ທ້າຍອາທິດຜ່ານມານີ້ ຢູ່ທີ່ພະແນກແຜນການ ແລະ ການລົງທຶນ ແຂວງຫຼວງນ້ຳທາ ໄດ້ຈັດກອງປະຊຸມ ປິດໂຄງການພັດທະນາໂຄງລ່າງຊົນນະບົດພາກເໜືອ-ທຶນເພີ່ມປະຈຳແຂວງ ໂດຍການເປັນປະທານຂອງ ທ່ານ ອ່ອນຈັນ ຄຳພາວົງ ຮອງເຈົ້າແຂວງຫຼວງນ້ຳທາ, ມີທ່ານ ວິນວິໄລ ໄຊຍະພອນ ຮອງຫົວໜ້າກົມຊົນລະປະທານ ກະຊວງກະສິກຳ ແລະ ປ່າໄມ່, ມີພາກສ່ວນກ່ຽວຂ້ອງຈາກແຂວງ, ເມືອງເຂົ້າຮ່ວມ.
ທ່ານ ສອນໄຊ ອຸດົມ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງຫຼວງນໍ້າທາ ໄດ້ຜ່ານບົດລາຍ ງານການຈັດຕັ້ງປະຕິບັດວຽກງານຂອງໂຄງການພັດທະນາໂຄງລ່າງຊົນນະບົດພາກເໜືອ ໂດຍໄດ້ຮັບການອະນຸມັດຊ່ວຍເຫຼືອລ້າ ໃນປີ 2017 ຈາກ ທະນາຄານ ADB, ມູນຄ່າໂຄງການທັງໝົດ 37 ລ້ານ 6 ແສນໂດລາ. ໃນນີ້, ທຶນລັດຖະບານສົມທົບ 2 ລ້ານໂດລາ ໄລຍະເວລາຂອງໂຄງການແມ່ນ 6 ປີເຄີ່ງ. ໂຄງການນີ້ ປະຕິບັດຢູ່ 4 ແຂວງພາກເໜືອຄື: ແຂວງຫຼວງນ້ຳທາ, ບໍ່ແກ້ວ, ອຸດົມໄຊ ແລະ ແຂວງຜົ້ງສາລີ. ສໍາລັບຢູ່ແຂວງຫຼວງນໍ້າທາ ບັນດາໂຄງການຍ່ອຍ ປະຕິບັດຢູ່ 3 ເມືອງເປັນຕົ້ນ ເມືອງຫຼວງນໍ້າທາ, ເມືອງສີງ ແລະ ເມືອງລອງ ແຕ່ລະເມືອງໄດ້ຮັບການລົງທຶນໃສ່ການກໍ່ສ້າງພື້ນຖານໂຄງລ່າງທີ່ຈຳເປັນໂດຍສະເພາະແມ່ນໂຄງລ່າງດ້ານຊົນລະປະທານ ເມືອງລະ 2 ໂຄງການ ສ່ວນເມືອງລອງມີເສັ້ນທາງຊົນນະບົດ ເພື່ອເຊື່ອມຕໍ່ເຂດຜະລິດກະສິກໍາອອກສູ່ຕະຫຼາດ ແລະ ເສັ້ນທາງຂົນສົ່ງທາງນ້ຳ ການສ້າງຄວາມເຂັ້ມແຂງໃຫ້ແກ່ກຸ່ມຜູ້ຊົມໃຊ້ນ້ຳໃນໄລຍະຜ່ານມາໄດ້ຈັດຝືກອົບຮົມໃຫ້ຄະນະກຸ່ມ 17 ກຸ່ມ ແລະ ສະມາຊິກກຸ່ມກ່ຽວກັບການບໍລິຫານກຸ່ມການບໍາລຸງຮັກສາຊົນລະປະທານການວາງແຜນການຜະລິດ ສ້າງຕັ້ງກຸ່ມຊົມໃຊ້ນ້ຳ ການສາທິດດ້ານກະສິກຳ (ການຍົກສະມັດຕະພາບເຂົ້າ) ແຕ່ລະໜ້າວຽກຂອງໂຄງການໄດ້ຈັດຕັ້ງປະຕິບັດສຳເລັດ 100% ແລະ ມອບໃຫ້ກຸ່ມເປັນຜູ້ນໍ້າໃຊ້ ເພື່ອຕອບສະໜອງການຜະລິດສະບຽງອາຫານ ແລະ ການຜະລິດເປັນສີນຄ້າ ເພື່ອສ້າງລາຍຮັບໃຫ້ແກ່ປະຊາຊົນ ເຮັດໃຫ້ປະຊາຊົນມີຊີວິດການເປັນຢູ່ນັບມື້ນັບດີຂຶ້ນ.
(ຂ່າວ: ມຸນຕີ)
ຄໍາເຫັນ