ສໍາມະນາເນື້ອໃນປຶ້ມ “ການເຕີບໃຫຍ່ຂະຫຍາຍຕົວຂອງອົງຄະນະພັກ ນະຄອນຫຼວງວຽງຈັນ”

ໃນພິທີ, ສະຫາຍ ຊົງເລົ່າ ຢົງນູ ຮອງເລຂາຄະນະບໍລິຫານງານພັກ ນະຄອນຫຼວງວຽງຈັນ ຫົວໜ້າຄະນະຄົ້ນຄວ້າ-ຂຽນປຶ້ມ 70 ການເຕີບໃຫຍ່ຂະຫຍາຍຕົວ ອົງຄະນະພັກນະຄອນຫຼວງວຽງຈັນ ໄດ້ລາຍງານໂດຍຫຍໍ້ວ່າ: ການຄົ້ນຄວ້າ-ສ້າງປຶ້ມປະຫວັດສາດເຫຼັ້ມນີ້ ໄດ້ມີແນວຄິດລິເລີ່ມມາແຕ່ສະໄໝກອງປະຊຸມໃຫຍ່ຄັ້ງທີ 3 ອົງຄະນະພັກ ນວ, ປີ 1999 ໃນວຽກງານໂຄສະນາ-ອົບຮົມ ໄດ້ວາງຄາດໝາຍໄວ້, ແຕ່ມາຮອດປັດຈຸບັນກໍເປັນເວລາເກືອບ 26 ປີ ຫຼື ວ່າຮອດສະໄໝທີ 7 ຈຶ່ງງມີແນວຄິດລິເລີ່ມຄົ້ນຄວ້າ-ຂຽນ; ການຄົ້ນຄວ້າ-ຂຽນ ແມ່ນໄດ້ສຶກສາຈາກປຶ້ມປະຫວັດສາດຂອງພັກ, ຂອງຊາດ, ຂອງກໍາລັງປ້ອງກັນຊາດ, ສຶກສາຈາກປຶ້ມວຽງຈັນ 450 ປີ ແລະ ສຶກສາຈາກຫຼາຍແຫຼ່ງຂ່າວ ທີ່ຕິດພັນກັບຫົວຂໍ້ນີ້; ການສຶກສາໃນຫົວຂໍ້ນີ້ເຫັນວ່າມີຄວາມຫຍຸ້ງຍາກຫຼາຍອັນເປັນຕົ້ນ: 1). ໄດ້ສຶກສາການກໍາເນີດ ຫຼື ການກໍ່ຕັ້ງອົງຄະນະພັກ ນະຄອນຫຼວງວຽງຈັນ ນັບແຕ່ປີ 1950-2020 (ເລີ່ມແຕ່ມີພັກກອມມູນິດອິນດູຈີນ, ມີອົງຄະນະພັກແຄວ້ນລາວ, ການສ້າງຕັ້ງເປັນໜ່ວຍພັກ, ຈຸພັກ ຢູ່ ນວ, ການສ້າງຕັ້ງເປັນພັກປະຊາຊົນລາວ ຫຼື ພັກປະຊາຊົນ ປະຕິວັດລາວ ໃນປັດຈຸບັນ) ນອກຈາກນີ້ ຍັງໄດ້ສຶກສາຂະບວນການຕໍ່ສູ້ຂອງຊາວເມືອງວຽງຈັນຜູ້ຮັກຊາດກ່ອນປີ 1930 (ກ່ອນບໍ່ທັນມີພັກນໍາພາໃນພາກອະລໍາພະບົດ, ພາກເປີດເລື່ອງ, ພາກທີ 1) ເຫັນວ່າເປັນໄລຍະເວລາທີ່ຍາວຫຼາຍ; 2). ອີກດ້ານໜຶ່ງໃນເມື່ອກ່ອນ ນວ ແມ່ນກວມເອົາ 2 ແຂວງຄື: ນວ (ກໍາແພງນະຄອນ) ແລະ ແຂວງວຽງຈັນ, ການສຶກສາຄົ້ນຄວ້າແມ່ນກວມເອົາ 2 ແຂວງ ແລະ ວຽກງານອື່ນ; ການຄົ້ນຄວ້າ-ສ້າງປຶ້ມປະຫວັດສາດເຫຼັ້ມນີ້ໄວ້ແມ່ນມີຄວາມສໍາຄັນ, ມີຄວາມຈໍາເປັນຫຼາຍ ຕໍ່ນະຄອນຫຼວງວຽງຈັນເປັນຕົ້ນ: 1). ມີເອກະສານປະຫວັດສາດທີ່ສໍາຄັນ ທີ່ເວົ້າເຖິງຫົວຂໍ້ນີ້ໄວ້ໃນລະດັບທີ່ແນ່ນອນ; 2). ເຮັດໃຫ້ຄົນຮຸ່ນປັດຈຸບັນ ແລະ ຮຸ່ນຕໍ່ໆໄປໄດ້ສຶກສາຕໍ່ຍອດໃນຫົວຂໍ້ນີ້; 3). ຮູ້ໄດ້ຜົນງານຂອງບັນພະບູລຸດໃນການນໍາພາຕໍ່ສູ້, ການພັດທະນານະຄອນຫຼວງວຽງຈັນໃນແຕ່ລະຍຸກສະໄໝ; 4). ຮູ້ໄດ້ການແບ່ງຈາກແຂວງວຽງຈັນ ມາເປັນ ແຂວງກໍາແພງນະຄອນວຽງຈັນ ແລະ ການປ່ຽນຊື່ມາເປັນ ນວ ປີໃດ, ຈາກຂໍ້ມູນອັນໃດ; 5). ຮູ້ໄດ້ຜົນງານຂອງຄະນະບໍລິຫານງານພັກ, ນັບທັງຊື່, ໜ້າທີ່ຕໍາແໜ່ງ ຂອງບຸກຄົນໃນຄະນະບໍລິຫານງານພັກ ນວ ນັບແຕ່ສະໄໝທີ 1-7; 6). ຮູ້ໄດ້ການປ່ຽນແປງ ສະຫາຍ ເລຂາພັກ, ເຈົ້າຄອງນະຄອນຫຼວງວຽງຈັນໃນແຕ່ລະໄລຍະ ແລະ ອື່ນໆ. ການຄົ້ນຄວ້າ-ສ້າງປຶ້ມເຫຼັ້ມນີ້ກໍແມ່ນຂະບວນການໜຶ່ງເພື່ອຂໍ່ານັບຊົມເຊີຍວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ ແລະ ທັງເປັນການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ 8 ອົງຄະນະພັກນະຄອນຫຼວງວຽງຈັນທີ່ຈະເປີດຂຶ້ນໃນທ້າຍປີ 2025 ນີ້, ຂ້າພະເຈົ້າຄິດວ່າຈະໃຫ້ສໍາເລັດກ່ອນກອງປະຊຸມໃຫຍ່, ດ້ວຍຄວາມບຸກບືນພະຍາຍາມຂອງຄະນະຄົ້ນຄວ້າ-ຂຽນ, ຄາດວ່າຈະໃຫ້ໄດ້ຈັດພິມ, ໃຫ້ສໍາເລັດກ່ອນກອງປະຊຸມໃຫຍ່ຂອງພວກເຮົາ ແລະ ແຈກຢາຍໃຫ້ບັນດາ ສະຫາຍຄະນະພັກ ໃນມື້ດໍາເນີນກອງປະຊຸມໃຫຍ່.

(ຂ່າວ: ແສງຈັນ)