ສະຫະພັນລັດຖະສະພາສາກົນ ແມ່ນອົງການລັດຖະສະພາລະດັບໂລກ ທີ່ມີສະມາຊິກທັງໝົດ 181 ປະເທດ, ມີສະມາຊິກລັດຖະສະພາທົ່ວໂລກ 46,000 ຄົນ ໃນນັ້ນສະມາຊິກລັດຖະສະພາເພດຍິງກວມເອົາ 27,2% ແລະ ມີອົງການຈັດຕັ້ງສາກົນ ຫຼາຍກວ່າ 15 ອົງການທີ່ເປັນພາຄີ. ຈຸດປະສົງ ເພື່ອເຮັດວຽກຮ່ວມກັບລັດຖະສະພາ ແລະ ບັນດາສະມາຊິກລັດຖະສະພາ, ເພື່ອຕອບສະໜອງຄວາມຮຽກຮ້ອງຕ້ອງການ ແລະ ຄວາມມຸ່ງມາດປາຖະໜາ ຂອງປະຊາຊົນ ແລະ ເປັນເວທີສົ່ງເສີມສັນຕິພາບ, ປະຊາທິປະໄຕ, ສິດທິມະນຸດ ແລະ ຄວາມສະເໝີພາບຍິງ-ຊາຍ, ການສ້າງຄວາມເຂັ້ມແຂງແກ່ຊາວໜຸ່ມ, ການແກ້ໄຂບັນຫາການປ່ຽນແປງດິນຟ້າອາກາດ ແລະ ການພັດທະນາແບບຍືນຍົງ.
ໃນກອງປະຊຸມສະຫະພັນລັດຖະສະພາສາກົນ ຄັ້ງທີ 129 ແລະ ກອງປະຊຸມສະມັດຊາໃຫຍ່ສະຫະປະຊາຊາດໃນ 2018, ໄດ້ກໍານົດເອົາ ວັນທີ 30 ມິຖຸນາ ຂອງທຸກປີ ເປັນວັນລັດຖະສະພາໂລກຂອງທຸກປະເທດສະມາຊິກ IPU ເພື່ອເປັນໂອກາດລະລຶກ ແລະ ຫວນຄືນການປະຕິບັດໜ້າທີ່ ໃນຖານະເປັນອົງການຕົວແທນແຫ່ງສິດ-ຜົນປະໂຫຍດ ແລະ ຄວາມມຸ່ງມາດປາຖະໜາຂອງປະຊາຊົນ ແລະ ປະກອບສ່ວນເຂົ້າໃນການສົ່ງເສີມສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ການຮ່ວມມື ເພື່ອການພັດທະນາແບບຍືນຍົງ ໃນທົ່ວໂລກ.
ນັບແຕ່ ສປປ ລາວ ໄດ້ເຂົ້າເປັນສະມາຊິກສະຫະພັນລັດຖະສະພາສາກົນ ໃນວັນທີ 4 ເມສາ 1990, ໄດ້ຕັ້ງໜ້າເຂົ້າຮ່ວມເຄື່ອນໄຫວຢ່າງຫ້າວຫັນ ໃນກອງປະຊຸມໃຫຍ່ ແລະ ກອງປະຊຸມລະດັບຕ່າງໆຂອງສະຫະພັນລັດຖະສະພາສາກົນ ຊຶ່ງເປັນການເຜີຍແຜ່ນະໂຍບາຍ ແລະ ການພັດທະນາເສດຖະກິດ - ສັງຄົມ ຂອງ ສປປ ລາວ ຕໍ່ເວທີລັດຖະສະພາລະດັບໂລກ, ເຂົ້າຮ່ວມຄົ້ນຄວ້າ, ປຶກສາຫາລື ແລະ ສະແດງທັດສະນະທີ່ສ້າງສັນ ຕໍ່ການປົກປັກຮັກສາສັນຕິພາບ, ສະຖຽນລະພາບ ກໍຄືຄວາມໝັ້ນຄົງໃນພາກພື້ນ ແລະ ໃນໂລກ ຢ່າງເປັນເຈົ້າການ.
ພິເສດ, ໃນປີນີ້ ສະພາແຫ່ງຊາດລາວກໍໄດ້ກະກຽມເຂົ້າຮ່ວມກອງປະຊຸມປະທານລັດຖະສະພາໂລກ ຄັ້ງທີ 6 ແລະ ກອງປະຊຸມສຸດຍອດປະທານລັດຖະສະພາເພດຍິງໂລກ ຄັ້ງທີ 15 ຊຶ່ງຈະຈັດຂຶ້ນໃນທ້າຍເດືອນກໍລະກົດ 2025 ທີ່ເຈນີວາ, ປະເທດສະວິດ ຊຶ່ງຈະເປັນໂອກາດປຶກສາຫາລື ແລະ ແລກປ່ຽນຄຳຄິດຄຳເຫັນ ຮ່ວມກັບຜູ້ນຳຂັ້ນສູງຂອງລັດຖະສະພາທີ່ມາຈາກທຸກພາກພື້ນທົ່ວໂລກ.
