 |
ທ່ານ ພົຈວ ຫຸມພັນ ຜິວເຂັມພອນ ໄດ້ຍົກໃຫ້ເຫັນມູນເຊື້ອແມ່ຍິງກໍາລັງ ປກສ, ການເຕີບໃຫຍ່ຂະຫຍາຍ ຕົວຂອງສະຫະພັນແມ່ຍິງກຳລັງ ປກສ ໃນແຕ່ລະໄລຍະ ຊຶ່ງແບ່ງອອກເປັນສອງໄລຍະຄື: ໄລຍະແຕ່ປີ 1966-1975 ແລະ ໄລຍະແຕ່ປີ 1975 ເຖິງປັດຈຸບັນ. ນັບແຕ່ວັນທີ 9 ມັງກອນ 1966 ສະມາຄົມແມ່ຍິງໃນກຳລັງ ປກສ ໄດ້ຮັບການສ້າງຕັ້ງຂຶ້ນຢູ່ທີ່ບ້ານນາໄກ່ ເມືອງວຽງໄຊ ແຂວງຫົວພັນ (ໃນປັດຈຸບັນ) ຊຶ່ງໃນເບື້ອງຕົ້ນເອີ້ນ ວ່າ: “ຈຸແມ່ຍິງຫ້ອງການສັນຕິລາດສູນກາງ” ຂຶ້ນກັບໜ່ວຍແມ່ຍິງຫ້ອງການແນວລາວຮັກຊາດ. ທັງນີ້, ເພື່ອເປັນການທົບທວນຫວນຄືນປະຫວັດການກຳເນີດ ເຕີບໃຫຍ່ຂະຫຍາຍຕົວຂອງສະຫະພັນແມ່ຍິງກໍາລັງ ປກສ ທີ່ໄດ້ທຸ້ມເທເຫື່ອແຮງສະຕິປັນຍາ, ຄຽງບ່າຄຽງໄຫຼ່ກັບເພດຊາຍ ເຂົ້າໃນພາລະກິດຕໍ່ສູ້ປົດປ່ອຍຊາດ ຕ້ານຈັກກະພັດຜູ້ຮຸກຮານໃນເມື່ອກ່ອນ ກໍຄືເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ ເຮັດໃຫ້ສະມາຊິກແມ່ຍິງໄດ້ຮັບຮູ້ ແລະ ກຳແໜ້ນ ເພື່ອຍົກສູງສະຕິໃນການປະຕິບັດລະບຽບວິໃນຂອງກໍາລັງ ປກສ ໃຫ້ເຂັ້ມງວດ ແນໃສ່ຕ້ານ ແລະ ສະກັດກັ້ນປະກົດການຫຍໍ້ທໍ້ ທີ່ເກີດຂຶ້ນກັບສະມາຊິກແມ່ຍິງໃຫ້ນັບມື້ຫຼຸດໜ້ອຍຖອຍລົງ.
 |
ຍ້ອນເຫັນໄດ້ຜົນງານທີ່ຜ່ານມານັ້ນ, ຄະນະພັກ-ຄະນະນໍາ ກະຊວງ ປກສ ໄດ້ຕີລາຄາສູງຕໍ່ການປະ ກອບສ່ວນອັນສໍາຄັນ ແລະ ໄດ້ຮັບການຍ້ອງຍໍສັນລະເສີນຈາກການຈັດຕັ້ງຕ່າງໆ ເຊັ່ນ: ຫຼຽນກຽດຕິຍົດຈາກອົງການອະນາໄມໂລກ 1 ໜ່ວຍ; ຫຼຽນໄຊອິດສະຫຼະຊັ້ນ II 1 ໜ່ວຍ; ຫຼຽນໄຊອິດສະຫຼະຊັ້ນ III 2 ໜ່ວຍ; ຫຼຽນໄຊແຮງງານ ຊັ້ນ II 1 ໜ່ວຍ; ຫຼຽນໄຊແຮງງານ ຊັ້ນ III 1 ໜ່ວຍ; ຫຼຽນກາແຮງງານ 1 ໜ່ວຍ; ຫຼຽນກາ 50 ປີຂອງສູນກາງສະຫະພັນແມ່ຍິງລາວ 1 ໜ່ວຍ ແລະ ຫຼຽນກາ 50 ປີຂອງກໍາລັງ ປກສ ປະຊາຊົນ 1 ໜ່ວຍ; ໃບຍ້ອງຍໍລັດຖະບານ, ສູນກາງສະຫະພັນແມ່ຍິງລາວ, ກະຊວງ ປກສ ແລະ ກົມໃຫຍ່ການເມືອງ ປກສ ຈຳນວນຫຼາຍໃບ. ຈາກນັ້ນ, ບັນດາຜູ້ເຂົ້າຮ່ວມຍັງໄດ້ຮັບຊົມການສະແດງສິລະປະ-ວັນນະຄະດີຕື່ມອີກ.
ຂ່າວ-ພາບ: ຄໍາໂຖ
ຄໍາເຫັນ