ສຳເລັດກອງປະຊຸມສາກົນຂອງພັກກອມມູນິດ ແລະ ກໍາມະກອນ (IMCWP)ຄັ້ງທີ 23 ແລະ ກອງປະຊຸມໜ່ວຍງານວິຊາການ(IMCWP)

ຄະນະຜູ້ແທນພັກ ປປ ລາວ ນໍາໂດຍ ສະຫາຍ ວາລະໄຊ ເລັ່ງສະຫວັດ,ຮອງຫົວໜ້າຄະນະພົວພັນຕ່າງປະເທດສູນກາງພັກພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມສາກົນຂອງບັນດາພັກກອມມູນິດ ແລະ ກໍາມະກອນ (IMCWP)ຄັ້ງທີ 23 ພາຍໃຕ້ຫົວຂໍ້ “ການຕໍ່ສູ້ທາງການເມືອງ ແລະ ອຸດົມການ ເພື່ອປະເຊີນໜ້າກັບລັດທິທຶນນິຍົມ ແລະ ລັດທິຈັກກະພັດນິຍົມ. ພາລະກິດຂອງຊາວກອມມູນິດ ໃນການແຈ້ງຂໍ້ມູນຂ່າວສານ ແລະ ຂົນຂວາຍ ຊົນຊັ້ນກຳມະກອນ, ຊາວໜຸ່ມ, ແມ່ຍິງ ແລະ ປັນຍາຊົນ ໃນການຕໍ່ສູ້ຕ້ານການກົດຂີ່ຂູດຮີດ, ການປາບປາມ, ກົນອຸບາຍ ຂອງຈັກກະພັດ ແລະ ລັດທິແກ້ປະຫວັດສາດ; ເພື່ອສິດປະຊາທິປະໄຕ ແລະ ສິດທິສັງຄົມຂອງຊາວຜູ້ອອກແຮງງານ ແລະ ປະຊາຊົນ; ຕ້ານລັດທິຂຸນເສິກ ແລະ ສົງຄາມ, ເພື່ອສັນຕິພາບ ແລະ ສັງຄົມນິຍົມ”ແລະ ກອງປະຊຸມໜ່ວຍງານ ວິຊາການຂອງ IMCWPຊຶ່ງໄດ້ຈັດຂຶ້ນໃນລະຫວ່າງວັນທີ 19-22ຕຸລາ 2023 ຢູ່ ອິສເມຍ,ປະເທດຕວັກກີ, ໂດຍການເປັນເຈົ້າພາບຂອງພັກກອມມູນິດຕວັກກີ ແລະ ມີຄະນະຜູ້ແທນຈາກບັນດາພັກກອມມູນິດ ແລະ ກໍາມະກອນ, ຂະບວນການຝ່າຍຊ້າຍ ແລະ ຂະບວນການກ້າວໜ້າໃນໂລກ ທີ່ມາຈາກ 68ພັກການເມືອງ,ຈາກ 54ປະເທດ  ແລະ ອີກ 7 ພັກການເມືອງອື່ນເຂົ້າຮ່ວມ. 
ກອງປະຊຸມຄັ້ງນີ້ ມີຄວາມໝາຍສຳຄັນ ສຳລັບພັກ ປປ ລາວ ເນື່ອງຈາກພັກ ປປ ລາວ ໄດ້ເຂົ້າຮ່ວມໃນນາມສະມາຊິກໜ່ວຍງານວິຊາການ (IMCWP Working Group) ພາຍຫຼັງໄດ້ຖືກຮັບຮອງເຂົ້າເປັນສະມາຊິກ ໃນກອງປະຊຸມ IMCWPຄັ້ງທີ 22ທີ່ ນະຄອນຫຼວງ ລາຮາວານ, ສ. ກູບາ. ໃນກອງປະຊຸມ, ບັນດາຜູ້ແທນໄດ້ປະກອບຄຳເຫັນຢ່າງກົງໄປກົງມາ ແລະ ສ້າງສັນ, ຍົກໃຫ້ເຫັນ ຄວາມຈຳເປັນໃນການສືບຕໍ່ເຄື່ອນໄຫວຮ່ວມກັນເພື່ອເສີມສ້າງກຳລັງແຮງຂອງຂະບວນການກອມມູນິດ ແລະ ກຳມະກອນໃນໂລກ ໃນການຕໍ່ສູ້ຕ້ານພວກນາຍທຶນ ແລະ ລັດທິຈັກກະພັດນິຍົມ; ເພື່ອປົກປ້ອງສິດທິ ແລະ ເສລີພາບຂອງຊົນຊັ້ນກຳມະກອນ ແລະ ປະຊາຊົນຊາວຜູ້ອອກແຮງງານໃນທົ່ວໂລກ, ເພື່ອສັນຕິພາບ ແລະ ສັງຄົມນິຍົມ. 
