 |
ພິທີມອບ-ຮັບ ໄດ້ຈັດຂຶ້ນໃນວັນທີ 17 ມິຖຸນາຜ່ານມາ, ທີ່ພະແນກກະສິກໍາ ແລະ ສິ່ງແວດລ້ອມແຂວງ, ໂດຍມີທ່ານ ເດດສັກດາ ມະນີຄໍາ ຮອງປະທານຄະນະກໍາມະການປົກຄອງແຂວງເປັນຜູ້ຮັບ ພ້ອມດ້ວຍທ່ານ ແກ້ວອຸດອນ ບຸດສິງຂອນ ຮອງປະທານສະພາປະຊາຊົນແຂວງ, ມີຂະແໜງການກ່ຽວຂ້ອງ ແລະ ພາກສ່ວນສະໜັບສະໜູນເຂົ້າຮ່ວມ.
ທ່ານ ສຸກທັນວາ ຊາພູວົງ ກ່າວວ່າ: ການມອບຕົ້ນຄູນໃນຄັ້ງນີ້, ເປັນການສະແດງເຖິງຄວາມຮັບຜິດຊອບຕໍ່ສັງຄົມຂອງພາກທຸລະກິດ ແລະ ເປັນການຮ່ວມມືກັບພາກລັດ ໃນການພັດທະນາແຂວງຄໍາມ່ວນໃຫ້ມີຄວາມຈະເລີນກ້າວໜ້າ. ພ້ອມກັນນັ້ນ, ໃນຕໍ່ໜ້າສະມາຄົມນັກທຸລະກິດໜຸ່ມສະໄໝທີ 4 ພວກເຮົາພ້ອມແລ້ວຈະສືບຕໍ່ປະກອບສ່ວນ ແລະ ສະໜັບສະໜູນກິດຈະກໍາສາທາລະນະປະໂຫຍດຕ່າງໆ ເພື່ອຮ່ວມສ້າງສາ ແລະ ພັດທະນາແຂວງຄໍາມ່ວນໃຫ້ເຕີບໂຕຢ່າງເຂັ້ມແຂງ.
ສໍາລັບຕົ້ນຄູນທີ່ໄດ້ມອບໃນຄັ້ງນີ້, ຈະຖືກນໍາໄປປູກຕາມແລວເສັ້ນທາງເລກ 13 ໃຕ້ ນັບແຕ່ຈຸດຂົວມິດຕະ ພາບແຫ່ງທີ 3 ຄໍາມ່ວນ-ນະຄອນພະນົມ ຫາຫຼັກ 5 ບ້ານໂພນພິມ ພ້ອມທັງຈຸດສໍາຄັນອື່ນໆ ພາຍໃນເທສະບານເມືອງທ່າແຂກ ເພື່ອປັບປຸງຕົວເມືອງໃຫ້ມີຄວາມສວຍງາມ ແລະ ເພີ່ມພື້ນທີ່ສີຂຽວໃຫ້ຫຼາຍຂຶ້ນ.
 |
ທ່ານ ເດດສັກດາ ມະນີຄໍາ ໄດ້ກ່າວສະແດງຄວາມຂອບໃຈຕໍ່ສະມາຄົມນັກທຸລະກິດໜຸ່ມແຂວງຄໍາມ່ວນ ທີ່ໄດ້ປະກອບສ່ວນສະໜັບສະໜູນໃນຄັ້ງນີ້. ການສະໜັບສະໜູນດັ່ງກ່າວ ບໍ່ພຽງແຕ່ຊ່ວຍເສີມສ້າງຄວາມສວຍງາມໃຫ້ຕົວເມືອງເທົ່ານັ້ນ, ແຕ່ຍັງເປັນການຮ່ວມມືອັນສໍາຄັນໃນການອະນຸລັກສິ່ງແວດລ້ອມ, ເພີ່ມພື້ນທີ່ສີຂຽວ ແລະ ຟື້ນຟູຊັບພະຍາກອນປ່າໄມ້ ເພື່ອສ້າງສະພາບແວດລ້ອມທີ່ດີ ແລະ ຍືນຍົງໃຫ້ແຂວງຄໍາມ່ວນໃນອະນາຄົດ.
ຂ່າວ: ມະນີວັນ
ຄໍາເຫັນ