ທ່ານ ຈະເລີນ ເຢຍປາວເຮີ ກ່າວວ່າ: ມື້ນີ້, ຄະນະກຳມະການລະດັບຊາດ ປັບປຸງລັດຖະທຳມະນູນ ຈັດກອງປະຊຸມເພື່ອສະຫຼຸບຕີລາຄາ ແລະ ຖອດຖອນບົດຮຽນກ່ຽວກັບການປັບປຸງລັດຖະທຳມະນູນ ເພື່ອປິດການເຄື່ອນໄຫວວຽກງານຂອງຄະນະກຳມະການລະດັບຊາດ ປັບປຸງລັດຖະທຳມະນູນ ຂອງພວກເຮົາຢ່າງເປັນທາງການ. ພາຍຫຼັງກົມການເມືອງສູນກາງພັກປະຊາຊົນ ປະຕິວັດລາວ ໄດ້ອອກມະຕິວ່າດ້ວຍການແຕ່ງຕັ້ງຄະນະກຳມະການລະດັບຊາດ ປັບປຸງລັດຖະທຳມະນູນ ສະບັບເລກທີ 15/ກມສພ, ລົງວັນທີ 22 ພຶດສະພາ 2024 (ມາຮອດນີ້ພໍດີຄົບຮອບ 1 ປີ), ຄະນະກຳມະການລະດັບພວກເຮົາ ກໍໄດ້ພ້ອມກັນສູ້ຊົນຈັດຕັ້ງປະຕິບັດວຽກງານການປັບປຸງລັດຖະທຳມະນູນ ດ້ວຍຄວາມຮັບຜິດຊອບສູງ ໂດຍເລີ່ມຈາກການວາງແຜນວຽກ, ແຜນດໍາເນີນງານ, ການຂຶ້ນແຜນງົບປະມານ, ການແບ່ງງານພາຍໃນ, ການຈັດຕັ້ງກອງເລຂາ ແລະ ອະນຸກຳມະການຕ່າງໆ, ການປະສານສົມທົບກັບທຸກພາກສ່ວນທີ່ກ່ຽວຂ້ອງທັງສູນກາງ ແລະ ທ້ອງຖິ່ນ, ຄົ້ນຄວ້າ, ປັບປຸງຮ່າງລັດຖະທໍາມະນູນ ແລະ ຂໍທິດຊີ້ນໍາຈາກກົມການເມືອງ ແລະ ຄະນະເລຂາທິການສູນກາງພັກ, ຈາກຄະນະບໍລິຫານງານສູນກາງພັກ ເຮັດໃຫ້ວຽກງານປັບປຸງລັດຖະທຳມະນູນ ໄດ້ບັນລຸຜົນສໍາເລັດຢ່າງຈົບງາມຕາມຈຸດປະສົງຄາດໝາຍທີ່ວາງໄວ້, ສະແດງອອກໃນການລົງຄະແນນສຽງຂອງສະມາຊິກສະພາແຫ່ງຊາດ ຮັບຮອງເອົາລັດຖະທຳມະນູນ ສະບັບປີ 2025 ໃນກອງປະຊຸມສະໄໝວິສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ບັນລຸຜົນສູງເຖິງ 99.35% ຂອງຈໍານວນສະມາຊິກສະພາແຫ່ງຊາດທັງໝົດ ທີ່ເຂົ້າຮ່ວມກອງປະຊຸມ.
ໂອກາດດັ່ງກ່າວ, ທ່ານ ຈະເລີນ ເຢຍປາວເຮີ ຍັງໄດ້ກ່າວຕື່ມວ່າ: ກອງປະຊຸມມີຄວາມໝາຍສໍາຄັນຫຼາຍ ສະເໜີໃຫ້ທຸກທ່ານຈົ່ງເອົາໃຈໃສ່ຄົ້ນຄວ້າ ແລະ ປະກອບຄໍາເຫັນດ້ວຍຄວາມເອົາໃຈໃສ່ ແລະ ແທດຕົວຈິງ ຕໍ່ບົດສະຫຼຸບຕີລາຄາກ່ຽວກັບການເຄື່ອນໄຫວວຽກງານປັບປຸງລັດຖະທຳມະນູນ ຂອງຄະນະກຳມະການລະດັບຊາດ ໃຫ້ເຫັນໄດ້ຜົນສໍາເລັດ, ດ້ານດີ, ດ້ານອ່ອນ ແລະ ບົດຮຽນກ່ຽວກັບການປັບປຸງລັດຖະທາມະນູນຄັ້ງນີ້.
(ຂ່າວ-ພາບ: ແສງຈັນ)
ຄໍາເຫັນ