ສະມາຊິກສະພາປະຊາຊົນແຂວງໄຊຍະບູລີ ເຄື່ອນໄຫວວຽກງານຢູ່ເມືອງພຽງ

ສະມາຊິກສະພາປະຊາຊົນແຂວງໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດລັດຖະທໍາມະນູນ, ກົດຫມາຍ ແລະ ມະຕິກອງປະຊຸມ ປະຈໍາປີ 2023 ຂອງຄະນະສະມາຊິກສະພາແຫ່ງຊາດ ແລະ ມະຕິກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຊຸດທີ II ທີ່ເມືອງພຽງ ແຂວງໄຊຍະບູລີ ຫວ່າງບໍ່ດົນມານີ້ ຊຶ່ງນຳໂດຍທ່ານ ບຸນໄທ ສີເທບ ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນແຂວງໄຊຍະບູລີ ຊຸດທີ II ພ້ອມຄະນະ, ໂດຍໃຫ້ການຕ້ອນຮັບຂອງ ທ່ານ ເສີດ ແສງສຸລິນ ເຈົ້າເມືອງໆພຽງ, ມີບັນດາທ່ານສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງ, ທ່ານຫົວໜ້າ, ຮອງຫົວໜ້າຫ້ອງການ, ຂົງເຂດເສດຖະກິດ, ແຜນການແລະ ການເງິນ, ຂົງເຂດວັດທະນະທຳ-ສັງຄົມ ແລະ ບັນດາເຜົ່າ, ຂົງເຂດຍຸຕິທຳ ພາກສ່ວນກ່ຽວຂ້ອງເຂົ້າຮ່ວມ.
ໃນໂອກາດນີ້, ທ່ານເຈົ້າເມືອງໆພຽງ ໄດ້ລາຍງານຫຍໍ້ກ່ຽວກັບສະພາບການພັດທະນາເສດຖະກິດ-ສັງຄົມຢູ່ພາຍໃນເມືອງຕໍ່ການລົງມາຕິດຕາມຊຸກຍູ້ໃນເທື່ອນີ້ ໂດຍໄດ້ຍົກໃຫ້ເຫັນການຈັດຕັ້ງປະຕິບັດວຽກງານແຕ່ລະຂົງເຂດຢູ່ພາຍໃນເມືອງ ແລະ ໃນໄລຍະ 9 ເດືອນຜ່ານມາ ໂດຍລວມແລ້ວເມືອງພຽງແມ່ນສາມາດຮັກສາໄດ້ສະຖຽນລະພາບທາງດ້ານການເມືອງ, ສັງຄົມຍັງສືບຕໍ່ມີຄວາມສະຫງົບປອດໄພໂດຍພື້ນຖານເສດຖະກິດກໍໄດ້ຮັບການພັດທະນາຢ່າງຕໍ່ເນື່ອງສາມາດຈັດເກັບລາຍຮັບເຂົ້າງົບປະມານໄດ້ທັງໝົດ 3,05 ຕື້ກີບ, ໃນນີ້ ຮັບຈາກສ່ວຍສາອາກອນ 2,88 ຕື້ກີບ, ຮັບຈາກຊັບສິນ 174,48 ລ້ານກີບ. ປະຕິບັດລາຍຈ່າຍທັງໝົດ 2,61 ຕື້ກີບ: ຈ່າຍບໍລິຫານ 2,09 ຕື້ກີບ, ຈ່າຍດັດສົມສົ່ງເສີມ 524,6 ລ້ານກີບ ແລະ ດຸ່ນດ່ຽງໃຫ້ແຂວງ 100 ລ້ານກີບ. ມູນຄ່າການນໍາເຂົ້າ-ສົ່ງອອກ: ສົ່ງອອກສິນຄ້າໄດ້ທັງໝົດ 172,7 ຕື້ກີບ  ທຽບໃສ່ໄລຍະດຽວກັນປີຜ່ານມາ ເພີ່ມຂຶ້ນ 1,5 ເທົ່າຕົວ, ຄຸ້ມຄອງການນໍາເຂົ້າສິນຄ້າໄດ້ 224,8 ຕຶື້ກີບ ທຽບໃສ່ແຜນການປີປະຕິບັດໄດ້ 106% ດ້ານແຫຼ່ງທຶນເພື່ອການພັດທະນາ: ໄດ້ເອົາໃຈໃສ່ຊຸກຍູ້ຕິດຕາມໂຄງການລົງທຶນພາຍໃນເມືອງທັງໝົດ 43 ໂຄງການ ມູນຄ່າ181,10 ຕື້ກີບ ທຽບໃສ່ແຜນການປີປະຕິບັດລື່ນຄາດໝາຍ 20 ໂຄງການ. ໃນນີ້; ໂຄງການລົງທຶນຂອງເອກະຊົນພາຍໃນ ແລະ ຕ່າງປະເທດ 14 ໂຄງການມູນຄ່າ 141,98 