ສຳມະນາ ວຽກງານທະນາຄານ ໃນໂອກາດວັນສ້າງຕັ້ງ ທຫລ ຄົບຮອບ 55 ປີ

ເພື່ອເປັນການສະເຫຼີມສະຫຼອງວັນສ້າງຕັ້ງທະນາຄານແຫ່ງ ສປປ ລາວ ຄົບຮອບ 55 ປີ,ສະນັ້ນໃນ ວັນທີ 29 ກັນຍາ ນີ້ທີ່ທະນາຄານແຫ່ງ ສປປ ລາວ (ທຫລ) ໄດ້ຈັດກອງປະຊຸມສຳມະນາ ວຽກງານທະນາຄານ,ພາຍໃຕ້ການເປັນປະທານຂອງ ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ຊຶ່ງມີ ຄະນະພັກ-ຄະນະນໍາ, ອະດີດການນຳ, ພະນັກງານອາວຸໂສ,  ຄະນະອຳນວຍການທະນາຄານທຸລະກິດ ເຂົ້າຮ່ວມ.
ທ່ານ ບຸນເຫຼືອ ສິນໄຊວໍຣະວົງ ກ່າວວ່າ:ເພື່ອເປັນການສ້າງຂະບວນການສະເຫຼີມສະຫຼອງວັນສ້າງຕັ້ງທະນາຄານແຫ່ງ ສປປ ລາວ ທີ່ໄດ້ ໝູນວຽນບັນຈົບຄົບຮອບ 55 ປີ ຢ່າງເປັນທາງການ ແລະ ຖືວ່າເປັນຂີດໝາຍປະຫວັດສາດແຫ່ງການເຕີບໃຫຍ່ຂະຫຍາຍຕົວຂອງຂະແໜງທະນາຄານ ນັບແຕ່ໄລຍະແຫ່ງການຕໍ່ສູ້ກູ້ຊາດ ຈົນເຖິງປັດຈຸບັນຊຶ່ງການຈັດຕັ້ງຂອງ ທຫລ ກໍໄດ້ມີການສ້າງຂະບວນການເຄື່ອນໄຫວດ້ານຕ່າງໆ ເພື່ອຂ່ຳນັບຮັບຕ້ອນວັນສຳຄັນດັ່ງກ່າວ ຢ່າງເປັນຂະບວນຟົດຟື້ນບົນຈິດໃຈປະຢັດມັດທະຍັດ ຕາມແນວທາງນະໂຍບາຍຂອງພັກ ແລະ ລັດຖະບານ ໂດຍໄດ້ຈັດຕັ້ງຂະບວນບໍລິຈາກເລືອດ, ເຄື່ອນໄຫວບູລະນະຖ້ຳທະນາຄານ, ປັບປຸງຫໍພິພິທະພັນ ທຫລ ແລະ ສ້າງຄຣິບວິດີໂອ ເພື່ອຫວນຄືນມູນເຊື້ອແຫ່ງການກຳເນີດ ແລະ ການເຕີບໃຫຍ່ຂະຫຍາຍຕົວຂອງຂະແໜງທະນາຄານ ໄປຄຽງຄູ່ກັບການສ້າງບົດຄົ້ນຄວ້າວິທະຍາສາດ,ພ້ອມນີ້ກໍໄດ້ມີການຈັດສຳມະນາວິຊາການ ທີ່ຕິດພັນກັບວຽກງານຂອງຂະແໜງທະນາຄານ ທີ່ກຳລັງເປັນບັນຫາເຄັ່ງຮ້ອນ ຫົວຂໍ້ຄື:  ວຽກງານນະໂຍບາຍເງິນຕາ,  ວຽກງານຄຸ້ມຄອງເງິນຕາຕ່າງປະເທດ,  ວຽກງານນະໂຍບາຍສິນເຊື່ອ, ວຽກງານຄຸ້ມຄອງທະນາຄານທຸລະກິດ ແລະ ເຜີຍແຜ່ບົດຄົ້ນຄວ້າ ວິທະຍາສາດສະຖາບັນການທະນາຄານ.
ຂ່າວ-ພາບ: ຕຸໄລເພັດ