ສະເຫຼີມສະຫຼອງ ວັນເດັກນ້ອຍສາກົນ ວັນປູກຕົ້ນໄມ້ແຫ່ງຊາດ ແລະ ວັນສິ່ງແວດລ້ອມໂລກ

ໃນພິທີ, ທ່ານ ນາງ ຄໍາຫຼ້າ ວິສຸດທິວົງ ຄະນະປະຈໍາພັກເມືອງ ຮອງປະທານຄະນະກຳມະການປົກຄອງເມືອງ ( ຜູ້ຊີ້ນໍາວຽກງານວັດທະນະທຳ - ສັງຄົມຂອງເມືອງ ) ໄດ້ໃຫ້ກຽດ ກ່າວເຖິງຄວາມໝາຍຄວາມສຳຄັນຂອງທັງ 3 ວັນດັ່ງກ່າວ ເຊິ່ງເປັນວັນທີ່ມີຄວາມ

ໝາຍລະດັບຊາດ ແລະ ສາກົນ. ວັນເດັກນ້ອຍສາກົນແມ່ນໂອກາດສຳຄັນໃນການປູກຈິດສຳນຶກໃຫ້ທົ່ວສັງຄົມ ເອົາໃຈໃສ່ເບິ່ງແຍງ, ປົກປ້ອງ ແລະ ພັດທະນາເດັກນ້ອຍ ເຊິ່ງເປັນໜໍ່ແໜງ ແລະ ເປັນອະນາຄົດຂອງຊາດ ໃຫ້ໄດ້ຮັບການສຶກສາ ແລະ ການຂະຫຍາຍຕົວຢ່າງສົມບູນທັງຮ່າງກາຍ ແລະ ຈິດໃຈ. ວັນປູກຕົ້ນໄມ້ແຫ່ງຊາດ ແລະ ວັນສິ່ງແວດລ້ອມໂລກ ແມ່ນການຮຽກຮ້ອງໃຫ້ທຸກພາກສ່ວນຮ່ວມແຮງຮ່ວມໃຈກັນ ປົກປັກຮັກສາທຳມະຊາດ, ເພີ່ມເນື້ອທີ່ສີຂຽວ ດ້ວຍການປູກຕົ້ນໄມ້ ແລະ ຄຸ້ມຄອງສິ່ງແວດລ້ອມໃຫ້ມີຄວາມຍືນຍົງ ເພື່ອຮັບມືກັບການປ່ຽນແປງສະພາບພູມອາກາດ.

ການສ້າງສິ່ງແວດລ້ອມທີ່ດີ ແລະ ສີຂຽວງົດງາມໃນມື້ນີ້ ກໍເພື່ອເປັນການສ້າງຮາກຖານ ແລະ ອະນາຄົດທີ່ສົດໃສ ໃຫ້ແກ່ລູກຫຼານ ແລະ ເດັກນ້ອຍໃນມື້ໜ້າ.

ພ້ອມນີ້ພາຍໃນງານໄດ້ມີກິດຈະກຳຕ່າງໆ ທີ່ສ້າງສັນ ແລະ ເຕັມໄປດ້ວຍຄວາມຮູ້ ເປັນຕົ້ນແມ່ນ ການສະແດງສິລະປະ-ວັນນະຄະດີ ຈາກນ້ອງໆນັກຮຽນ, ການຫຼິ້ນເກມຕອບຄຳຖາມຊີງຂອງຂວັນ ແລະ ການມອບຂອງຂວັນລາງວັນທີ່ໄດ້ຈາກການແຂ່ງຂັນກິລາມວນຊົນ, ພິທີຮ່ວມກັນປູກຕົ້ນໄມ້ດູ່ ຢູ່ບໍລິເວນອ້ອມຮອບສວນວັດທະນະທຳຂອງເມືອງ, ພ້ອມທັງຍ່າງເພື່ອສຸຂະພາບ ແຕ່ສວນວັດທະນະທຳເມືອງ ມາຫາສະໂມສອນເມືອງ ຕິດພັນກັບການຈັດຕັ້ງປະຕິບັດໂຄງການ ຊາວໜຸ່ມ - ເຍົາວະຊົນ ກັບສິ່ງແວດລ້ອມ ດ້ວຍການເກັບຂີ້ເຫຍື່ອຕະຫຼອດໄລຍະການຍ່າງ ເພື່ອການອະນຸລັກສິ່ງແວດລ້ອມໃຫ້ມີຄວາມສະອາດຈົບງາມ, ພ້ອມທັງການໂຄສະນາການປະຕິບັດຫຼັກການ 5 ປໍ ເພື່ອປ້ອງກັນ ແລະ ສະກັດກັ້ນການລະບາດຂອງພະຍາດໄຂ້ຍຸງລາຍ.

ງານສະເຫຼີມສະຫຼອງໃນຄັ້ງນີ້ ບໍ່ພຽງແຕ່ສ້າງຮອຍຍິ້ມ ແລະ ຄວາມມ່ວນຊື່ນໃຫ້ແກ່ເດັກນ້ອຍເທົ່ານັ້ນ, ແຕ່ຍັງເປັນການປູກຝັງຈິດສຳນຶກທີ່ດີໃຫ້ແກ່ຊາວໜຸ່ມ, ເຍົາວະຊົນ ແລະ ປະຊາຊົນທຸກຄົນ ໃຫ້ຫັນມາຮັກແພງທຳມະຊາດ ແລະ ຮ່ວມກັນສ້າງສັງຄົມທີ່ໜ້າຢູ່ຢ່າງຍືນຍົງຕະຫຼອດໄປ.ພາບ - ຂ່າວ: ສີລິວັນ ທອງຄໍາສະຫວັນ