ສຳເລັດກອງປະຊຸມ ແມ່ຍິງທົ່ວເມືອງປະທຸມພອນ ຄັ້ງທີ IX

ກອງປະຊຸມໃຫຍ່ຜູ້ແທນແມ່ຍິງທົ່ວເມືອງປະທຸມພອນ ແຂວງຈຳປາສັກ ຄັ້ງທີ IX ໄດ້ໄຂຂຶ້ນໃນວັນທີ 14 ກຸມພາ ຜ່ານມາ ທີ່ສະໂມສອນຂອງເມືອງ ພາຍໃຕ້ການເປັນປະທານຂອງສະຫາຍ ວຽງສະໄໝ ສີລິພອນພັນ ກຳມະການພັກແຂວງ ເລຂາພັກເມືອງ ເຈົ້າເມືອງປະທຸມພອນ, ສະຫາຍ ນາງ ເຕດາວັນ ແກ້ວພິລາວັນ ກຳມະການພັກແຂວງ ປະທານຄະນະບໍລິຫານງານສະຫະພັນແມ່ຍິງ ແຂວງຈຳປາສັກ, ມີສະຫາຍ ນາງ ຄຳມອນ ຊາມົນຕີ ຮອງເລຂາພັກເມືອງ (ຜູ້ຊີ້ນຳວຽກງານການເມືອງແນວຄິດພັກ ແລະ ພະນັກງານ), ມີແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້. ໄດ້ຕີລາຄາຢ່າງພາວະວິໄສຕໍ່ຜົນສຳເລັດ ໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VIII ຂອງສະຫະພັນແມ່ຍິງເມືອງປະທຸມພອນ ໂດຍໄດ້ຍົກໃຫ້ເຫັນຜົນງານດ້ານພົ້ນເດັ່ນທີ່ຄວນສົ່ງເສີມ ແລະ ດ້ານອ່ອນ, ຂໍ້ຄົງຄ້າງທີ່ຈະສູ້ຊົນແກ້ໄຂໃນຕໍ່ໜ້າ; ຮັບຮອງເອົາທິດທາງ ແລະ ໜ້າທີ່ຂອງສະຫະພັນແມ່ຍິງເມືອງປະທຸມພອນ.
ກອງປະຊຸມໄດ້ຮັບຮອງເອົາບົດສຳຫຼວດການນຳພາຂອງຄະນະບໍລິຫານງານ ສະຫະພັນແມ່ຍິງເມືອງປະທຸມພອນ ສະໄໝທີ VIII ທີ່ໄດ້ຕີລາຄາຕໍ່ການຊີ້ນຳ-ນຳພາ ຂະບວນການແມ່ຍິງຕາມພາລະບົດບາດໜ້າທີ່ຂອງຄະນະບໍລິຫານງານທີ່ໄດ້ກຳນົດໄວ້ໃນກົດລະບຽບຂອງສະຫະພັນແມ່ຍິງລາວ. ພ້ອມທັງໄດ້ຮັບຟັງການປະກອບຄຳເຫັນຈາກຮາກຖານສະຫະພັນແມ່ຍິງໃນຫົວຂໍ້ການຈັດຕັ້ງປະຕິບັດຂໍ້ແຂ່ງຂັນ 3 ດີ ແລະ ຕາງໜ້າຄອບຄົວຕົວແບບດ້ານເສດຖະກິດ. ຊຶ່ງເປັນການຢັ້ງຢືນຕື່ມຕໍ່ຜົນສໍາເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VIII ຂອງສະຫະພັນແມ່ຍິງເມືອງ ທັງສະແດງເຖິງຄວາມເອົາໃຈໃສ່ຂອງຄະນະພັກຕໍ່ການພັດທະນາ ແລະ ປົກປ້ອງສິດຜົນປະໂຫຍດອັນຊອບທຳຂອງແມ່ຍິງ ແລະ ເດັກນ້ອຍ.
ໂອກາດນີ້. ຜູ້ແທນແມ່ຍິງສົມບູນກໍ່ໄດ້ໃຊ້ສິດປະຊາທິປະໄຕຂອງຕົນເອງປ່ອນບັດເລືອກຕັ້ງເອົາຄະນະບໍລິຫານງານສະຫະພັນແມ່ຍິງເມືອງປະທຸມພອນ ຄັ້ງທີ IX (ຊຸດໃໝ່) ຊຶ່ງມີຜູ້ລົງສະໝັກ 25 ສະຫາຍ. ກອງປະຊຸມຄົບຄະນະຄັ້ງປະຖົມມະລຶກ ໄດ້ເປັນເອກະສັນກັນເລືອກເອົາ ຄະນະບໍລິຫານງານ ສະຫະພັນແມ່ຍິງເມືອງປະທຸມພອນ ຄັ້ງທີ IX ຈຳນວນ 21 ສະຫາຍ. ໃນນັ້ນ, ໄດ້ເລືອກເອົາສະຫາຍ ນາງ ຂັນແກ້ວ ອັກຄະວົງ ເປັນປະທານ,  ເລືອກເອົາສະຫາຍ ພູຂັນ ສິດທິເສນ ເປັນຮອງປະທານ ທັງເປັນປະທານກວດກາ ແລະ ເລືອກເອົາ ສະຫາຍ ນາງ ເພັດສະໝອນ ເທບສຸລິນທອນ ເປັນຮອງປະທານ.
(ຂ່າວ-ພາບ: ສີສົມບູນ ວົງວຽງຄຳ)