ຕື້ກີບ; ໂຄງການລົງທຶນທີ່ລັດຖະບານອະນຸມັດ 2 ໂຄງການມູນຄ່າ 6,04 ຕື້ກີບ; ໂຄງການລົງທຶນຊ່ວຍເຫຼືອຈາກອົງການຈັດຕັ້ງສາກົນ 19 ໂຄງການມູນຄ່າ 26,95 ຕື້ກີບ, ໂຄງການລົງທຶນຂອງປະຊາຊົນ 5 ໂຄງການມູນຄ່າ 668,55 ລ້ານກີບ, ໂຄງການປະກອບສ່ວນຈາກພາກສ່ວນສັງຄົມ 2 ໂຄງການມູນຄ່າ 851,92 ລ້ານກີບ ແລະ ໂຄງການລົງທຶນທີ່ນຳໃຊ້ງົບປະມານຂອງເມືອງ 1 ໂຄງການມູນຄ່າ 4,6 ຕື້ກີບ. ວຽກງານກະສິກຳ-ປ່າໄມ້: ຊຸກຍູ້ການຜະລິດເຂົ້ານາແຊງໄດ້ທັງໝົດ 4.991,39 ໂຕນ, ຊຸກຍູ້ການຜະລິດເຂົ້ານາປີໄດ້ທັງໝົດ 6.887,60 ເຮັກຕາເທົ່າກັບ 100,11% ຂອງເນື້ອທີ່ແຜນການ ແລະ ຕິດຕາມການຜະລິດເຂົ້າໄຮ່ ເນື້ອທີ່ 545,7 ເຮັກຕາ, ໄດ້ຊຸກຍູ້ການຜະລິດພືດສະບຽງປະຕິບັດໄດ້ທັງໝົດ 10.000 ກວ່າເຮັກຕາ ຂອງເນື້ອທີ່ແຜນການປີ, ພືດເປັນສິນຄ້າເນື້ອທີ່ 19.500 ກວ່າເຮັກຕາ, ຊຸກຍູ້ຕິດຕາມການປູກໄມ້ໃຫ້ໝາກ 257,5 ເຮັກຕາ,  ດ້ານການລ້ຽງສັດກໍໄດ້ມີການຂະຫຍາຍຕົວ ແລະ ໄດ້ຫັນຈາກການລ້ຽງແບບທຳມະຊາດກະແຈກກະຈາຍມາລ້ຽງແບບເປັນກຸ່ມ, ເປັນຟາມຕິດພັນກັບການປູກຫຍ້າອາຫານສັດ ແລະ ຕາໜ່າງສັດຕະວະແພດ, ເຮັດໃຫ້ຝູງສັດຂະຫຍາຍຕົວເພີ່ມຂຶ້ນສະເລ່ຍ 14,74%, ທົ່ວເມືອງມີສັດລ້ຽງທັງໝົດ 1.533.278 ໂຕ, ທຽບໃສ່ແຜນການປີປະຕິບັດໄດ້ 59,65% ສາມາດຕອບສະໜອງຊີ້ນ, ໄຂ່ ແລະ ປາ ໄດ້ 3.516.427 ກິໂລ, ສະເລ່ຍໃສ່ຫົວຄົນ 53,90 ກິໂລ/ຄົນ/9 ເດືອນ, ທຽບໃສ່ແຜນປີປະຕິບັດໄດ້ 94,57%. ໃນໄລຍະ 9 ເດືອນຜ່ານມາສາມາດສົ່ງອອກສິນຄ້າພືດກະສິກຳໄດ້ທັງໝົດ 56.166,71 ໂຕນ, ສິນຄ້າສົ່ງອອກສ່ວນຫຼາຍແມ່ນ: ໝາກເດືອຍ, ມັນຕົ້ນ,                   ໝາກກ້ວຍ, ຖົ່ວເຫຼືອງ, ເຂົ້າ; ຢັ້ງຢືນການເຄື່ອນຍ້າຍສັດ ຈຳນວນ 31.644 ໂຕ, ທຽບໃສ່ແຜນການປີປະຕິບັດໄດ້ 83,27%. ຄຽງຄູ່ກັບວຽກງານຂົງເຂດຕ່າງໆກໍໄດ້ຮັບການຈັດຕັ້ງປະຕິບັດໄດ້ມີຜົນສຳເລັດຕາມຄາດ            ໝາຍ ແລະ ໃນໂອກາດນີ້ ບັນດາຜູ້ເຂົ້າຮ່ວມຍັງໄດ້ປະກອບຄຳຄິດເຫັນ ແລະ ສະເໜີຕໍ່ສະພາເພື່ອເປັນບ່ອນອີງໃນການປັບປຸງແກ້ໄຂບັນຫາຄົງຄ້າງ ໃຫ້ໄດ້ຮັບການຄົ້ນຄວ້າພິຈາລະນາ ແລະ ຮັບຮອງ, ເພື່ອສືບຕໍ່ປັບປຸງແກ້ໄຂໃນຕໍ່ໜ້າເຮັດໃຫ້ເມືອງພຽງໄດ້ຮັບການພັດທະນາດີຂຶ້ນ ແລະ ໃນໂອກາດນີ້ຄະນະທີມງານສະພາປະຊາຊົນແຂວງຍັງໄດ້ໄປຢ້ຽມຢາມໂຮງງານກັ່ນນ້ຳມັນປາມຢູ່ບ້ານໂພນສະຫວ່າງ ຕື່ມອີກ. 
(ຂ່າວ-ພາບ: ແສງສຸດາ ກິ່ງສະຫວັດ)