ສະເຫຼີມສະຫຼອງວັນສາຍຕາໂລກ ປະຈຳປີ 2023

ໃນວັນທີ 25 ຕຸລາຜ່ານມາ, ທີ່ຫ້ອງປະຊຸມກອງບັນຊາການທະຫານແຂວງຫຼວງພະບາງ ໄດ້ຈັດພິທີສະ ເຫຼີມສະຫຼອງວັນສາຍຕາໂລກ ປະຈຳປີ 2023 (ວັນທີ 12 ຕຸລາ ຄົບຮອບ 21 ປີ) ແລະ ກວດວັດແທກສາຍ ຕາ ( ແບບບໍ່ເສຍຄ່າ ) ໂດຍການເປັນປະທານຂອງທ່ານນາງ ລາວັນ ສຸດທິສານ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີທ່ານນາງ ອິນທະວອນ ພົມມະຈັນ ປະທານສະຫະພັນແມ່ຍິງແຂວງ, ມີທີມງານຈາກສູນກາງສະຫະພັນແມ່ຍິງລາວ, ທີມງານມູນນິທິເຟຣດໂຣໂລ, ທີມງານຂະແໜງຕາພະແນກສາທາລະນະສຸກແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ. 
    ທ່ານນາງ ລາວັນ ສຸດທິສານ ກ່າວວ່າ: ການຈັດພິທີຄັ້ງນີ້ ເພື່ອໃຫ້ທຸກຄົນທົ່ວສັງຄົມ ຍົກສູງຄວາມຮັບຮູ້ ຄວາມເຂົ້າໃຈໃນການດູແລ ແລະ ຮັກສາສຸຂະພາບຕາຂອງຕົນເອງ, ຮູ້ຈັກວິທີປ້ອງກັນ ແລະ ປິ່ນປົວ, ໃຫ້ຄວາມສຳຄັນຕໍ່ສິດໃນການເບິ່ງເຫັນ ແລະ ເປັນການເລັ່ງທວງສັນຍາຂອງລັດຖະບານແຕ່ລະປະເທດທີ່ໄດ້ຮັບ ຮອງເອົາໃນວາລະກອງປະຊຸມໃຫຍ່ຂອງອົງການອານາໄມໂລກຄັ້ງທີ 56 ໃນວັນທີ 26 ພຶດສະພາ 2003 ທີ່ປະເທດສະວິດເຊີແລນ ເພື່ອຮັບປະກັນໃຫ້ການບໍລິການຮັກສາສຸຂະພາບຕາ ມີການຂະຫຍາຍຕົວຢ່າງຕໍ່ເນື່ອງ, ເອົາໃຈໃສ່ວຽກງານປ້ອງກັນ ແລະ ປິ່ນປົວຢ່າງທົ່ວເຖິງຢູ່ພາຍໃນປະເທດຂອງຕົນ. 
    ຈາກນັ້ນກອງປະຊຸມໄດ້ເຜີຍແຜ່ຄວາມຮູ້ໃນການຮັກສາສຸຂະພາບຕາຂັ້ນຕົ້ນ 3 ພະຍາດຄື: ພະຍາດແກ່ນຕາຂຸ້ນ, ພະຍາດຕາແດງ ແລະ ອຸບັດເຫດທາງຕາກ່ຽວກັບພະຍາດຕາ ເພື່ອໃຫ້ທຸກຄົນໄດ້ຮູ້ເຖິງຜົນຮ້າຍໄພອັນ ຕະລາຍກ່ຽວກັບພະຍາດຕາ ແລະ ໃຫ້ໄດ້ຮັບການຮັກສາທ່ວງທັນກັບເວລາ ເພື່ອເປັນການຫຼຸດຜ່ອນຈຳນວນຄົນຕາບອດ ຊຶ່ງແມ່ນພັນທະທີ່ຈຳເປັນທີ່ທຸກຄົນໃນທົ່ວສັງຄົມ ຕ້ອງໄດ້ເອົາໃຈໃສ່ຈັດຕັ້ງປະຕິບັດ ເພື່ອໃຫ້ບັນລຸໄດ້ມາດຖານສູງສຸດຂອງການມີສຸຂະພາບຕາທີ່ດີ. ໃນໂອກາດນີ້ຜູ້ເຂົ້າຮ່ວມໄດ້ຮັບການວັດແທກສາຍຕາແບບບໍ່ເສຍຄ່າ ແລະ ແຈກຢາຍແວ່ນຕາໃຫ້ຜູ້ເຂົ້າຮ່ວມຈຳນວນ 200 ອັນ.     ຂ່າວ: ພຸດສະດີ ບານຸວົງ