 |
ທ່ານ ສົມພົງ ມົງຄົນວິໄລ ກ່າວວ່າ: ອີງຕາມດໍາລັດຂອງນາຍົກລັດຖະມົນຕີ ວ່າດ້ວຍການຮັບຮອງ ແລະ ປະ ກາດໃຊ້ນະໂຍບາຍແຫ່ງຊາດ ເພື່ອຜູ້ອາຍຸສູງຢູ່ ສປປ ລາວ ໃນປີ 2004 ສະມາຄົມຜູ້ອາຍຸສູງ ນະຄອນຫຼວງວຽງຈັນ (ສອວ) ກໍໄດ້ຮັບການສ້າງຂຶ້ນໃນປີ 2011 ມາຮອດປັດຈຸບັນມີອາຍຸໄດ້ 5 ປີແລ້ວ ລວມສະມາຊິກທັງໝົດ 1,301 ຄົນ ຍິງ 841 ຄົນ ຢູ່ຂັ້ນນະຄອນຫຼວງມີ 622 ຄົນ ຍິງ 358 ຄົນ ແລະ ຢູ່ຂັ້ນເມືອງມີ 679 ຄົນ ຍິງ 483 ຄົນ ໃນ 4 ຕົວເມືອງຂອງນະຄອນຫຼວງວຽງຈັນ (ຈັນທະບູລີ, ໄຊເຊດຖາ, ສີໂຄດຕະບອງ ແລະ ສີສັດຕະນາກ) ສະມາຊິກສ່ວນໃຫຍ່ປະກອບດ້ວຍພະນັກງານບຳນານ ທີ່ມາຈາກຂະແໜງການຕ່າງໆ ຜູ້ເຂົ້າຮັບບຳນານທີ່ມາຈາກພາກສ່ວນປ້ອງກັນ ຊາດ-ປ້ອງກັນຄວາມສະຫງົບ ລວມທັງປະຊາຊົນ ແລະ ພໍ່ຄ້າ-ຊາວຂາຍທີ່ມີອາຍຸແຕ່ 60 ປີຂຶ້ນໄປ, ພາລະບົດບາດຫຼັກຂອງ ສອວ ແມ່ນເສີມສ້າງຄວາມສາມັກຄີພາຍໃນຜູ້ອາຍຸສູງ, ສົ່ງເສີມການຊ່ວຍເຫຼືອເບິ່ງແຍງຊຶ່ງກັນ ແລະ ກັນ ເປັນ ຕົ້ນແມ່ນຢູ່ພາຍໃນສະມາຊິກຜູ້ອາຍຸສູງ ເພື່ອປົກປ້ອງສິດ ແລະ ຜົນປະໂຫຍດອັນຊອບທຳຂອງຜູ້ອາຍຸສູງ.
 |
ການສະເຫຼີມສະຫຼອງວັນຜູ້ອາຍຸສູງແຫ່ງຊາດ ແລະ ວັນຜູ້ອາຍຸສູງສາກົນໃນປີນີ້ ແມ່ນໃນທ່າມກາງທີ່ປະຊາກອນໃນທົ່ວໂລກ ເວົ້າລວມທັງຢູ່ສປປລາວຂອງພວກເຮົາ ເວົ້າສະເພາະມີອາຍຸຍືນສະເລ່ຍນັບມື້ນັບເພີ່ມຂຶ້ນ ຫຼາຍປະເທດໃນກຸ່ມອາຊຽນພວກເຮົາ ສັງຄົມໄດ້ກ້າວເຂົ້າສູ່ສັງຄົມໄວຜູ້ອາຍຸສູງ ຊຶ່ງໄດ້ສອດຄ່ອງກັບຫົວຂໍ້ຂອງວັນຜູ້ອາຍຸສູງສາກົນປີ 2026 ທີ່ສະຫະປະຊາຊາດໄດ້ກຳນົດອອກວ່າ: ເປັນ “ຍຸກແຫ່ງອາຍຸຍືນ” ໃຫ້ຄິດທົບທວນລະບົບຕ່າງໆ ເພື່ອຮອງຮັບຊີວິດທີ່ຍືນຍາວຂຶ້ນ "The Age of Longevity: Rethinking Systems for Longer Lives“ ຄໍາຖະແຫຼງດັ່ງ ກ່າວ ໄດ້ໝາຍເຖິງການເຊີນຊວນໃຫ້ພວກເຮົາ “ຄິດໃໝ່ກ່ຽວກັບສັງຄົມລາວເຮົາທີ່ຄົນກໍາລັງມີອາຍຸຍືນຂຶ້ນ. ການມີອາຍຸຍືນຂຶ້ນແມ່ນຄວາມສໍາເລັດອັນໜຶ່ງຂອງມະນຸດ ແຕ່ອາຍຸຍືນຈະມີຄວາມໝາຍຢ່າງແທ້ຈິງ ກໍຕໍ່ເມື່ອຄົນສາມາດມີຊີວິດຍືນຍາວຂຶ້ນຢ່າງມີສຸຂະພາບ ມີສັກສີ ມີຄວາມປອດໄພ ມີລາຍໄດ້ພໍພຽງ ແລະ ມີສ່ວນຮ່ວມໃນສັງຄົມ. ດັ່ງນັ້ນ, ຄໍາຂວັນຂອງຜູ້ອາຍຸສູງປີນີ້ ບໍ່ໄດ້ຖາມພຽງວ່າ: “ຈະດູແລຜູ້ອາຍຸສູງແນວໃດ” ແຕ່ຖາມພວກເຮົາວ່າ: ເມື່ອຄົນມີອາຍຸຍືນຂຶ້ນ ລະບົບຂອງຄອບຄົວ ຊຸມຊົນ ສຸຂະພາບ ສັງຄົມ ເສດຖະກິດ ການເງິນ ການເຮັດວຽກ ແລະ ເຕັກໂນໂລຊີຂອງເຮົາພ້ອມແລ້ວບໍ່ ທີ່ຈະຮອງຮັບຊີວິດທີ່ຍືນຍາວຂຶ້ນຂອງປະຊາຊົນພວກເຮົາ ນີ້ຄືຫົວໃຈຂອງຄໍາຂວັນໃນປີນີ້. ຄໍາຂັວນຍັງໄດ້ຊີ້ໃຫ້ເຫັນວ່າ ສັງຄົມລາວພວກເຮົາຕ້ອງເລີ່ມຈາກ “ການມີອາຍຸຍືນ” ໄປສູ່ “ການມີອາຍຸຍືນຢ່າງມີຄຸນຄ່າ” ພວກເຮົາຄວນພູມໃຈວ່າມະນຸດສາມາດມີອາຍຸຍືນຂຶ້ນ ແຕ່ການມີອາຍຸຍືນບໍ່ຄວນໝາຍເຖິງການມີຈໍານວນປີໃນອາຍຸຫຼາຍຂຶ້ນເທົ່ານັ້ນ ແຕ່ເຮົາຕ້ອງການມີ: ອາຍຸຍືນ+ສຸຂະພາບດີ+ຄວາມມີອິດສະຫຼະ+ມີສັກສີ+ຄວາມປອດໄພ+ການມີສ່ວນຮ່ວມໃນສັງຄົມ ແລະ ມີຄວາມໝາຍໃນຊີວິດ. ດັ່ງນັ້ນ, ຜູ້ອາຍຸສູງບໍ່ຄວນຖືກເບິ່ງເປັນພຽງ “ຜູ້ຮັບການດູແລ” ແຕ່ຄວນຖືກເບິ່ງເປັນຜູ້ມີສິດສຽງ ເປັນຜູ້ມີປະສົບການ ຜູ້ມີສ່ວນຮ່ວມ ແລະ ຜູ້ສ້າງຄຸນຄ່າໃຫ້ສັງຄົມ.
 |
ໂອກາດນີ້, ທ່ານປະທານໄດ້ຮຽກຮ້ອງເຖິງລັດຖະບານໃຫ້ພິຈາລະນາບາງບັນຫາທີ່ສໍາຄັນດັ່ງນີ້: 1. ອະນຸມັດການຍົກລະດັບສະມາຄົມຜູ້ອາຍຸສູງ ນະຄອນຫຼວງວຽງຈັນ ຂຶ້ນເປັນສະມາຄົມຜູ້ອາຍຸສູງລາວ (ລະດັບຊາດ) ເພື່ອສ້າງເງື່ອນໃຫ້ສາມາດໄດ້ມີການເຄື່ອນໄຫວກ້ວາງຂວາງຂຶ້ນທັງຢູ່ພາຍໃນ ແລະ ຕ່າງປະເທດ; 2. ໃຫ້ປະເດັນຜູ້ອາຍຸສູງຖືກບັນຈຸເຂົ້າໃນແຜນ ແລະ ນະໂຍບາຍຂອງພັກ-ລັດ ແລະ ທຸກຂະແໜງການ; 3. ເສີມສ້າງລະບົບສຸຂະພາບ ແລະ ການດູແລປິ່ນປົວສຸຂະພາບຜູ້ອາຍຸສູງ ເປັນຕົ້ນແມ່ນໃນສະຖານທີ່ໂຮງໝໍ ແລະ ໃນສະຖານທີ່ຕ່າງໆ ສ້າງສິ່ງອໍານວຍຄວາມສະດວກໃນການເດີນທາງຂອງຜູ້ອາຍຸສູງ ບ່ອນອອກກໍາລັງກາຍ ບ່ອນສະແດງສິລະປະວັນນະຄະດີ ແລະ ອື່ນໆ 4.ເສີມສ້າງລະບອບປະກັນສັງຄົມໃຫ້ຜູ້ອາຍຸສູງ ສາມາດດໍາລົງຊີວິດຢ່າງມີສັກສີ ແລະ 5. ເຮັດແນວໃດໃຫ້ຜູ້ອາຍຸສູງຢູ່ດີ ມີຄວາມສຸກ ຢູ່ມີສັກສີ ແລະ ຍັງສາມາດມີສ່ວນຮ່ວມໃນສັງຄົມ.
ຂ່າວ: ຊີລິການດາ
ຄໍາເຫັນ