ກໍຍັງໄດ້ຮຽນສາຂາວິຊາກໍ່ສ້າງພັກ ຢູ່ ສສ ຫວຽດນາມ. ໃນໂອກາດທີ່ທ່ານມາເຂົ້າຮ່ວມ ພິທີສຳພາດອະດີດພະນັກງານການນໍາຂັ້ນສູງຂອງພັກ ເນື່ອງໃນໂອກາດສະເຫຼີມສະຫຼອງ 3 ວັນປະຫວັດສາດ ເມື່ອຕົ້ນເດືອນນີ້ ທີ່ແຂວງວຽງຈັນ; ທ່ານໄດ້ໃຫ້ສຳພາດເນື່ອງໃນໂອກາດວັນສ້າງຕັ້ງພັກປະຊາຊົນປະຕິວັດລາວ (ພັກປປລ) ຄົບຮອບ70ປີ (22 ມີນາ1955 – 22ມີນາ2025).
ທ່ານ ສູນທອງຄໍາ ຄູນປັນຍາ ໄດ້ສະແດງຄວາມດີອົກດີໃຈທີ່ໄດ້ມາເຂົ້າຮ່ວມພິທີສຳພາດດັ່ງກ່າວ ຊຶ່ງໄດ້ຮັບຟັງຫຼາຍເລື່ອງລາວທີ່ເປັນເຫດການສຳຄັນໃນໄລຍະຜ່ານມາ ແລະ ໄດ້ກ່າວວ່າ: ຂ້າພະເຈົ້າ ກໍເປັນພະນັກງານຜູ້ໜຶ່ງ ທີ່ກິ້ງເກືອກລີເລືອ ກັບຮາກຖານເປັນເວລາຫຼາຍສິບປີ ແລະ ໄດ້ເຮັດວຽກງານການເມືອງ-ແນວຄິດ ໃນຂົງເຂດຈັດຕັ້ງ ກໍ່ສ້າງພັກ-ພະນັກງານ, ພາຍຫຼັງຮັບບໍານານ ກໍຍັງສືບຕໍ່ເຄື່ອນໄຫວຢູ່ຂັ້ນບ້ານ ຂັ້ນຮາກຖານ ເພື່ອໃຫ້ຄໍາປຶກສາ ຊຸກຍູ້ຊ່ວຍເຫຼືອ ໃຫ້ການຈັດຕັ້ງມີການປັບປຸງແກ້ໄຂວຽກງານຕ່າງໆ. ຢ່າງໃດກໍດີ, ເມື່ອມາເບິ່ງສະພາບລວມຂອງການກໍ່ສ້າງພັກ-ພະນັກງານ ຊຶ່ງເຫັນວ່າໃນທົ່ວແຂວງ ກໍມີບັນຍາກາດຟົດຟື້ນ, ມີການກະກຽມກອງປະຊຸມໃຫຍ່ ໃນຂັ້ນຕ່າງໆ; ພາຍໃຕ້ການນໍາພາຂອງພັກ ສະພາບລວມດ້ານເສດຖະກິດຂອງແຂວງ ໂດຍສະເພາະຢູ່ບັນດາເມືອງ ກໍເຫັນວ່ານັບມື້ມີການພັດທະນາ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນ.
ສະມາຊິກພັກທຸກສະຫາຍ ມີຄວາມສຳຄັນຫຼາຍ ຕໍ່ກັບການເຮັດວຽກງານການເມືອງ-ແນວຄິດ ໃນຂົງເຂດກໍ່ສ້າງພັກ-ພະນັກງານ ແລະ ສຶກສາວຽກງານການເມືອງ-ແນວຄິດ ໃຫ້ແກ່ປະຊາຊົນບັນດາເຜົ່າ; ສະນັ້ນ, ຕ້ອງໄດ້ສ້າງສະມາຊິກພັກຢູ່ຂັ້ນຮາກຖານ ໃຫ້ມີຄວາມເປັນແບບຢ່າງ ແລະ ມີຄວາມຮູ້ຄວາມສາມາດ ສົມກັບຜູ້ນໍາພາຢູ່ຂັ້ນຮາກຖານ ຊຶ່ງທ່ານສູນທອງຄໍາຄູນປັນຍາກໍມີຄວາມຄິດເຫັນວ່າ: ໃນລະບົບການເມືອງຂອງປະເທດເຮົາ, ພັກເປັນແກນນໍາໃນລະບົບການເມືອງ ຖ້າຢາກໃຫ້ທຸກວຽກງານ ເດີນແມ່ນແລ່ນສະດວກນັ້ນ ກ່ອນອື່ນໝົດຄະນະພັກ-ສະມາຊິກພັກ ຕ້ອງປັບປຸງຕົນເອງ ຊຶ່ງຕ້ອງເປັນແບບຢ່າງ, ຕ້ອງໃຫ້ມີຄວາມຮູ້ຄວາມສາມາດ, ຕ້ອງມີຄວາມຕື່ນຕົວ ເພາະບັນດາປະກົດການໃນກົມກອງ, ທ້ອງຖິ່ນ ທັງໝົດລ້ວນແຕ່ພົວພັນເຖິງການນໍາພາຂອງພັກ ກາຍເປັນແກນນໍາຂອງການຈັດຕັ້ງພັກຢູ່ບ່ອນນັ້ນ; ຖ້າການຈັດຕັ້ງພັກຢູ່ບ່ອນໃດເຄື່ອນໄຫວດີ ປະຊາຊົນໄດ້ຮັບການສຶກສາອົບຮົມ, ຢູ່ບ່ອນນັ້ນປະກົດການຫຍໍ້ທໍ້ ກໍຈະບໍ່ມີ.
ສະນັ້ນ, ສະມາຊິກພັກທຸກສະຫາຍ ບໍ່ວ່າຈະໃນຖານະໃດ ກໍຕ້ອງເປັນແບບຢ່າງ ແລະ ມີຄວາມຮູ້ຄວາມສາມາດ ເພື່ອດຳເນີນບົດບາດນໍາພາ ໃນຖານະເປັນແບບຢ່າງຜູ້ນໍາໜ້າ ທີ່ຈັດຕັ້ງເຄື່ອນໄຫວໃນກົມກອງ, ທ້ອງຖິ່ນຕົນ ປະກອບສ່ວນເສີມຂະຫຍາຍພັກ, ສ້າງຄວາມເຊື່ອໝັ້ນຂອງປະຊາຊົນ ທີ່ມີຕໍ່ພັກ, ຕໍ່ລັດ ໃນການນໍາພາວຽກງານຕ່າງໆ ປະເທດຊາດຈຶ່ງໄດ້ຮັບການພັດທະນາ ປະຊາຊົນກໍໄດ້ຮັບການປັບປຸງຊີວິດການເປັນຢູ່ໃຫ້ດີຂຶ້ນເປັນກ້າວໆ.
ຄໍາເຫັນ