ໃນກອງປະຊຸມ,ຫົວໜ້າຄະນະຜູ້ແທນພັກ ປປ ລາວ ໄດ້ປະກອບຄຳເຫັນ ໂດຍໄດ້ຍົກໃຫ້ເຫັນສະພາບພາກພື້ນ ແລະ ສາກົນ ທີ່ກໍາລັງຜັນແປໄປຢ່າງໄວວາ, ສັບສົນ ແລະ ຄາດຄະເນໄດ້ຍາກ,  ຄວາມພະຍາຍາມມ້າງເພທໍາລາຍກໍາລັງກອມມູນິດ, ກໍາມະກອນ ແລະ ຂະບວນການທີ່ກ້າວໜ້າໃນໂລກ ໂດຍພວກນາຍທຶນ ແລະ ລັດທິຈັກກະພັດ ດ້ວຍກົນອຸບາຍຕ່າງໆ;  ດໍາເນີນກົນອຸບາຍຍຸດທະສາດຫັນປ່ຽນໂດຍສັນຕິ, ສ້າງບັນດາປັດໃຈ ແລະກຳລັງຕ້ານການປະຕິວັດຢູ່ພາຍໃນປະເທດ ເພື່ອມ້າງເພທຳລາຍການນຳພາ ຂອງພັກກອມມູນິດ, ກໍາມະກອນ ແລະ ຂະບວນການກ້າວໜ້າ ຢູ່ປະເທດຕ່າງໆ; ຮຽກຮ້ອງໃຫ້ບັນດາພັກກອມມູນິດ, ກໍາມະກອນ ແລະ ຂະບວນການກ້າວໜ້າ ໃນໂລກເພີ່ມທະວີຄວາມຮັບຜິດຊອບ ແລະ ຄວາມສາມັກຄີກັນຢ່າງເດັດດ່ຽວ ໃນການເຄື່ອນໄຫວຮ່ວມກັນ ໃນຖານະເປັນກໍາລັງການເມືອງທີ່ສໍາຄັນ ເພື່ອຕໍ່ສູ້ຕ້ານລັດທິທຶນນິຍົມ ແລະ ລັດທິຈັກກະພັດນິຍົມ; ເນັ້ນໜັກຄວາມສໍາຄັນຂອງສັນຕິພາບ, ຊຶ່ງແມ່ນຄວາມມຸ່ງມາດປາດຖະໜາຂອງມວນມະນຸດ ທັງແມ່ນປັດໄຈທີ່ຂາດບໍ່ໄດ້ ຂອງການພັດທະນາ ຂອງມະນຸດຊາດ; ຢືນຢັນຄືນນະໂຍບາຍການຕ່າງປະເທດອັນສະເໝີຕົ້ນ ສະເໝີປາຍ ຂອງພັກ ປປ ລາວ, ສືບຕໍ່ປະກອບສ່ວນເຂົ້າໃນການຕໍ່ສູ້ຮ່ວມກັບປະຊາຄົມໂລກ ເພື່ອສັນຕິພາບ ແລະ ຄວາມກ້າວໜ້າທາງສັງຄົມ.
ກອງປະຊຸມສາກົນຄັ້ງນີ້ປະສົບຜົນສຳເລັດຢ່າງຈົບງາມ, ໂດຍໄດ້ເປັນເອກະພາບກັນຮັບຮອງເອົາສະມາຊິກໃໝ່ເຂົ້າໃນກຸ່ມໂຊລິດເນັດ ເພີ່ມອີກ 2 ພັກ ຄື: ພັກກອມມູນິດເຄນຢາ ແລະ ພັກຂະບວນການກ້າວໜ້າກູເວດ; ໄດ້ຮັບຮອງເອົາແຜນປະຕິບັດງານຂອງກອງປະຊຸມ IMCWP ຄັ້ງທີ 23 ເພື່ອກຳນົດທິດທາງ ແລະ ແຜນງານຂອງຕົນ. ນອກນັ້ນ, ກອງປະຊຸມຍັງໄດ້ຕົກລົງເປັນເອກະພາບມອບໃຫ້ພັກກອມມູນິດລີບັງ ເປັນເຈົ້າພາບຈັດກອງປະຊຸມ IMCWP ຄັ້ງທີ 24.(ຂ່າວ: ຄຕພ)