ລັດວິສາຫະກິດໄຟຟ້າລາວໄດ້ຈັດກິດຈະກໍາຍ່າງເພື່ອສຸຂະພາບ,ໃນໂອກາດສະເຫຼີມສະຫຼອງວັນສ້າງຕັ້ງ ລັດວິສາຫະກິດໄຟຟ້າລາວຄົບຮອບ 62 ປີ(18/12/1961-18/12/2023)ໃນວັນທີ 16 ທັນວາ ທີ່ເດີ່ນບຶງທາດຫຼວງນະຄອນຫຼວງວຽງຈັນ.
ເປັນກຽດໃນພິທີ ໂດຍ ທ່ານ ໂພໄຊ ໄຊຍະສອນ, ກໍາມະການສູນກາງພັກ, ລັດຖະມົນຕີກະຊວງພະລັງງານ ແລະ ບໍ່ແຮ່,ທ່ານຈັນທະບູນ ສຸກອາລຸນ, ຜູ້ອໍານວຍການໃຫຍ່ລັດວິສາຫະກິດໄຟຟ້າລາວ, ບັນດາທ່ານຮອງລັດຖະມົນຕີ,ແຂກຖືກເຊີນ ແລະ ພະນັກງານ-ລັດຖະກອນເຂົ້າຮ່ວມຢ່າງພ້ອມພຽງ.
ທ່ານ ໂພໄຊ ໄຊຍະສອນກ່າວວ່າ: ກ່ອນປະເທດຊາດໄດ້ຮັບການປົດປ່ອຍໃນປີ 1975, ຢູ່ປະເທດເຮົາ ມີເຂື່ອນຜະລິດກະແສໄຟຟ້າຂະໜາດກາງພຽງແຕ່ແຫ່ງດຽວຄື: ເຂື່ອນໄຟຟ້ານໍ້າງື່ມ 1 ຊຶ່ງໃນເບື້ອງຕົ້ນແມ່ນມີກຳລັງຕິດຕັ້ງພຽງແຕ່ 30 ເມກາວັດ ແລະ ມີເຂື່ອນໄຟຟ້າຂະໜາດນ້ອຍ 2 ແຫ່ງຄື: ເຂື່ອນນ້ຳດົງຢູ່ແຂວງຫຼວງພະບາງ ແລະ ເຂື່ອນແຊລະບຳຢູ່ແຂວງຈຳປາສັກ ຊຶ່ງແຕ່ລະແຫ່ງມີກໍາລັງຕິດຕັ້ງພຽງແຕ່ 1 ເມກາວັດເທົ່ານັ້ນ. ນອກຈາກນີ້, ກໍມີເຄື່ອງຈັກປັ່ນໄຟຟ້າທີ່ໃຊ້ນໍ້າມັນກາຊວນຢູ່ບາງຕົວເມືອງໃຫຍ່ຈຳນວນໜຶງ ຊຶ່ງໃນຊຸມປີດັ່ງກ່າວ, ມີພຽງແຕ່ 5 ຕົວເມືອງຄື: ນະຄອນຫຼວງວຽງຈັນ, ຫຼວງພະບາງ, ຄໍາມ່ວນ, ສະຫັວນນະເຂດ ແລະ ຈຳປາສັກ ທີ່ປະຊາຊົນໄດ້ຊົມໃຊ້ໄຟຟ້າ, ໂດຍມີປະມານ 19.000 ຄອບຄົວຫຼືເທົ່າກັບ10% ຂອງຈໍານວນຄົວເຮືອນໃນທົ່ວປະເທດເທົ່ານັ້ນທີ່ໄດ້ໃຊ້ໄຟຟ້າ.
