ສໍາມະນາ ການອະນຸລັກມໍລະດົກໂລກ ແລະ ການພັດທະນາການທ່ອງທ່ຽວວັດທະນະທຳ ແບບຢືນຍົງ

ທ່ານ ນາງ ສີລິພອນ ສຸພັນທອງ ໄດ້ມີຄຳເຫັນວ່າ: ຕະຫຼອດໄລຍະ 30 ປີ ໃນການເຂົ້າເປັນເມືອງມໍລະະດົກໂລກ ຂອງນະຄອນ ຫຼວງພະບາງ ອົງການປົກຄອງທຸກຂັ້ນໄດ້ຕັ້ງໜ້າເອົາໃຈໃສ່ຢ່າງ ປົກປັກຮັກສາ, ຄຸ້ມຄອງ ແລະ ອະນຸຣັກ ບັນດາວັດວາອາຮາມ, ອາຄານເກົ່າແກ່, ທີວທັດທໍາມະຊາດ, ວັດທະນະທໍາ, ຮີດຄອງປະເພນີ ທີ່ເປັນເອກະລັກສະເພາະ ໃຫ້ສອດຄ່ອງຕາມສົນທິສັນຍາ 1972 ຂອງອົງການອຸຍແນັດສໂກ ວ່າດ້ວຍ ການອະນຸລັກມໍລະດົກ ທາງດ້ານວັດທະນະທໍາ ແລະ ທໍາມະຊາດ ເຮັດໃຫ້ຫຼວງພະບາງ ກາຍເປັນເມືອງທີ່ມີຊື່ສຽງ ດຶງດູດຄວາມສົນໃຈຈາກນັກທ່ອງທ່ຽວທັງພາຍໃນ ແລະ ຕ່າງປະເທດ, ທັງໄດ້ຮັບຫຼາຍລາງວັນ ໃນພາກພື້ນ ແລະ ສາກົນ. ຄຽງຄູ່ກັບບັນດາຜົນສຳເລັດ ຍັງມີສິ່ງທ້າທາຍໂດຍທາງກົງ ແລະ ທາງອ້ອມຫຼາຍຢ່າງ ໂດຍສະເພາະ ຕົວເມືອງມໍລະດົກໂລກນັບມື້ນັບຖືກກົດດັນ ຈາກການພັດທະນາ, ມີຫຼາຍກິດຈະການເກີດຂຶ້ນ ທີ່ຂັດກັບລະບຽບ ເປັນຕົ້ນ ບັນຫາການບູລະນະສ້ອມແປງອາຄານເກົ່າ, ການປຸກສ້າງ-ຕໍ່ເຕີມ, ຕິດຕັ້ງປ້າຍໂຄສະນາ, ການສັນຈອນ, ສິ່ງແວດລ້ອມ, ການບຳບັດນໍ້າເປື້ອນ ແລະ ບັນຫາຄວາມແອອັດຂອງຕົວເມືອງນັບມື້ເພີ່ມຂຶ້ນ. ການສໍາມະນາຄັ້ງນີ້, ເພື່ອໃຫ້ແຕ່ລະພາກສ່ວນໄດ້ມີຄວາມຮັບຮູ້ ເຂົ້າໃຈ ຕໍ່ວຽກງານ ອະນຸລັກເມືອງມໍລະດົກໂລກ ໂດຍການແລກປ່ຽນບົດຮຽນທາງດ້ານວິຊາການ ກ່ຽວກັບການອະນຸລັກ ແລະ ນໍາໃຊ້ທ່າແຮງຂອງມໍລະດົກທາງດ້ານວັດທະນະທໍາ ເພື່ອປະກອບສ່ວນ ເຂົ້າໃນການພັດທະນາການທ່ອງທ່ຽວແບບຍືນຍົງ, ລວມທັງການພັດທະນາ ເສດຖະກິດ-ສັງຄົມຂອງແຂວງໃຫ້ຖືກຕ້ອງ ສອດຄ່ອງຕາມທິດທີ່ພັກ ແລະ ລັດກຳນົດໄວ້.

ການສໍາມະນາຄັ້ງນີ້, ມີການນໍາສະເໜີ 5 ຫົວຂໍ້ ທີ່ກ່ຽວຂ້ອງກັບການອະນຸລັກ ມໍລະດົກໂລກ ເພື່ອການທ່ອງທ່ຽວທີ່ຍືນຍົງ ເປັນຕົ້ນການປົກປັກຮັກສາມໍລະດົກໂລກ ຫຼວງພະບາງ ຕະຫຼອດໄລຍະ 30 ປີ, ມໍລະດົກໂລກ ໃນ ສປປ ລາວ, ການພັດທະນາທີຍຶນຍົງ ຂອງວັດທະນະທໍາ, ແນວທາງການພັດທະນາ ທາງກາຍຍະພາບ ບ້ານນາຍາງໃຕ້ ເມືອງນໍ້າບາກ ເພື່ອການທ່ອງທ່ຽວ ແບບຍຶນຍົງ. ພ້ອມນັ້ນ ຜູ້ເຂົ້າຮ່ວມໄດ້ໄປຢ້ຽມຊົມ ຕົວເມືອງມໍລະດົກໂລກ ເຊັ່ນ: ຫໍພິພິທະພັນແຫ່ງຊາດຫຼວງພະບາງ, ເຮືອນມໍລະດົກບ້ານຊຽງມ່ວນ, ວັດຊຽງທອງ ແລະ ສວນປາກຄານ.

(ຂ່າວ-ພາບ: ເພັດສາຄອນ ສີມມະວົງ)