ສະເຫຼີມສະຫຼອງວັນແມ່ຍິງລາວ ແລະ ເທດສະການອາຫານ

ໃນພິທີຄັ້ງນີ້ ທ່ານ ນາງ ແສງດາວັນ ວົງໄຊ ກໍາມະການຄະນະພັກ ປະທານສະຫະພັນແມ່ຍິງກະຊວງການຕ່າງປະເທດ ໄດ້ນໍາສະເໜີໂດຍຫຍໍ້ ກ່ຽວກັບ ປະຫວັດຄວາມເປັນມາ ແລະ ການເຕີບໃຫຍ່ຂະຫຍາຍຕົວຂອງການສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຕະຫຼອດໄລຍະ 71 ປີ ຜ່ານມາ ກໍຄື ມູນເຊື້ອອັນດີງາມຂອງສະຫະພັນແມ່ຍິງລາວ ແລະ ແມ່ຍິງລາວບັນດາເຜົ່າ. ພ້ອມນີ້, ທ່ານ ໄມທອງ ທໍາມະວົງສາ ກໍໄດ້ໃຫ້ກຽດກ່າວເປີດພິທີຢ່າງເປັນທາງການ ແລະ ໄດ້ໃຫ້ທິດຊີ້ນໍາຕໍ່ການເຄື່ອນໄຫວວຽກງານຂອງແມ່ຍິງ ໂດຍລວມ, ໂດຍສະເພາະ ຕໍ່ພະນັກງານເພດຍິງຂອງກະຊວງການຕ່າງປະເທດ ທີ່ຄວນສືບຕໍ່ເອົາໃຈໃສ່ຮັກສາມູນເຊື້ອອັນດີງາມຂອງແມ່ຍິງລາວ ກໍຄືການສືບຕໍ່ຈັດຕັ້ງປະຕິບັດຂໍ້ແຂ່ງຂັນ 3 ດີ ຕິດພັນກັບຂະບວນການຮັກຊາດ ແລະ ພັດທະນາ ແລະ ໄດ້ສະແດງຄວາມຊົມເຊີຍຕໍ່ບັນດາຜົນສໍາເລັດທີ່ເອື້ອຍນ້ອງແມ່ຍິງກະຊວງການຕ່າງປະເທດຍາດມາໄດ້ ໃນໄລຍະຜ່ານມາ.

ພ້ອມກັນນັ້ນ, ບັນດາຜູ້ເຂົ້າຮ່ວມ ໄດ້ຢ້ຽມຢາມຮ້ານວາງສະແດງຂອງແຕ່ລະໜ່ວຍສະຫະພັນແມ່ຍິງກະຊວງການຕ່າງປະເທດທີ່ມີການຈໍາໜ່າຍສິນຄ້າ, ຜະລິດຕະພັນ, ອາຫານ ແລະ ເຄື່ອງດື່ມຫຼາກຫຼາຍປະເພດ ຊຶ່ງໄດ້ສະແດງໃຫ້ເຫັນເຖິງຄຸນຄ່າຄວາມສໍາຄັນທາງດ້ານວັດທະນະທໍາຂອງລາວ ໂດຍສະເພາະແມ່ນພູມປັນຍາຂອງການປຸງແຕ່ງອາຫານລາວທີ່ເປັນເອກະລັກ ພ້ອມທັງສ່ອງແສງໃຫ້ເຫັນເຖິງຄວາມສາມັກຄີຮັກແພງ ແລະ ການສະໜັບສະໜູນຊ່ວຍເຫຼືອຊຶ່ງກັນ ແລະ ກັນຂອງເອື້ອຍນ້ອງແມ່ຍິງກະຊວງການຕ່າງປະເທດ.

ໃນໂອກາດດັ່ງກ່າວ, ໄດ້ມີການມອບຂອງຂວັນອວຍພອນໃຫ້ແກ່ພັນລະຍາການນໍາ ແລະ ພະນັກງານບໍານານເພດຍິງຂອງກະຊວງການຕ່າງປະເທດ ເພື່ອເປັນການສະແດງຄວາມຊົມເຊີຍ, ຮູ້ບຸນຄຸນ ແລະ ລະນຶກເຖິງຄຸນງານຄວາມດີໃນການປະກອບສ່ວນເຂົ້າໃນການປະຕິບັດໜ້າທີ່ວຽກງານຂອງກະຊວງການຕ່າງປະເທດ ຕະຫຼອດໄລຍະຜ່ານມາ. ຄຽງຄູ່ກັນນີ້, ກໍໄດ້ມີການມອບໃບກຽດຕິຄຸນ ໃຫ້ແກ່ ບັນດາຫົວໜ່ວຍທຸລະກິດ ຈໍານວນໜຶ່ງ ທີ່ໄດ້ປະກອບສ່ວນ ແລະ ໃຫ້ການສະໜັບສະໜູນໃນການຈັດງານຄັ້ງນີ້ອີກດ້ວຍ.

(ຂ່າວ: ກຕທ)