ກອງປະຊຸມສະຫຼຸບຕີລາຄາການຈັດຕັ້ງປະຕິບັດການເຄື່ອນໄຫວວຽກງານສ່ວຍສາອາກອນທົ່ວປະເທດປະຈໍາປີ 2023 ແລະທິດທາງແຜນການປະຈໍາປີ 2024 ໄດ້ປິດລົງດ້ວຍຜົນສຳເລັດໃນວັນທີ 15 ທັນວານີ້, ທີ່ກົມສ່ວຍສາອາກອນກະຊວງການເງິນໃຫ້ກຽດເຂົ້າຮ່ວມຂອງທ່ານ ສັນຕິພາບ ພົມວິຫານລັດຖະມົນຕີກະຊວງການເງິນ,ພາຍໃຕ້ການເປັນປະທານຂອງທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ ກະຊວງການເງິນ, ມີບັນດາຮອງຫົວໜ້າກົມ, ພະນັກງານກ່ຽວຂ້ອງເຂົ້າຮ່ວມ.
ທ່ານ ບຸນປະເສີດ ສີກຸນລະບຸດໄດ້ລາຍງານວ່າ:ກອງປະຊຸມຄັ້ງນີ້ຈັດຂຶ້ນເພື່ອສະຫຼຸບຕີລາຄາຄືນດ້ານດີ, ດ້ານອ່ອນ ແລະ ຂໍ້ຄົງຄ້າງໃນການຈັດຕັ້ງປະຕິບັດວຽກງານສ່ວຍສາອາກອນໃນ 1 ປີຜ່ານມາໃນຂອບເຂດທົ່ວປະເທດ ແລະ ກຳນົດທິດທາງ, ມາດຕະການຈຸດສຸມເພື່ອຈັດຕັ້ງປະຕິບັດແຜນປີ 2024. ກອງປະຊຸມໄດ້ມີການປຶກສາຫາລືຮ່ວມກັນໃນຫຼາຍຫົວຂໍ້ຄື: ການຂະຫຍາຍລາຍຮັບ ແລະ ການລົງສໍາຫຼວດຫົວໜ່ວຍທຸລະກິດທີ່ເກີດໃໝ່ ຫຼືຢຸດເຊົາກິດຈະການ, ການຍື່ນບົດລາຍງານການເງິນປະຈຳປີ ແລະ ການສົມທົບກັບຂະແໜງການຄ້າກວດກາບັນດາຫົວໜ່ວຍທຸລະກິດທີ່ຍັງບໍ່ທັນໄດ້ຢັ້ງຢືນໃນລະບົບ ERC,ຄຸ້ມຄອງຕິດຕາມບັນດາຫົວໜ່ວຍທີ່ມອບໃຫ້ 9 ແຂວງຄຸ້ມຄອງ ແລະຄົ້ນຄວ້າຫົວໜ່ວຍທຸລະກິດທີ່ສູນກາງຄຸ້ມຄອງລົງໃຫ້ບັນດາແຂວງ, ຄຸ້ມຄອງການຈັດເກັບອາກອນທີ່ດິນ ແລະ ຄ່າທໍານຽມທາງ, ຄ່າທໍານຽມຕ່າງໆ, ຕິດຕາມການແຈ້ງມອບອາກອນຂອງຫົວໜ່ວຍວິສາຫະກິດ;ການເກັບອາກອນມູນຄ່າເພີ່ມ ແລະ ອາກອນຊົມໃຊ້ຈາກບ້ານພັກ-ໂຮງແຮມ, ຮ້ານບັນເທີງ, ຄາລາໂອເກະ, ສະໜາມກັອບ, ຮ້ານເສີມສວຍ, ເຫຼົ້າ, ຢາສູບ, ພາຫະນະ ແລະອື່ນໆ,ວຽກງານຂະຫຍາຍຖານອາກອນມູນຄ່າເພີ່ມ, ຕິດຕັ້ງເຄື່ອງ POS, ການເຊື່ອມຕໍ່ຫົວໜ່ວຍເຂົ້າໃນລະບົບ TaxRISແລະການນຳໃຊ້ໃບເກັບເງິນອາກອນມູນຄ່າເພີ່ມ ແລະ ໃບເກັບເງິນຈຸນລະວິສາຫະກິດ;ການຈັດຕັ້ງປະຕິບັດວຽກງານການຄຸ້ມຄອງ ແລະ ຈັດເກັບພັນທະອາກອນຂອງຜູ້ຮັບເໝົາ, ຜູ້ຮັບເໝົາພາຍໃນແລະຕ່າງປະເທດຂອງໂຄງການທີ່ຕັ້ງຢູ່ບັນດາແຂວງໃນຂອບເຂດທົ່ວປະເທດ;ການຈັດຕັ້ງປະຕິບັດວຽກງານຄຸ້ມຄອງຊັບສິນແຫ່ງລັດ ແລະ ປລປ; ການຄຸ້ມຄອງກວດກາໄຟຟ້າ ແລະ ບໍ່ແຮ່ທີ່ຕິດພັນກັບການເກັບລາຍຮັບຊັບສິນ ແລະການເກັບກຳຖານຂໍ້ມູນໃນຂອບເຂດທົ່ວປະເທດ ແລະ ການປະສານສົມທົບລະຫວ່າງສູນກາງ ແລະທ້ອງຖິ່ນ,ການສ້າງ ແລະ ປັບປຸງອົງກອນສ່ວຍສາອາກອນໃຫ້ເຂັ້ມແຂງ,ວຽກງານການຄຸ້ມຄອງການເງິນ ແລະ ວຽກງານກວດກາພາຍໃນ.
