ສະຫຼອງວັນສ້າງຕັ້ງວາລະສານກໍ່ສ້າງພັກ ຄົບຮອບ 30 ປີ

ພິທີສະເຫຼີມສະຫຼອງ ວັນສ້າງຕັ້ງວາລະສານກໍ່ສ້າງພັກ ຄົບຮອບ 30 ປີ (20 ຕຸລາ 1993-20 ຕຸລາ 2023) ໄດ້ຈັດຂຶ້ນໃນວັນທີ 20 ຕຸລານີ້ ທີ່ສະໂມສອນໃຫຍ່ ຄະນະຈັດຕັ້ງສູນກາງພັກ ໂດຍໃຫ້ກຽດເຂົ້າຮວ່ມ ຂອງ ສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ ຮອງຫົວໜ້າຄະນະຈັດຕັ້ງສູນກາງພັກ, ມີຮອງຄະນະຈັດຕັ້ງສູນກາງພັກ,ບັນດາກຳມະການຄະນະພັກ, ຫົວໜ້າກົມ, ຮອງກົມ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ສະຫາຍ ພອນສະຫວັນ ໄຊຊະນະ ຫົວໜ້າກົມໂຄສະນາກໍ່ສ້າງພັກ-ພະນັກງານໄດ້ຍົກໃຫ້ເຫັນການກຳເນີດ ແລະ ການເຕີບໃຫຍ່ຂະຫຍາຍຕົວຂອງວຽກງານວາລະສານກໍ່ສ້າງພັກ, ຜົນງານການເຄື່ອນໄຫວປະຕິບັດໜ້າທີ່ການເມືອງຂອງວຽກງານກໍ່ສ້າງພັກກໍຄືວຽກງານໂຄສະນາກໍ່ສ້າງພັກ-ພະນັກງານໄລຍະ 30 ປີຜ່ານມາ, ໃນໄລຍະເລີ່ມຕົ້ນວາລະສານກໍ່ສ້າງພັກແມ່ນຜະລິດເປັນລາຍໄຕມາດ (3 ເດືອນ) ມີຂະໜາດ 17x22 ຊມ, ບໍລິມາດພິມ 62 ໜ້າ, ປະລິມານ 2.000 ເຫຼັ້ມ, ປີ 1995 ວາລະສານກໍ່ສ້າງພັກ ໄດ້ຂະຫຍາຍຕົວ ອອກຕື່ມຄື: ເພີ່ມບໍລິມາດພິມຂຶ້ນເປັນ 72 ໜ້າ, ປະລິມານພິມ ກໍໄດ້ເພີ່ມຈຳນວນຂຶ້ນເລື້ອຍໆ ຈົນຮອດປັດຈຸບັນ.
ທ່ານກ່າວຕື່ມວ່າ: ການເຕີບໃຫຍ່ຂະຫຍາຍຕົວຂອງວາລະສານກໍ່ສ້າງພັກ, ນອກຈາກປະລິມານການພິມທີ່ເພີ່ມຂຶ້ນແລ້ວ, ພວກເຮົາຍັງໄດ້ມີການປັບປຸງທາງດ້ານຮູບຮ່າງ ແລະ ຈຳນວນໜ້າຕາມໄລຍະຢ່າງເໝາະສົມ. ສໍາຄັນ ແມ່ນໄດ້ປັບປຸງໄລຍະເວລາການພິມອອກຈໍາໜ່າຍໃຫ້ສັ້ນເຂົ້າກວ່າເກົ່າຄື: ຈາກລາຍ 3 ເດືອນ ມາເປັນລາຍ 2 ເດືອນ, ເລີ່ມປີ 1999 ຫາ ປີ 2007 