ສະຫາຍ ພັນເອກ ເຟືອງໄຊ ມີລາກົງ ຮອງຫົວໜ້າກົມພົວພັນຕ່າງປະເທດຫົວໜ້າກອງເລຂາອາຊຽນ ກະຊວງປ້ອງກັນປະເທດ ໄດ້ລາຍງານຜົນສໍາເລັດກອງປະຊຸມອາຊຽນຂອງກະຊວງປ້ອງກັນປະເທດ 6 ເດືອນຕົ້ນປີ 2024 ເຫັນວ່າໄດ້ຮັບການຊີ້ນຳຢ່າງໃກ້ຊິດຈາກຂັ້ນເທິງ, ມີການສະໜອງດ້ານວຽກງານຮັບປະກັນ; ກອງເລຂາອາຊຽນຂອງກະຊວງປ້ອງກັນປະເທດ ໄດ້ມີການລາຍງານຂັ້ນເທິງຢ່າງເປັນປົກກະຕິ ແລະ ເຮັດໃຫ້ວຽກງານທີ່ຍັງຄົງຄ້າງ ໄດ້ຮັບການຊີ້ນຳຢ່າງທັນການ; ມີການປະສານສົມທົບລະຫວ່າງກອງເລຂາອາຊຽນຂອງກະຊວງປ້ອງກັນປະເທດ ແລະ ບັນດາຄະນະກຳມະການ, ອະນຸກຳມະການ ຢ່າງເປັນປົກກະຕິ; ບັນດາປະເທດສະມາຊິກອາຊຽນ ແລະ ອາຊຽນ-ບວກ ໄດ້ໃຫ້ການສະໜັບສະໜູນໃຫ້ແກ່ການເປັນປະທານ ອາຊຽນ ຂອງກະຊວງປ້ອງກັນປະເທດຂອງພວກເຮົາ; ທຸກພາກສ່ວນໄດ້ເອົາໃຈໃສ່ໃນການປະຕິບັດໜ້າວຽກຂອງຕົນຕາມການມອບໝາຍແລະສາມາດແກ້ໄຂກໍລະນີໄດ້ຕາມສະພາບຕົວຈິງ; ບັນດາກອງປະຊຸມທີ່ໄດ້ຈັດຕັ້ງໃນໄລຍະ 6 ເດືອນຕົ້ນປີນີ້ ໂດຍລວມແມ່ນໄດ້ດຳເນີນໄປດ້ວຍບັນຍາກາດທີ່ສ້າງສັນ ແລະ ຈົບລົງດ້ວຍຜົນສຳເລັດຕາມລະດັບຄາດໝາຍ.
ໂອກາດນີ້, ສະຫາຍ ພົນຕີ ສາຍໃຈ ກົມມະສິດ ໄດ້ມີຄຳເຫັນຊີ້ນຳເນັ້ນໃຫ້ກອງເລຂາອາຊຽນ ແລະ ບັນດາອະນຸກໍາມະການດ້ານຕ່າງໆ ເອົາໃຈໃສ່ປະຕິບັດຕາມໜ້າທີ່ຮັບຜິດຊອບຂອງຕົນໃຫ້ດີ ໂດຍສະເພາະດ້ານໂຄສະນາເພື່ອໃຫ້ສັງຄົມໄດ້ຮັບຮູ້ ແລະ ເຂົ້າໃຈໃນການເປັນເຈົ້າພາບ ແລະ ປະທານກອງປະຊຸມອາຊຽນ ໃນ 6 ເດືອນທ້າຍປີ 2024 ໃຫ້ມີປະສິດທິພາບ ແລະ ມີປະສິດທິຜົນສູງ.
(ຂ່າວ-ພາບ: ຄຳອ້າຍ ທອງວັນ)
ຄໍາເຫັນ