ພາຍຫຼັງໄດ້ເລີ່ມດໍາເນີນການປ່ຽນແແປງໃໝ່ໃນປີ 1986 ເປັນຕົ້ນມາ, ພັກໄດ້ວາງແນວທາງຫັນເປັນອຸດສາຫະກໍາ ແລະ ທັນສະໄໝເພື່ອພັດທະນາປະເທດຊາດກ້າວຂຶ້ນຕາມທິດຍືນຍົງສູ່ຈຸດໝາຍສັງຄົມນິຍົມ ຊຶ່ງໄດ້ກໍານົດເອົາການພັດທະນາວຽກງານພະລັງງານໄຟຟ້າໂດຍສະເພາະແມ່ນຖືເອົາການພັດທະນາພະລັງງານໄຟຟ້ານໍ້າຕົກເປັນພື້ນຖານ, ແນໃສ່ເສີມຂະຫຍາຍທ່າແຮງບົ່ມຊ້ອນ ແລະ ນຳໃຊ້ແຫຼ່ງຊັບພະຍາກອນຂອງຊາດ ເຂົ້າໃນການພັດທະນາເສດຖະກິດແຫ່ງຊາດທີ່ມີປະສິດທິຜົນສູງ. ທິດທາງ ແລະ ເປົ້າໝາຍໃນການພັດທະນາການອຸດສາຫະກໍາພະລັງງານໄຟຟ້າ ແມ່ນສຸມໃສ່ ເພື່ອຜະລິດ ແລະ ສະໜອງກະແສໄຟຟ້າ ໃຫ້ພຽງພໍກັບຄວາມຕ້ອງການຊົມໃຊ້ຢູ່ພາຍໃນ ແລະ ເພື່ອການສົ່ງອອກ, ບົນພື້ນຖານຮັບປະກັນການພັດທະນາພະລັງງານໄຟຟ້າ ແບບເປັນມິດກັບສິ່ງແວດລ້ອມ,ຜະລິດພະລັງງານສະອາດ ແລະ ມີລັກສະນະຍືນຍົງ ຊຶ່ງປະກອບດ້ວຍບັນດາໂຄງການ, ແຜນງານໃຫຍ່ໆທີ່ສຳຄັນ, ເປັນລະບົບຄົບຊຸດ, ມີທັງໄລຍະສັ້ນ, ໄລຍະກາງ ແລະ ໄລຍະຍາວ.
ຈາກນັ້ນ,ພາຍຫຼັງທີ່ໄດ້ປະກາດໃຊ້ ກົດໝາຍໄຟຟ້າໃນປີ1997 ແລະ ພາຍຫຼັງທີ່ພັກ-ລັດໄດ້ວາງນະໂຍບາຍດືງດູດການລົງທຶນຈາກຕ່າງປະເທດ ເຮັດໃຫ້ມີນັກລົງທຶນຈາກຫຼາຍປະເທດເລີ່ມຫັນເຂົ້າມາລົງທຶນຢູ່ປະເທດເຮົາ ນັບທັງໃນຮູບແບບເອກະຊົນອິດສະຫຼະ (IPP) ອັນໄດ້ເຮັດໃຫ້ການພັດທະນາອຸດສາຫະກໍາພະລັງງານໄຟຟ້າຢູ່ ສປປລາວ ຂະຫຍາຍຕົວດ້ວຍຈັງຫວະທີ່ໄວ ແລະ ບາງໄລຍະກໍມີລັກສະນະກ້າວກະໂດດ. ປັດຈຸຸບັນ, ທົ່ວປະເທດມີແຫຼ່ງຜະລິດໄຟຟ້າແລ້ວ 78 ແຫ່ງ, ມີກຳລັງຕິດຕັ້ງທັງໝົດ 9.531,9 ແມັກກາວັດ, ສາມາດຜະລິດພະລັງງານໄຟຟ້າໄດ້ເຖິງ 52.211 ລ້ານ ກິກະວັດໂມງຕໍ່ປີໃນນີ້, ແຫຼ່ງຜະລິດໄຟຟ້າມາຈາກເຂື່ອນໄຟຟ້າພະລັງງານນໍ້າກວມເອົາ 75%,ມີລະບົບສາຍສົ່ງແຕ່ລະປະເພດຍາວທັງໝົດ62.000 ກວ່າກິໂລແມັດ ແລະ ມີສະຖານີຈ່າຍໄຟຟ້າ 70 ແຫ່ງ.
