ກອງປະຊຸມຄະນະກຳມະການຊາຍແດນ ລາວ-ມຽນມາ ຂັ້ນເຂດ-ແຂວງ ຄັ້ງທີ 12, ໄດ້ຈັດຂຶ້ນໃນອາທິດຜ່ານມາ ຢູ່ທີ່ແຂວງທ່າຂີ້ເຫຼັກ ປະເທດມຽນມາ, ຝ່າຍລາວນໍາໂດຍ ທ່ານ ພັນເອກ ທອງໄຂ ສີຍາລາດ ຫົວໜ້າການທະຫານກອງບັນຊາການທະຫານແຂວງບໍ່ແກ້ວ ຫົວໜ້າຄະນະກຳມະການຊາຍແດນ ລາວ-ມຽນມາ ແລະ ຝ່າຍມຽນມານຳໂດຍ ທ່ານ ພັນໂທ ຕ້ານລາຍວິນ ຮັກສາການຫົວໜ້າກອງບັນຊາການທະຫານແຂວງທ່າຂີ້ເຫຼັກ ກອງທັບພາກສາມຫຼ່ຽມ ປະເທດມຽນມາ, ມີຄະນະກຳມະການຊາຍແດນແຫ່ງຊາດ, ຄະນະກົມພົວພັນຕ່າງປະເທດ, ກົມທະຫານຊາຍແດນ, ສອງກອງບັນຊາການ ທະຫານ-ຕຳຫຼວດ ບໍ່ແກ້ວ-ຫຼວງນ້ຳທາ, ກອງພົນທີ 3 ແລະ ພະແນກການທີ່ກ່ຽວຂ້ອງ ຕະຫຼອດຮອດ ຄະນະຜູ້ແທນສອງຝ່າຍເຂົ້າຮ່ວມ.
ກອງປະຊຸມໄດ້ຮັບຟັງການລາຍງານຈາກຄະນະທັງສອງຝ່າຍໃນການຈັດຕັ້ງປະຕິບັດການປະສານງານທີ່ຜ່ານມາ, ທັງເປັນການແລກປ່ຽນຄວາມຄິດເຫັນ, ຂໍ້ມູນຂ່າວສານ ແລະ ປຶກສາຫາລືການແກ້ໄຂບັນຫາຢາເສບຕິດຮ່ວມກັນລະຫວ່າງສອງປະເທດ ລາວ-ມຽນມາ ຊຶ່ງໄລຍະຜ່ານມາ ເຫັນວ່າທັງສອງຝ່າຍໄດ້ຕັ້ງໜ້າ ແລະ ເອົາໃຈໃສ່ຈັດຕັ້ງຜັນຂະຫຍາຍແຜນການຮ່ວມມືລະຫວ່າງຊາດເປັນປະຈຳ ທັງໄດ້ມີການສະກັດກັ້ນ, ແກ້ໄຂຈັບກຸ່ມຜູ້ກະທຳຜິດຄ້າຂາຍຢາເສບຕິດ, ເຂົ້າ-ອອກເມືອງຜິດກົດໝາຍ, ການກໍ່ອາສະຍາກຳຂ້າມຊາດ, ຄ້າມະນຸດໄດ້ຢ່າງຕໍ່ເນື່ອງ ເຮັດໃຫ້ບໍລິເວນຊາຍແດນມີຄວາມເປັນລະບຽບຮຽບຮ້ອຍດີ.
ກອງປະຊຸມຄັ້ງນີ້, ທັງສອງຝ່າຍກໍໄດ້ປຶກສາຫາລືວຽກ ເປັນເອກະພາບກັນມີຫຼາຍເນື້ອໃນ, ຫຼາຍບັນຫາທີ່ສຳຄັນ, ອັນເປັນການປະກອບສ່ວນສຳຄັນເຂົ້າໃນການແກ້ໄຂບັນຫາຕ່າງໆ ຕາມຊາຍແດນ ລາວ-ມຽນມາ, ໃຫ້ດີຂຶ້ນ ຊຶ່ງສະແດງໃຫ້ເຫັນເຖິງນະໂຍບາຍຂອງລັດຖະບານ ແລະ ກອງທັບທັງສອງປະເທດລາວ-ມຽນມາ ໃນການແກ້ໄຂບັນຫາປາກົດການຫຍໍ້ທໍ້່ຕ່າງໆ ຕາມຊາຍແດນ ລາວ-ມຽນມາ ໃຫ້ມີຄວາມສະຫງົບ.
(ຂ່າວ-ພາບ: ວໍລະສິດ ພິດສະຫາຍ)
ຄໍາເຫັນ