ໂດຍໄດ້ຮັບກຽດເປັນປະທານກ່າວເປີດ ຂອງທ່ານ ນາງ ຟອງສະໝຸດ ອັ່ນລາວັນ, ຮອງລັດຖະມົນຕີກະຊວງການຕ່າງປະເທດ, ມີບັນດາຜູ້ເຂົ້າຮ່ວມຈາກ ກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ, ສະຖານທູດ ສເກົາຫຼີ ປະຈໍາລາວ ແລະ ບັນດາ ກະຊວງອ້ອມຂ້າງ.
 |
ກອງປະຊຸມສຳມະນາໃນຄັ້ງນີ້, ແມ່ນເປັນໜຶ່ງໃນກິດຈະກຳເພື່ອສະເຫຼີມສະຫຼອງ ວັນສ້າງຕັ້ງສາຍ ພົວພັນການທູດ ລະຫວ່າງ ສປປ ລາວ ແລະ ສ.ເກົາຫຼີ ຄົບຮອບ 30 ປີ (ວັນທີ 25 ຕຸລາ 1995 - ວັນທີ 25 ຕຸລາ 2025), ອີກທັງເປັນການທົບທວນຄົນ ສາຍພົວພັນຮ່ວມມື ລະຫວ່າງ 2 ປະເທດ ແລະ ແລກປ່ຽນທັດສະນະກ່ຽວກັບ ນະໂຍບາຍຂອງການພົວພັນຮ່ວມມື ຂອງ ສປປ ລາວ ຕໍ່ ສເກົາຫຼີ ແລະ ສເກົາຫຼີ ຕໍ່ ສປປ ລາວ ແນໃສ່ເພື່ອຮັດແໜ້ນຄວາມສາມັກຄີ ແລະ ສ້າງຄວາມເຂົ້າອົກເຂົ້າໃຈເຊິ່ງກັນແລະກັນ.
 |
ໃນພິທີດັ່ງກ່າວ ທ່ານປະທານໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ສາຍພົວພັນອັນເປັນມູນເຊື້ອຂອງ ສອງລັດ ແລະ ປະຊາຊົນສອງຊາດ ບົນພື້ນຖານມິດຕະພາບ ແລະ ການຮ່ວມມືທີ່ດີ, ການຮ່ວມມືສອງຝ່າຍ ແມ່ນໄດ້ຮັບການຍົກສູງເປັນກ້າວໆມາ ແລະ ສາມາດຍາດໄດ້ຮັບຜົນສໍາເລັດອັນຈົບງາມ. ພ້ອມດຽວກັນນີ້, ທ່ານ ຈອງ ຢອງ ຊູ (Jung Yung-soo)ເອກອັກຄະລັດຖະທູດ ແຫ່ງ ສ ເກົາຫຼີ ປະຈໍາ ສປປ ລາວ ໄດ້ເນັ້ນຢໍ້າໃຫ້ເຫັນເຖິງ ຜົນສໍາເລັດຂອງການພົວພັນ ຮ່ວມມືລະຫວ່າງສອງຊາດ ຕະຫຼອດໄລຍະ 30 ປີຜ່ານມາ ທີ່ກວມເອົາຫຼາຍຂົງເຂດ ຫຼາຍຂະແໜງການ ເປັນຕົ້ນ ດ້ານການເມືອງ, ດ້ານເສດຖະກິດ ແລະ ວັດທະນະທຳ-ສັງຄົມ ໂດຍມີເປົ້າໝາຍເພື່ອຍົກລະດັບການພົວພັນຮ່ວມມື ໃຫ້ກາຍເປັນຄູ່ຮ່ວມມືຍຸດທະສາດຮອບດ້ານໃນຕໍ່ໜ້າ.
ພາຍຫຼັງພິທີເປີດ, ຜູ້ເຂົ້າຮ່ວມ ໄດ້ຮັບຟັງການບັນຍາຍຈາກນັກວິທະຍາກອນຈາກ ສປປ ລາວ ແລະ ສ ເກົາຫຼີ, ກໍໄດ້ມີການແລກປ່ຽນຄໍາຄິດເຫັນ ກ່ຽວກັບ ໝາກຜົນຂອງການຮ່ວມມືລະຫວ່າງສອງຝ່າຍໃນບັນດາຂະແໜງການທີ່ສໍາຄັນຕ່າງໆ ນັບຕັ້ງແຕ່ອະດີດຈົນເຖິງປັດຈຸບັນ, ໂດຍໄດ້ມີການທົບທວນຄືນບັນດາຜົນສໍາເລັດຂໍ້ສະດວກ, ສິ່ງທ້າຍ, ຂໍ້ຫຍຸ້ງຍາກ ແລະ ທິດທາງແຜນການໃນການຮ່ວມມືກັນຕໍ່ໜ້າ ເປັນຕົ້ນ ການຮ່ວມມືດ້ານການເມືອງ, ການຮ່ວມມືດ້ານເສດຖະກິດ ແລະ ການຄ້າ, ການແລກປ່ຽນດ້ານການສຶກສາ, ວັດທະນະທຳ, ແຮງງານ ແລະ ອື່ນໆ.
 |
ສປປ ລາວ ແລະ ສ ເກົາຫຼີ ໄດ້ສ້າງຕັ້ງສາຍພົວພັນ ແລະ ມີການພົວພັນຮ່ວມມືກັນຢ່າງຮອບດ້ານ, ຕະຫຼອດໄລຍະ 3 ທົດສະວັດ ທັງສອງຝ່າຍໄດ້ຕັ້ງໜ້າ ແລະ ເສີມຂະຫຍາຍການສາຍພົວພັນມິດຕະພາບລະຫວ່າງສອງປະເທດ ຢ່າງຕໍ່ເນື່ອງ ຈົນສາມາດຍາດໄດ້ຜົນສໍາເລັດໃນຫຼາຍດ້ານ. ກອງປະຊຸມໄດ້ດໍາເນີນໄປດ້ວຍບັນຍາກາດຟົດຟື້ນ ທາງດ້ານວິຊາການມີການແລກປ່ຽນຄໍາຄິດຄໍາເຫັນຈາກບັນດາຜູ້ເຂົ້າຮ່ວມຢ່າງສ້າງສັນ, ເຮັດໃຫ້ກອງປະຊຸມໃນຄັ້ງນີ້ ມີຄວາມໝາຍສໍາຄັນ ແລະ ປະກອບສ່ວນໃຫ້ການສະເຫຼີມສະຫຼອງວັນສ້າງຕັ້ງສາຍພົວພັນການທູດ ສປປ ລາວ-ສ ເກົາຫຼີ ຄົບຮອບ 30 ປີ.
(ຂ່າວ: ສະຖາບັນການຕ່າງປະເທດ, ພາບ: ແສງຈັນ)
ຄໍາເຫັນ