆ ໃຫ້ມີຄວາມສວຍສົດງົດງາມເປັນຕົ້ນແມ່ນແຫຼ່ງທ່ອງທ່ຽວຕາດເລາະ ໄດ້ມອບໝາຍໃຫ້ຜູ້ມີທຶນຮອນເປັນຜູ້ບູລະນະປົກປັກຮັກສາໂດຍແມ່ນພາກລັດຂອງພວກເຮົາເປັນຜູ້ຄຸ້ມຄອງໂດຍກົງ ໄດ້ລົງເຄື່ອນໄຫວຊຸກຍູ້ບັນດາເມືອງໃນທົ່ວແຂວງຫ້າງຫາກະກຽມກຳນົດຈຸດທ່ອງທ່ຽວ, ນອກນັ້ນຍັງໄດ້ເກັບກຳຂໍ້ມູນການເຄື່ອນໄຫວຂອງທ່ານປະທານ ຄຳໄຕ ສີພັນດອນ ທີ່ມາເຄື່ອນໄຫວຢູ່ແຂວງສາລະວັນກໍຄືການເຄື່ອນໄຫວປະຕິວັດ ແລະຊີວິດຕົວຈິງຂອງເພິ່ນ ເພື່ອກະກຽມສ້າງເປັນສາລະຄະດີສັ້ນ ແລະ ຂຽນຂ່າວສັ້ນອອກທາງວິທະຍຸ ແລະ ໂທລະພາບ ແລະ ໜັງສືພິມ, ອົງການຈັດຕັ້ງມະຫາຊົນ ກໍໄດ້ອອກແຮງເຄື່ອນໄຫວຕາມພາລະບົດບາດ, ສິດໜ້າທີ່ຂອງຕົນຢ່າງເປັນຂະບວນ ເຮັດສຳເລັດໃນການຈັດຊຸດຝຶກອົບຮົມວຽກງານການເມືອງ-ແນວຄິດໃຫ້ສະມາຊິກຂອງຕົນ, ສຸມໃສ່ສ້າງຂະບວນດ້ານຕ່າງໆ ເພື່ອກະກຽມໃຫ້ແກ່ການດຳເນີນກອງປະຊຸມໃຫຍ່ຂັ້ນຂອງຕົນ, ສຳເລັດການເປີດຮ້ານວາງສະແດງ ແລະຈຳໜ່າຍຜະລິດຕະພັນເອື້ອຍນ້ອງແມ່ຍິງແຂວງສາລະວັນ, ບັນດາເມືອງໃນທົ່ວແຂວງ ກໍໄດ້ມີຄວາມເປັນເຈົ້າການເຄື່ອນໄຫວວຽກງານຢ່າງແຂງແຮງ ແລະ ເປັນຂະບວນການເກັບມ້ຽນເຂົ້ານາປີຂອງປະຊາຊົນ, ຂະບວນການຮັກສາອະນາໄມເສັ້ນທາງບ້ານຕໍ່ບ້ານ, ຂະບວນການຈັດເກັບລາຍຮັບເຂົ້າງົບປະມານ ຂະບວນການຮຽນການສອນ ແລະ ກິລາກາຍຍະກຳ, ຂະບວນການເຜີຍແຜ່ເຊື່ອມຊຶມບັນດານິຕິກຳຕ່າງໆ ເພື່ອກຽມພ້ອມໃນການດຳເນີນກອງປະຊຸມໃຫຍ່ 3 ຂັ້ນຂອງພັກ, ຂະບວນການປູກ-ການລ້ຽງຂອງຄອບຄົວພະນັກງານ ແລະປະຊາຊົນ.ຈາກນັ້ນຜູ້ເຂົ້າຮ່ວມ ກໍໄດ້ມີຄຳເຫັນແລກປ່ຽນ, ສົນທະນາປຶກສາຫາລື ກ່ຽວກັບການກໍານົດບັນດາກິດຈະກໍາໃນການສະເຫຼີມສະຫຼອງ ເພື່ອໃຫ້ແທດເໝາະກັບສະພາບລວມຂອງແຂວງ ເປັນຕົ້ນແມ່ນການຈັດຕັ້ງປາຖະກະຖາ ແລະບັນດາກິດຈະກຳຖາມ-ຕອບຄວາມຮູ້ກ່ຽວກັບຊີວິດການເຄື່ອນໄຫວຂອງເພິ່ນ ແລະ ກິດຈະກໍາອື່ນໆ.
ຂ່າວ: ລັດຕະນາ ແສງສຸວັນ
ຄໍາເຫັນ