ທ່ານ ນາງ ຈັນທະຈອນ ວົງໄຊ ກ່າວວ່າ: ຈຸດປະສົງ: ໃນການສຳມະນາຄັ້ງນີ້ເພື່ອເປັນການປະກອບສ່ວນສ້າງຂະບວນການຂໍ່ານັບຮັບຕ້ອນວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 70 ປີ ແລະ ເພື່ອສົ່ງເສີມໃຫ້ສະມາຊິກ ນັກທຸລະກິດ ແມ່ຍິງລາວ ແລະ ຜູ້ເຂົ້າຮ່ວມທັງໝົດໄດ້ຍົກສູງຄວາມຮັບຮູ້ ຄວາມເຂົ້າໃຈ ໃນຫຼາຍໆດ້ານ ໃນສະພາບຂອງໂລກມີການຫັນປ່ຽນ ແລະ ເຊື່ອມໂຍງກັນຢ່າງບໍ່ມີພົມແດນ ແລະ ທັນສະໄໝ, ສຳລັບຫົວຂໍ້ທີ່ກອງປະຊຸມຈະໄດ້ແລກປ່ຽນກັນໃນຄັ້ງນີ້ມີຫົວຂໍ້ຕ່າງໆທີ່ໜ້າສົນໃຈເປັນຕົ້ນ: ໃນຍຸກດີຈີຕອນ ຍິ່ງເຮັດໃຫ້ມີຄວາມຈໍາເປັນ ທີ່ຈະຕ້ອງໄດ້ເສີມສ້າງບຸກຄະລິກກະພາບຈາກພາຍໃນ ຄວາມຄິດ, ຄວາມຮູ້ສຶກ ຂອງຄົນເຮົາ ເພື່ອສະແດງອອກຜ່ານການກະທຳຕ່າງໆໃນໂລກອອນລາຍໄດ້ຢ່າງເໝະສົມ ແລະ ຄ່ອງຕົວ, ຫົວຂໍ້ກ່ຽວກັບຄວາມຮູ້ກ່ຽວກັບການຮັກສາສຸຂະພາບ ໂດຍລົງເລິກພະຍາດມະເຮັງ, ຫົວຂໍ້ຫຼັກການກິນອາຫານແນວໃດໃຫ້ເໝາະສົມ ເພື່ອປ້ອງກັນພະຍາດໄຂມັນສູງ ແລະ ຫົວຂໍ້ການກຽມພ້ອມທີ່ຈະຮັບມີກັບພະຍາດຮ້າຍແຮງທີ່ອາດເກີດຂຶ້ນໄດ້ທຸກເມື່ອ ຊຶ່ງບັນດາຫົວຂໍ້ດັ່ງກ່າວແມ່ນສຳຄັນ ແລະ ໜ້າສົນໃຈສໍາລັບຜູ້ຟັງເປັນຢ່າງຍິ່ງ ໂດຍສະເພາະແມ່ນຜູ້ຮັກສຸພະພາບທັງຫຼາຍ, ສະນັ້ນ ເຊື່ອວ່າການສໍາມະນາໃນຄັ້ງນີ້ ເຖິງເວລາຈະສັ້ນ ແຕ່ຜູ້ເຂົ້າຮ່ວມຈະໄດ້ຄວາມຮູ້ ຄວາມເຂົ້າໃຈຕື່ມອີກບໍ່ຫຼາຍກໍໜ້ອຍ ເພື່ອທຸກຄົນຈະໄດ້ມີສຸຂະພາບກາຍ ສຸຂະພາບຈິດ ແລະ ບຸກຄະລິກກະພາບທີ່ດີ ອອກສູ່ສັງຄົມ ດ້ວຍຄວາມໝັ້ນໃຈກວ່າເກົ່າ ແລະ ສຳຄັນແມ່ນພວກເຮົາໄດ້ເພີ່ມເຄືອຂ່າຍທຸລະກິດນຳກັນລະຫວ່າງ ສອງປະເທດ ລາວ-ໄທ ທີ່ມີການພົວພັນດ້ານການຄ້າຊາຍແດນນຳກັນມາແລ້ວໃຫ້ຮັດແໜ້ນ ແລະ ໃກ້ຊິດຂຶ້ນກວ່າເກົ່າ.
(ຂ່າວ-ພາບ: ສຳນານ)
ຄໍາເຫັນ