ທ່ານ ໂພໄຊ ໄຊຍະສອນ ກ່າວຕື່ມອີກວ່າ: ພວກເຮົາມີຄວາມພາກພູມໃຈເປັນຢ່າງຍິ່ງທີ່ເຫັນວ່າ ໄຟຟ້າລາວ ໄດ້ຮັບການພັດທະນາຈົນເຕີບໃຫຍ່ຂະຫຍາຍຕົວກາຍມາເປັນລັດວິສາຫະກິດໄຟຟ້າລາວໃນປັດຈຸບັນໂດຍຕິດພັນຢ່າງສະໜິດແໜ້ນກັບບາດກ້າວແຫ່ງການພັດທະນາ ແລະ ຂະຫຍາຍຕົວຂອງການພັດທະນາປະເທດຊາດມາຮອດມື້ນີ້ກໍເປັນເວລາຍາວນານເຖິງ 62 ປີແລ້ວ. ໄຟຟ້າລາວ ບໍ່ພຽງແຕ່ເຮັດບົດບາດອັນສຳຄັນໃນການຄຸ້ມຄອງການຜະລິດພະລັງງານໄຟຟ້າທີ່ມີຄວາມໝັ້ນຄົງເທົ່ານັ້ນ ແຕ່ຫາກຍັງແມ່ນຜູ້ດໍາເນີນທຸລະກິດ,ຜູ້ໃຫ້ການສະໜອງການບໍລິການກະແສໄຟຟ້າເພື່ອການຊົມໃຊ້ຢູ່ພາຍໃນສັງຄົມທີ່ມີຄຸນນະພາບສູງ ຊຶ່ງມາຮອດປັດຈຸບັນ100% ຂອງເທດສະບານແຂວງ, ນະຄອນຫຼວງ, 100% ຂອງເທດສະບານເມືອງ,ນະຄອນ, 92%ຂອງຈຳນວນບ້ານ ແລະ 95% ຂອງຈຳນວນຄອບຄົວໃນທົ່ວປະເທດໄດ້ຊົມໃຊ້ກະແສໄຟຟ້າຢ່າງຖາວອນແລ້ວ.ໃນນີ້33,1%ແມ່ນທີ່ຢູ່ອາໄສ, 46,1% ຢູ່ໃນພາກອຸດສາຫະກໍາ ແລະ ປະເພດອື່ນໆ 20,8%.ນອກຈາກນີ້, ໄຟຟ້າລາວຍັງເຮັດບົດບາດເປັນຜູ້ສົ່ງອອກກະແສໄຟຟ້າ ແລະ ກາຍເປັນຫົວໜ່ວຍທຸລະກິດພາກລັດທີ່ສໍາຄັນໃນການສ້າງລາຍຮັບງົບປະມານ.
ຜົນສຳເລັດຂອງການຈັດຕັ້ງ ແລະ ການເຄື່ອນໄຫວຂອງໄຟຟ້າລາວ ໄດ້ຕິດພັນຢ່າງສະໜິດແໜ້ນກັບການນໍາພາຂອງພັກ, ຄະນະພັກຂັ້ນຕ່າງໆ, ຕິດແໜ້ນກັບຄວາມເອົາໃຈໃສ່ຂອງລັດ ແລະ ອົງການປົກຄອງທ້ອງຖິ່ນເປັນຢ່າງດີ ຊຶ່ງບໍ່ພຽງແຕ່ສ້າງເງື່ອນໄຂໃຫ້ໄຟຟ້າລາວ ໄດ້ຮັບການພັດທະນາ ແລະ ເຄື່ອນໄຫວເຮັດຫຼ້ອນບົດບາດ, ໜ້າທີ່ຂອງຕົນຢ່າງສົມກຽດເທົ່ານັ້ນ ແຕ່ຫາກຍັງເປັນຫົວໜ່ວຍທຸລະກິດ, ເປັນຫົວໜ່ວຍວຽກງານທີ່ເປັນຕົວແບບ, ເປັນແຫຼ່ງຮຽນຮູ້ ກ່ຽວກັບການຜະລິດ, ການຄຸ້ມຄອງ, ການພັດທະນາດ້ານພະລັງງານໄຟຟ້າ ແລະ ແມ່ນໜໍ່ແໜງທີ່ສໍາຄັນໃນການຈັດຕັ້ງປະຕິບັດແນວທາງຫັນເປັນອຸດສາຫະກໍາ ແລະ ທັນສະໄໝຂອງພັກຢູ່ປະເທດເຮົາອີກດ້ວຍ. (ຂ່າວ: ແສງຈັນ)
ຄໍາເຫັນ