ໃນໂອກາດດັ່ງກ່າວ, ທ່ານ ໄຊສົມພອນ ພົມວິຫານ ຕີລາຄາສູງຕໍ່ຄຳຂວັນຂອງວັນລັດຖະສະພາໂລກໃນປີນີ້ ທີ່ວ່າ: “ບັນລຸຄວາມສະເໝີພາບຍິງ - ຊາຍ, ການຈັດຕັ້ງປະຕິບັດເທື່ອລະບາດກ້າວ (Achieving gender equality, action by action)” ຊຶ່ງມີຄວາມສໍາຄັນຫຼາຍ ໃນການຍົກສູງບົດບາດຂອງແມ່ຍິງ ໃນການມີສ່ວນຮ່ວມຢ່າງເຕັມສ່ວນ, ມີປະສິດທິຜົນ ແລະ ໄດ້ຮັບໂອກາດເທົ່າທຽມກັນ ສຳລັບການເປັນການນໍາໃນທຸກລະດັບ, ທຸກໜ້າວຽກ ແລະ ທຸກຕຳແໜ່ງ ໃນການຕົກລົງບັນຫາສໍາຄັນພື້ນຖານທາງດ້ານການເມືອງ, ເສດຖະກິດ ແລະ ຊີວິດການເປັນຢູ່ໃນສັງຄົມ.
ສປປ ລາວ ໄດ້ໃຫ້ຄວາມສຳຄັນ ຕໍ່ຄວາມສະເໝີພາບຍິງ-ຊາຍ ດ້ວຍການເຊື່ອມສານເປົ້າໝາຍການພັດທະນາແບບຍືນຍົງ (SDGs) ໂດຍສະເພາະແມ່ນເປົ້າໝາຍທີ 5 (ບັນລຸຄວາມສະເໝີພາບລະຫວ່າງຍິງ-ຊາຍ, ສ້າງຄວາມເຂັ້ມແຂງໃຫ້ແກ່ແມ່ຍິງ ແລະເດັກຍິງທຸກຄົນ) ເຂົ້າໃນແຜນການພັດທະນາເສດຖະກິດ-ສັງຄົມແຫ່ງຊາດ 5 ປີ ແຕ່ລະໄລຍະ, ພ້ອມທັງເອົາໃຈໃສ່ຈັດຕັ້ງປະຕິບັດແຜນດຳເນີນງານແຫ່ງຊາດ ເພື່ອຄວາມສະເໝີພາບຍິງ-ຊາຍ (2021-2025) ໂດຍມີຈຸດປະສົງເພື່ອຮັບປະກັນສິດ ແລະ ການພັດທະນາສິດສະເໝີພາບຍິງ-ຊາຍ ລວມທັງຢຸດຕິທຸກຮູບການຈຳແນກຕໍ່ແມ່ຍິງໃນທຸກຂົງເຂດວຽກງານ, ຮັບປະກັນໃຫ້ແມ່ຍິງໄດ້ເຂົ້າຮ່ວມຢ່າງເຕັມສ່ວນໃນການເຄື່ອນໄຫວດ້ານການເມືອງ, ເສດຖະກິດ, ວັດທະນະທຳ-ສັງຄົມ ແລະ ຄອບຄົວ.
ອີງຕາມ ຜົນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ຜ່ານມາ, ພວກເຮົາມີສະມາຊິກສະພາແຫ່ງຊາດເພດຍິງ 36 ທ່ານ ເທົ່າກັບ 21.9% ແລະ ສະມາຊິກສະພາປະຊາຊົນຂັ້ນແຂວງທົ່ວປະເທດ ທີ່ເປັນເພດຍິງ 150 ທ່ານ ເທົ່າກັບ 30.48%, ໂດຍຖືກຈັດຢູ່ໃນອັນດັບ 111 ຂອງໂລກ ແລະ ເປັນອັນດັບ 4 ຂອງອາຊຽນ ຊຶ່ງໃນການເລືອກຕັ້ງທີ່ຈະມາເຖິງນີ້ ພວກເຮົາມີຄວາມຄາດຫວັງຢ່າງຍິ່ງວ່າ ຈະມີ ສສຊ ແລະ ສສຂ ເພີ່ມຫຼາຍຂຶ້ນ ເພື່ອສະແດງໃຫ້ເຫັນເຖິງບົດບາດສຳຄັນ ໃນການປະກອບສ່ວນຕໍ່ປະເທດຊາດຂອງເອື້ອຍນ້ອງແມ່ຍິງ ລວມທັງເຂົ້າຮ່ວມມີທັດສະນະຕໍ່ບັນຫາໃນພາກພື້ນ ແລະ ສາກົນ, ພ້ອມທັງສະໜັບສະໜູນດ້ານວິຊາການ ແລະ ງົບປະມານ ເຂົ້າໃນການສ້າງຄວາມເຂັ້ມແຂງໃຫ້ແກ່ແມ່ຍິງໃນທຸກດ້ານ, ສູ້ຊົນໃຫ້ຈໍານວນແມ່ຍິງທີ່ຈະເປັນສະມາຊິກສະພາແຫ່ງຊາດເພດຍິງ ໃນຊຸດທີ X ບັນລຸ 30% ຂອງຈໍານວນສະມາຊິກສະພາແຫ່ງຊາດທັງໝົດ.
(ຂ່າວ: ແສງຈັນ, ພາບ: ຕຸໄລເພັດ)
ຄໍາເຫັນ