ໂອກາດນີ້, ທ່ານ ສັນຕິພາບ ພົມວິຫານ ໄດ້ໃຫ້ກຽດໂອ້ລົມ ພ້ອມເນັ້ນໜັກໃຫ້ຄະນະນຳແຕ່ລະຂັ້ນຈະຕ້ອງໄດ້ເພີ່ມທະວີການສຶກສາອົບຮົມການເມືອງແນວຄິດໃຫ້ພະນັກງານ-ລັດຖະກອນຢ່າງຕໍ່ເນື່ອງ ແລະ ປົກກະຕິ, ກໍາແໜ້ນ ແລະ ນໍາພາແນວຄິດພະນັກງານໃຫ້ໂລ່ງລ່ຽນ, ມີຄວາມຫ້າວຫັນ, ມີຄວາມສັດຊື່-ບໍລິສຸດ,ມີຈັນຍາບັນໃນການປະຕິບັດໜ້າທີ່ວຽກງານດ້ວຍຄວາມຮັບຜິດຊອບສູງ;ທົບທວນຄືນການຈັດຕັ້ງປະຕິບັດພາລະບົດບາດຂອງກົມສ່ວຍສາອາກອນໃຫ້ແທດເໝາະກັບບັນດາໜ້າວຽກທີ່ມີນັບແຕ່ສູນກາງລົງຮອດທ້ອງຖິ່ນຮັບປະກັນກົງຈັກການຈັດຕັ້ງບໍ່ໃຫ້ສັບສົນເກີນໄປ ແຕ່ມີປະສິດທິຜົນສູງສຸດ.ປັບປຸງແບບແຜນວິທີເຮັດວຽກຂອງຄະນະນໍາແຕ່ລະຂັ້ນໃນການນໍາພາ-ຊີ້ນໍາຕໍ່ສະມາຊິກພັກ-ພະນັກງານລັດຖະກອນທີ່ເຫັນວ່າຍັງບໍ່ທັນແທດເໝາະກັບສະພາບການເຄັ່ງຮ້ອນຂອງເສດຖະກິດໃນປັດຈຸບັນໃຫ້ມີຄວາມກົມກຽວ, ໂລ່ງລ່ຽນ ແລະ ທັນການກວ່າເກົ່າ;ຄະນະພັກ, ຄະນະນຳຂະແໜງສ່ວຍສາອາກອນແຕ່ລະຂັ້ນນັບແຕ່ສູນກາງຮອດທ້ອງຖິ່ນຕ້ອງຮີບຮ້ອນນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ໄປຈັດຕັ້ງປະຕິບັດໂດຍໃຫ້ມີການແບ່ງຄວາມຮັບຜິດຊອບຢ່າງຊັດເຈນມີການກຳນົດເປັນແຜນຄົນ, ແຜນງານລະອຽດໃນການຈັດເກັບລາຍຮັບສ່ວຍສາອາກອນ ໂດຍມີຕົວຊີ້ວັດໃນການຈັດຕັ້ງປະຕິບັດ, ມີການກໍານົດເປົ້າໝາຍ ແລະ ມີຈຸດສຸມຊັດເຈນ ເພື່ອໃຫ້ສາມາດສູ້ຊົນຈັດເກັບລາຍຮັບສ່ວຍສາອາກອນຕາມຕົວເລກແຜນປີ 2024 ໃຫ້ບັນລຸຕາມລະດັບຄາດໝາຍ;ເອົາໃຈໃສ່ພັດທະນາບຸກຄະລາກອນໃຫ້ມີຄວາມຮູ້ຢ່າງຮອບດ້ານເພື່ອສ້າງຂີດຄວາມສາມາດຕາມແຜນພັດທະນາວຽກງານສ່ວຍສາອາກອນ;ປັບປຸງ, ຄົ້ນຄ້ວາສ້າງ ແລະ ໂຄສະນາເຜີຍແຜ່ບັນດານິຕິກໍາ ເພື່ອເປັນເຄື່ອງມືໃນການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບສ່ວຍສາອາກອນເປັນຕົ້ນ ການຂຸດຄົ້ນແຫຼ່ງລາຍຮັບບົ່ມຊ້ອນຢູ່ແຕ່ລະຂົງເຂດ, ແຕ່ລະຂະແໜງການ ໂດຍສະເພາະການຊື້ຂາຍອອນລາຍ, ພະລັງງານໄຟຟ້າ ແລະ ບໍ່ແຮ່, ນໍ້າມັນເຊື້ອໄຟ, ການຄ້າຂາອອກ-ຂາເຂົ້າ;ປັບປຸງ ແລະ ຂະຫຍາຍລະບົບການຄຸ້ມຄອງເກັບລາຍຮັບແບບທັນສະໄໝທີ່ພັດທະນາສຳເລັດແລ້ວ ແລະ ໄດ້ນຳໃຊ້ໃນປັດຈຸບັນໃນການຈັດເກັບລາຍຮັບອາກອນ ແລະ ຄ່າທຳນຽມຕ່າງໆ ເພື່ອສ້າງພື້ນຖານຫັນເປັນລະບົບຄຸ້ມຄອງແບບດີຈີຕອນຕາມຍຸດທະສາດການພັດທະນາຂະແໜງສ່ວຍສາອາກອນ,ຫັນເຕັກໂນໂລຊີສື່ສານແບບໃໝ່ເພື່ອຄຸ້ມຄອງເກັບລາຍຮັບ ແລະ ສ້າງກົນໄກ ແລະ ລະບົບຄຸ້ມຄອງການຊື້-ຂາຍສິນຄ້າຜ່ານລະບົບເອເລັກໂຕຣນິກ ແລະ ຊຳລະສະສາງຜ່ານລະບົບທະນາຄານໃຫ້ຫຼາຍຂຶ້ນ ເພື່ອໃຫ້ສາມາດເກັບພັນທະອາກອນເຂົ້າງົບປະມານໃຫ້ໄດ້ຄົບຖ້ວນ;ເພີ່ມທະວີວຽກງານກວດກາໄລ່ລຽງອາກອນແບບຄົບຊຸດ.ໃນນັ້ນໃຫ້ເພີ່ມທະວີການກວດກາໄລ່ລຽງອາກອນແບບຄົບຊຸດປະຈຳປີຢ່າງມີຈຸດສຸມ ເພື່ອຊຸກຍູ້ໃຫ້ຫົວໜ່ວຍທຸລະກິດຫັນເຂົ້າສູ່ການປະຕິບັດລະບຽບກົດໝາຍຢ່າງຖືກຕ້ອງ, ມອບພັນທະອາກອນດ້ວຍຕົວເອງໃຫ້ຄົບຖ້ວນ, ສຸມໃສ່ວຽກງານໂຄສະນາເຜີຍແຜ່, ຊຸກຍູ້ໃຫ້ຜູ້ເສຍອາກອນແຈ້ງມອບດ້ວຍຕົນເອງໃຫ້ເພີ່ມຂຶ້ນຂອງຫົວໜ່ວຍທັງໝົດທີ່ຢູ່ໃນລະບົບTaxRIS ແລະ ອໍານວຍຄວາມສະດວກໃຫ້ພາກຜູ້ປະກອບການຕ່າງໆໃນການມອບພັນທະອາກອນ ເພື່ອສ້າງກອບການຮ່ວມມືລະຫວ່າງເຈົ້າໜ້າທີ່ສ່ວຍສາອາກອນກັບພາກທຸລະກິດ ແລະ ຂະແໜງການກ່ຽວຂ້ອງ ເພື່ອເຮັດໃຫ້ວຽກງານສ່ວຍສາອາກອນສາມາດໄດ້ຮັບການຮ່ວມມື ແລະ ຈັດຕັ້ງປະຕິບັດຕາມລະບຽບກົດໝາຍກຳນົດໄວ້;ເພີ່ມທະວີການປະສານສົມທົບກັບບັນດາກົມກ່ຽວຂ້ອງພາຍໃນກະຊວງການເງິນໃນການຈັດຕັ້ງປະຕິບັດບັນດາມາດຕະການຕ່າງໆໂດຍສະເພາະບັນດາກົນໄກ ແລະ ຂໍ້ມູນທີ່ຈຳເປັນໃນການຈັດເກັບລາຍຮັບສ່ວຍສາອາກອນ, ສ່ວຍສາອາກອນບັນດາແຂວງຕ້ອງເປັນເຈົ້າການໃນການປະສານສົມທົບບັນດາພະແນກອ້ອມຂ້າງແຂວງຕົນ ເພື່ອຊຸກຍູ້ການຈັດຕັ້ງປະຕິບັດບັນດາມາດຕະການຕ່າງໆໃຫ້ສຳເລັດຕາມລະດັບຄາດໝາຍ.
ຂ່າວ: ບຸນອູ້ມ, ພາບ: ບຸນຕອມ
ຄໍາເຫັນ