ມາເປັນລາຍເດືອນຈົນເຖິງປັດຈຸບັນ. ການປັບປຸງຄືດັ່ງກ່າວ ໄດ້ເຮັດໃຫ້ ວາລະສານກໍ່ສ້າງພັກມີຮູບຊົງສົມສ່ວນ ແລະ ສວຍງາມກວ່າເກົ່າ. ນອກຈາກຈັດພິມວາລະສານກໍ່ສ້າງພັກ ສະບັບປົກກະຕິແລ້ວ, ຍັງໄດ້ຈັດພິມວາລະສານສະບັບພິເສດ ຮັບໃຊ້ກອງປະຊຸມພະນັກງານທົ່ວປະເທດ, ກອງປະຊຸມວຽກງານຈັດຕັ້ງທົ່ວປະເທດ ແລະ ກອງປະຊຸມທີ່ສໍາຄັນຂອງພັກ. ແຕ່ປີ 1995 ເປັນຕົ້ນມາ, ຈັດພິມປຶ້ມບົດໂອ້ລົມຂອງປະທານ ໄກສອນ ພົມວິຫານ ໃນກອງປະຊຸມຈັດຕັ້ງທົ່ວປະເທດ ຄັ້ງທີ 7, ປຶ້ມ ລວບລວມບັນດາຄຳສັ່ງ, ຂໍ້ກຳນົດ, ບົດແນະນໍາຕ່າງໆກ່ຽວກັບວຽກງານຈັດຕັ້ງ, ເອກະສານຄູ່ມືວຽກງານຈັດຕັ້ງກໍ່ສ້າງພັກ-ພະນັກງານເປັນຕົ້ນ: ຈັດພິມ ແລະ ແຈກຢາຍປຶ້ມກອງປະຊຸມວຽກງານຈັດຕັ້ງທົ່ວປະເທດ, ປຶ້ມເອກະສານກອງປະຊຸມໃຫຍ່ສະມາຊິກພັກອົງຄະນະພັກຄະນະຈັດຕັ້ງສູນກາງພັກ, ປຶ້ມມູນເຊື້ອຄະນະຈັດຕັ້ງສູນກາງພັກ ຄົບຮອບ 55 ປີ ອອກແບບ ແລະ ແຈກຢາຍແຜ່ນພັບມູນເຊື້ອຄະນະຈັດຕັ້ງສູນກາງພັກ ຄົບຮອບ 60 ປີ ແລະ ອື່ນໆ. 
ໃນໂອກາດດັ່ງກ່າວ, ສະຫາຍ ນາງ ບຸດສະດີ ທະນະເມືອງ ໄດ້ໃຫ້ກຽດໂອ້ລົມ ໂດຍໄດ້ເນັ້ນໃຫ້ສະຫາຍບັນນາທິການ, ຄະນະກົມ, ນັກຂ່າວ ແລະ ເພື່ອນຮ່ວມງານວາລະສານ, ເພື່ອນຮ່ວມງານໂຄສະນາກໍ່ສ້າງພັກ-ພະນັກງານຕ້ອງຍົກລະດັບຄວາມຮູ້, ຄວາມສາມາດ ທາງດ້ານທິດສະດີການເມືອງ ແລະ ວິຊາສະເພາະກ່ຽວກັບວຽກງານ ຂ່າວສານໃນລະດັບອັນແນ່ນອນ, ຕ້ອງກຳແໜ້ນແນວທາງການຈັດຕັ້ງ, ແນວທາງພະນັກງານຂອງພັກ ແຕ່ລະໄລຍະ, ຮູ້ປະດິດສ້າງ, ຮູ້ປຸງແຕ່ງມະຕິ, ຄຳສັ່ງ, ນິຕິກຳ, ຄຳໂອ້ລົມຂອງການນໍາ ໃຫ້ກາຍເປັນຜະລິດຕະພັນໃໝ່, ເປັນບົດຄວາມ, ບົດອະພິປາຍ ໃນລັກສະນະລົງເລິກແຕ່ລະບັນຫາອັນສະເພາະ, ມີການວິເຄາະ, ວິໄຈ ເຮັດໃຫ້ເນື້ອໃນແຕ່ລະບັນຫາໃນມະຕິຂອງພັກ ມີຄວາມຈະແຈ້ງ ເຮັດໃຫ້ຜູ້ອ່ານ, ຜູ້ຟັງ ຮັບຮູ້ເຂົ້າໃຈ, ສາມາດຈື່ຈຳ ແລະ ສາມາດປະຕິບັດໄດ້. ການຂຽນບົດ ຕ້ອງສັ້ນກະທັດລັດ, ເນື້ອໃນຮັດກຸມ, ກ້າວິເຄາະ ໄຈ້ແຍກ ຕໍ່ບັນຫາເກີດຂຶ້ນໃໝ່ ແລະ ກ້າຕໍານິ ຕິຕຽນຕໍ່ບັນດາທັດສະນະ, ການກະທໍາ ທີ່ຝືນກັບແນວທາງ, ກົດລະບຽບພັກ, ຫຼັກການຈັດຕັ້ງ, ທາດແທ້ວັດຖຸປະສົງຂອງພັກ, ຄຸນສົມບັດສິນທໍາປະຕິວັດ ແລະ ຈັນຍາບັນຂອງ ສະມາຊິກພັກ, ພະນັກງານ, ຕ້ອງເອົາໃຈໃສ່ ກໍ່ສ້າງເພື່ອນຮ່ວມງານວາລະສານ, ໂທລະພາບກໍ່ສ້າງພັກ ໃຫ້ກວ້າງຂວາງ ແລະ ໃຫ້ມີໃນທຸກຂະແໜງການຂົງເຂດວຽກງານ ແລະ ທ້ອງຖິ່ນ, ສືບຕໍ່ຮັກສາ ແລະ ເສີມຂະຫຍາຍມູນເຊື້ອການພົວພັນ ລະຫວ່າງຄະນະບັນນາທິການ ວາລະສານກໍ່ສ້າງພັກ ກັບບັນດາຄະນະບັນນາທິການວາລະສານໄຊຢັ່ງດ້າງ ຂອງຄະນະຈັດຕັ້ງສູນກາງພັກກອມມູນິດ ຫວຽດນາມ ແລະ ຄະນະບັນນາທິການວາລະສານອື່ນໆ ຢູ່ພາຍໃນປະເທດ, ຄະນະພັກ,ຄະນະຈັດຕັ້ງສູນກາງພັກຕ້ອງຮັບຮູ້, ເຂົ້າໃຈ ແລະ ເຫັນໄດ້ຄວາມສຳຄັນຂອງວຽກງານໂຄສະນາກໍ່ສ້າງພັກ-ພະນັກງານ, ຕ້ອງສ້າງເງື່ອນໄຂອັນຈຳເປັນໃຫ້ກົມໂຄສະນາກໍ່ສ້າງພັກ-ພະນັກງານເຄື່ອນໄຫວປະຕິບັດໜ້າທີ່ເປັນຢ່າງດີ ໂດຍສະເພາະແມ່ນດ້ານງົບປະມານຄ່າຈັດພິມວາລະສານ, ຄ່າແຮງງານ (ນາມປາກກາ),ຜູ້ ຂຽນບົດ ແລະ ສະໜອງອຸປະກອນຮັບໃຊ້ອັນຈຳເປັນ ແລະ ອື່ນໆ.
ໃນພິທີດັ່ງກ່າວຍັງໄດ້ມອບໃບຍ້ອງຍໍ ແລະ ໃບຊົມເຊີຍໃຫ້ແກ່ພາກສ່ວນທີ່ໃຫ້ການອຸປະຖຳ ແລະ ມອບລາງວັນ ແລະ ໃບຢັ້ງຢືນ ໃຫ້ແກ່ຜູ້ຊະນະເລີດລາງວັນທີ 1, ທີ 2 ແລະ ທີ 3 ທີ່ສົ່ງບົດເຂົ້າປະກວດເນື່ອງໃນວັນສ້າງຕັ້ງວາລະສານກໍ່ສ້າງພັກ ຄົບຮອບ 30 ປີ.
(ຂ່າວ: ສຳນານ, ພາບ: ພັດ)