 |
ທ່ານ ນາງ ແກ້ວ ຈັນທະວີໄຊ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ທັງເປັນຮອງປະທານຄະນະກໍາມະການຕ້ານການຄ້າມະນຸດລະດັບຊາດ ໃຫ້ຮູ້ວ່າ: ສປປ ລາວ ເປັນປະເທດໜຶ່ງທີ່ໄດ້ຮັບຜົນກະທົບຈາກການຄ້າມະນຸດ, ສະພາບອັນພົ້ນເດັ່ນໃນໄລຍະ 5 ປີຜ່ານມາ (2021-2025) ໄດ້ພົບເຫັນການຄ້າມະນຸດ ຫຼາຍຮູບແບບ, ອັນພົ້ນເດັ່ນໃນປີ 2025 ແມ່ນກຸ່ມຄົນບໍ່ດີໄດ້ຕົວະຍົວະຫຼອກລວງເອົາຍິງສາວລາວຈຳນວນໜຶ່ງໄປໝັ້ນໝາຍ ຫຼື ແຕ່ງດອງກັບຄົນຕ່າງປະເທດໂດຍບໍ່ຖືກຕ້ອງ ແລະ ເປັນການແຕ່ງດອງແອບແຝງທີ່ເປັນການຄ້າມະນຸດ ຖືວ່າມີຄວາມຜິດຕາມປະມວນກົດໝາຍອາຍາ ມາດຕາ 215 ການຄ້າມະນຸດ, ສວຍໃຊ້ສື່ສັງຄົມອອນລາຍສະເໜີຄ່າດອງສູງ, ມີການບັງຄັບ, ປອມແປງເອກະສານເພີ່ມອາຍຸເດັກ ແລະ ການຮັບຈ້າງຖືພາແທນ (ອູ້ມບຸນ).
ຕໍ່ບັນຫາດັ່ງກ່າວ, ບັນດາຂະແໜງການທີ່ຮັບຜິດຊອບວຽກງານຕ້ານການຄ້າມະນຸດທຸກຂັ້ນ ໄດ້ສຸມໃສ່ຈັດຕັ້ງປະຕິບັດແຜນງານແຫ່ງຊາດ ວ່າດ້ວຍການຕ້ານການຄ້າມະນຸດເຂົ້າສູ່ວຽກງານຕົວຈິງ ນັບແຕ່ສູນກາງລົງຮອດທ້ອງ ຖິ່ນຢ່າງກວ້າງຂວາງ ແລະ ເລິກເຊິ່ງ ເປັນຕົ້ນໄດ້ສ້າງ, ປັບປຸງກົດໝາຍ, ນິຕິກຳ ແລະ ຄູ່ມື, ໄດ້ສຸມໃສ່ຈັດຝຶກອົບ ຮົມ, ໂຄສະນາ, ສໍາມະນາວຽກງານຕ້ານການຄ້າມະນຸດ ເພື່ອສ້າງຄວາມເຂັ້ມແຂງໃຫ້ພະນັກງານທາງພາກລັດທີ່ກ່ຽວຂ້ອງ ນັບແຕ່ສູນກາງ-ທ້ອງຖິ່ນ. ນອກນັ້ນ, ໄດ້ໂຄສະນາດ້ວຍຫຼາຍຮູບແບບເຊັ່ນ: ສະປອດສັ້ນ, ລະຄອນສັ້ນ, ລະຄອນຍາວ, ຂ່າວການເຄື່ອນໄຫວວຽກງານຕ້ານການຄ້າມະນຸດ, ລາຍການຄວາມຮູ້ທາງດ້ານກົດໝາຍ, ວິທະຍຸຊາວໜຸ່ມຍຸກໃໝ່, ໂທລະພາບ ປກສ, ວິທະຍຸ ປກສ, ວິທະຍຸກອງທັບປະຊາຊົນລາວ ແລະ ການກະຈາຍສຽງຜ່ານໂທລະໂຄ່ງປະຈຳບ້ານ. ນອກນີ້, ຍັງໄດ້ໂຄສະນາຜ່ານສື່ສັງຄົມອອນລາຍ ເປັນຕົ້ນແມ່ນ Facebook, YouTube, TikTok ແລະ ເຜີຍແຜ່ໃນເວັບໄຊ້ (laosncatip.gov.la).
ໃນໄລຍະ 5 ປີຜ່ານມາ, ໄດ້ຮັບແຈ້ງຄວາມ ແລະ ຂຶ້ນບັນຊີເປົ້າໝາຍ ໂດຍມີຄະດີທັງໝົດ 171 ເລື່ອງ, ມີຜູ້ຖືກຫາ 379 ຄົນ ຍິງ 219 ຄົນ, ໃນນີ້ເປັນຊາວຕ່າງປະເທດ 99 ຄົນ ສາມາດຊ່ວຍເຫຼືອຜູ້ຖືກເຄາະຮ້າຍໄດ້ເຖິງ 379 ຄົນ ຍິງ 331 ຄົນ, ຊຶ່ງໃນນີ້ເປັນເດັກນ້ອຍອາຍຸຕ່ຳກວ່າ 18 ປີ ຈຳນວນ 256 ຄົນ. ຄະດີເຂົ້າໃໝ່ໃນປີ 2025 ມີທັງໝົດ 45 ເລື່ອງ, ມີຜູ້ຖືກຫາ 119 ຄົນ ຍິງ 75 ຄົນ, ໃນນັ້ນມີຊາວຕ່າງປະເທດ 36 ຄົນ ສາມາດກອບກູ້ ແລະ ຊ່ວຍເຫຼືອຜູ້ຖືກເຄາະຮ້າຍໄດ້ 86 ຄົນ ຍິງ 80 ຄົນ, ຊຶ່ງເປັນເດັກອາຍຸຕ່ຳກວ່າ 18 ປີ ມີເຖິງ 71 ຄົນ, ພ້ອມນັ້ນ, ຍັງໄດ້ໃຫ້ການຊ່ວຍເຫຼືອກຸ່ມສ່ຽງ ແລະ ຜູ້ຖືກເຄາະຮ້າຍ ເປັນຕົ້ນແມ່ນ ສະຖານທີ່ພັກເຊົາຊົ່ວຄາວ, ອາຫານ, ເຄື່ອງນຸ່ງຫົ່ມ, ເຄື່ອງໃຊ້ສອຍອັນຈໍາເປັນ, ການປິ່ນປົວດ້ານຮ່າງກາຍ, ບໍາບັດຟື້ນຟູທາງດ້ານຈິດໃຈ, ຕະ ຫຼອດໄລຍະ 5 ປີຜ່ານມາ, ສາມາດຊ່ວຍເຫຼືອ ແລະ ສົ່ງກັບຄືນສູ່ຄອບຄົວໄດ້ຈຳນວນ 295 ຄົນ ຍິງ 183 ຄົນ, ຊຶ່ງໃນນັ້ນ ເປັນເດັກນ້ອຍອາຍຸຕ່ຳກວ່າ 18 ປີ ຈຳນວນ 209 ຄົນ.
 |
ນອກນັ້ນ, ຍັງໄດ້ພົວພັນຮ່ວມມື ປະສານສົມທົບກັບຕ່າງປະເທດ, ຂະແໜງການຕ່າງໆ ນັບທັງສູນກາງ ແລະ ທ້ອງຖິ່ນ ເປັນຕົ້ນ ໄດ້ຮ່ວມມື 2 ຝ່າຍ ລາວ-ຫວຽດນາມ, ລາວ-ຈີນ, ລາວ-ໄທ ແລະ 3 ຝ່າຍ ລາວ-ກຳປູເຈຍ-ຫວຽດນາມ, ຮ່ວມກັບບັນດາອົງການຈັດຕັ້ງສາກົນ ແລະ ອົງການຈັດຕັ້ງບໍ່ສັງກັດລັດຖະບານ (INGOs) ໃນການຈັດຕັ້ງປະຕິບັດບັນດາໂຄງການ, ກິດຈະກໍາຕາມບົດບັນທຶກຄວາມເຂົ້າໃຈທີ່ສອງຝ່າຍໄດ້ລົງນາມຮ່ວມກັນໄດ້ສໍາເລັດເປັນຢ່າງດີ. ພ້ອມທັງວາງທິດທາງແຜນການ 5 ປີ (2026-2030) ແລະ ແຜນວຽກຈຸດສຸມປະຈຳປີ 2026 ໂອກາດດັ່ງກ່າວ, ທ່ານ ຄໍາພັນ ພົມມະທັດ ໄດ້ເນັ້ນໃຫ້ຄະນະກໍາມະການຕ້ານການຄ້າມະນຸດ ຂະແໜງການຕ່າງໆ ແຕ່ສູນກາງລົງຮອດທ້ອງຖິ່ນ ຕ້ອງເອົາໃຈໃສ່ບາງບັນຫາດັ່ງນີ້: ສືບຕໍ່ຍົກສູງບົດບາດການນຳພາ-ຊີ້ນຳຂອງຄະນະພັກ, ອົງການປົກຄອງທຸກຂັ້ນຕໍ່ກັບວຽກງານສະກັດກັ້ນ ແລະ ຕ້ານການຄ້າມະນຸດ ໂດຍຖືເອົາວຽກງານດັ່ງ ກ່າວເປັນໜ້າທີ່ການເມືອງອັນສຳຄັນ ແລະ ຕ້ອງຕິດພັນຢ່າງສະໜິດແໜ້ນກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງທ້ອງຖິ່ນຕົນ. ຕ້ອງຫັນເອົາເນື້ອໃນມະຕິ, ຄຳສັ່ງ ແລະ ນິຕິກຳຕ່າງໆ ລົງເລິກໄປສູ່ຮາກຖານປະຊາຊົນຢ່າງແທ້ຈິງ, ສືບຕໍ່ປັບປຸງວຽກງານຕ້ານການຄ້າມະນຸດດ້ວຍຮູບແບບການໂຄສະນາໃຫ້ມີຄວາມຫຼາກຫຼາຍ, ທັນສະໄໝ ແລະ ເຂົ້າເຖິງກຸ່ມເປົ້າໝາຍທີ່ມີຄວາມສ່ຽງສູງ ໂດຍສະເພາະແມ່ນໄວໜຸ່ມ, ນັກຮຽນ-ນັກສຶກສາ, ແມ່ຍິງ ແລະ ຊາວຜູ້ອອກແຮງງານຢູ່ເຂດຊົນນະບົດຫ່າງໄກສອກຫຼີກ ເພື່ອເຮັດໃຫ້ສັງຄົມມີສະຕິລະວັງຕົວ ແລະ ເປັນຫູເປັນຕາຊ່ວຍເຈົ້າໜ້າທີ່; ເພີ່ມທະວີປະສານສົມທົບກັນຢ່າງກົມກຽວ ໃນການບັງຄັບໃຊ້ກົດໝາຍຢ່າງເດັດຂາດ ແລະ ເຂັ້ມງວດ, ຕ້ອງໄດ້ເລັ່ງລັດສືບສວນ-ສອບສວນ ແລະ ນຳເອົາຜູ້ກະທຳຜິດ, ໂດຍສະເພາະແມ່ນຫົວໂປ່ໂຕການ ແລະ ເຄືອຂ່າຍນາຍໜ້າມາລົງໂທດຕາມກົດໝາຍ ແລະ ຍຸຕິທຳ. ເພີ່ມທະວີໃນວຽກງານການປົກປ້ອງ ແລະ ຊ່ວຍເຫຼືອຜູ້ຖືກເຄາະຮ້າຍ, ຮຽກຮ້ອງໃຫ້ຂະແໜງການແຮງງານ ແລະ ສະຫວັດດີການສັງຄົມ, ສູນກາງສະຫະພັນແມ່ຍິງລາວ, ສູນກາງຊາວໜຸ່ມປະຊາຊົນປະຕິວັດລາວ ແລະ ກະຊວງສາທາລະນະສຸກ ຕ້ອງໄດ້ເຮັດວຽກຮ່ວມກັນຢ່າງໃກ້ຊິດ ໃນການປິ່ນປົວຟື້ນຟູທາງດ້ານຮ່າງກາຍ ແລະ ຈິດໃຈ, ສະໜອງການຝຶກອົບຮົມວິຊາຊີບ ແລະ ຊອກວຽກເຮັດງານທຳ ເພື່ອສ້າງຄວາມເຂັ້ມແຂງໃຫ້ຜູ້ຖືກເຄາະຮ້າຍ ສາມາດກັບຄືນສູ່ຄອບຄົວ ແລະ ສັງຄົມໄດ້ຢ່າງປົກກະຕິ; ປັບປຸງກົນໄກການປະສານງານ ພາຍໃນຄະນະກຳມະການຕ້ານການຄ້າມະນຸດລະດັບຊາດ ແລະ ທ້ອງ ຖິ່ນໃຫ້ມີຄວາມຄ່ອງຕົວ ສາມາດລາຍງານ ແລະ ແກ້ໄຂບັນຫາໄດ້ຢ່າງທັນການ. ບັນດາກະຊວງ ແລະ ອົງການປົກຄອງທ້ອງຖິ່ນ ຕ້ອງໄດ້ເອົາໃຈໃສ່ຈັດສັນງົບປະມານພາຍໃນຂອງຕົນ ບວກໃສ່ກັບການຍາດແຍ່ງເອົາການສະໜັບສະໜູນຈາກອົງການຈັດຕັ້ງສາກົນ, ບັນດາປະເທດເພື່ອນມິດ ແລະ ພາກສ່ວນທຸລະກິດ ເພື່ອປະກອບສ່ວນເຂົ້າໃນວຽກງານດັ່ງກ່າວ ໃຫ້ມີທຶນຮອນພຽງພໍໃນການເຄື່ອນໄຫວວຽກງານຕົວຈິງ; ມອບໃຫ້ກະຊວງປ້ອງກັນຄວາມສະຫງົບ, ກະຊວງການຕ່າງປະເທດ ແລະ ພາກສ່ວນທີ່ກ່ຽວຂ້ອງ ຕ້ອງໄດ້ສືບຕໍ່ຊຸກຍູ້ ແລະ ເສີມຂະຫຍາຍການພົວພັນຮ່ວມມື ກັບບັນດາປະເທດເພື່ອນບ້ານ, ປະເທດໃນພາກພື້ນອາຊຽນ ແລະ ອົງການຈັດຕັ້ງສາກົນຢ່າງແຂງແຮງ.
ສຸມໃສ່ການແລກປ່ຽນຂໍ້ມູນຂ່າວສານ ແລະ ປະສານງານຮ່ວມມືທາງອາຍາ ລະຫວ່າງປະເທດກ່ຽວກັບການດຳເນີນຄະດີຄ້າມະນຸດ, ນຳສົ່ງຜູ້ຖືກເຄາະຮ້າຍກັບຄືນປະເທດຢ່າງປອດໄພ ບົນພື້ນຖານການປະຕິບັດຕາມສົນທິສັນຍາ ແລະ ບົດບັນທຶກຄວາມເຂົ້າໃຈ (MOU) ທີ່ ສປປ ລາວໄດ້ຮ່ວມລົງນາມຢ່າງເຂັ້ມງວດ.
ພາບ-ຂ່າວ: ຄໍາໂຖ
ຄໍາເຫັນ