ທ່ານ ໄພວັນ ແກ້ວປະເສີດ ໄດ້ຍົກໃຫ້ເຫັນສະພາບການປະຕິບັດວຽກງານຊັບພະຍາກອນທີ່ເປັນຢາ ຢູ່ ສປປ ລາວ ໃນໄລຍະທີ່ຜ່ານມາ; ເຫດຜົນແລະຄວາມຈໍາເປັນໃນການສ້າງຮ່າງກົດໝາຍ; ຂະບວນການຄົ້ນຄວ້າສ້າງຮ່າງກົດໝາຍ; ໂຄງປະກອບແລະເນື້ອໃນຂອງຮ່າງກົດໝາຍ ແລະ ຄາດຄະເນຜົນໄດ້ຮັບແລະປະກາດຮັບຮອງກົດ
ໝາຍສະບັບດັ່ງກ່າວ, ເນື່ອງຈາກວ່າໃນໄລຍະຜ່ານມາ ຍັງມີການເກັບກູ້ຊັບພະຍາກອນທີ່ເປັນຢາແບບຊະຊາຍ, ການຈຳໜ່າຍວັດຖຸທີ່ເປັນຢາຍັງບໍ່ໄດ້ຮັບການຄຸ້ມຄອງຢ່າງເປັນລະບົບ, ການຂຸດຄົ້ນຍັງບໍ່ທັນມີຈຸດສຸມຈຶ່ງມີຄວາມຈຳເປັນໃນການສ້າງຮ່າງກົດໝາຍສະບັບນີ້ ເພື່ອເປັນເຄື່ອງມືໃນການຄຸ້ມຄອງຊັບພະຍາກອນທີ່ເປັນຢາໃຫ້ມີຄວາມຍືນຍົງ.
ກົດໝາຍວ່າດ້ວຍຊັບພະຍາກອນທີ່ເປັນຢາ ສະບັບສ້າງຂຶ້ນໃໝ່ ປະກອບມີ 9 ພາກ 6 ໜວດ, ມີ 73 ມາດຕາ, ຈາກນັ້ນປະທານກອງປະຊຸມໄດ້ເນັ້ນໃຫ້ສະມາຊິກສະພາແຫ່ງຊາດ ປະກອບຄຳຄິດເຫັນຢ່າງມີຈຸດສຸມຕໍ່ກັບບາງເນື້ອ ໃນບາງຄຳຊັບໃຫ້ຖືກຕ້ອງຄົບຖ້ວນເໝາະສົມກັບສະພາບຕົວຈິງ ເປັນຕົ້ນ ໃນມາດຕາ 4 ນະໂຍບາຍຂອງລັດ ກ່ຽວກັບວຽກງານຊັບພະຍາກອນທີ່ເປັນຢາ, ມາດຕາ 17 ການສ້າງແຜນ ແລະ ການຂຸດຄົ້ນເກັບກູ້ ຊັບພະຍາກອນທີ່ເປັນຢາ ນອກນັ້ນຍັງມີ ມາດຕາ 47, 58 ຈົນຮອດ ມາດຕາ 64 ຊຶ່ງສະມາຊິກສະພາແຫ່ງຊາດຕ້ອງໄດ້ຄົ້ນຄ້ວາປະກອບຄຳເຫັນໃສ່ຮ່າງກົດໝາຍສະບັບສ້າງຂຶ້ນໃໝ່ໃຫ້ມີເນື້ອໃນຄົບຖ້ວນ ຈະແຈ້ງ ຮັດກຸມ ສາມາດເປັນບ່ອນອີງໃນການເຄື່ອນໄຫວຈັດຕັ້ງປະຕິບັດໃຫ້ເກີດປະໂຫຍດສູງສຸດ.
ພາຍຫຼັງກົດໝາຍວ່າດ້ວຍຊັບພະຍາກອນທີ່ເປັນຢາ ຖືກຮັບຮອງແລະປະກາດໃຊ້ແລ້ວຄາດວ່າຈະມີຜົນໄດ້ຮັບດັ່ງນີ້:ສາມາດຕິດຕາມຄຸ້ມຄອງແລະກວດກາວຽກງານຊັບພະຍາກອນທີ່ເປັນຢາໃຫ້ມີຄວາມຖືກຕ້ອງສອດຄ່ອງກັບແນວທາງນະໂຍບາຍ ລັດຖະທໍາມະນູນ ກົດໝາຍ ນິຕິກໍາໃຕ້ກົດໝາຍ;ເຮັດໃຫ້ຂອດການປະສານງານລະຫວ່າງຂະແໜງການສາທາລະນະສຸກ ແລະຂະແໜງການອື່ນໆທີ່ກ່ຽວຂ້ອງມີຄວາມຊັດເຈນແລະຮັດກຸມຂຶ້ນກວ່າເກົ່າ; ເຮັດໃຫ້ຊັບພະຍາກອນທີ່ເປັນຢາໄດ້ຮັບການຄຸ້ມຄອງຖືກນໍາໃຊ້ແບບຍືນຍົງແລະເປັນປະໂຫຍດທາງດ້ານການແພດດ້ວຍການນໍາໃຊ້ຢາພື້ນເມືອງສົມທົບຢາຫຼວງເຂົ້າໃນຕາໜ່າງສາທາລະນະສຸກຢູ່ໃນຂອບເຂດທົ່ວປະເທດ ປະຊາຊົນບັນດາເຜົ່າແລະສາກົນເຫັນໄດ້ເຖິງນະໂຍບາຍພັກ-ລັດ ໃນການຄຸ້ມຄອງອະນຸລັກປົກປັກຮັກສາພັດທະນາ ແລະ ນໍາໃຊ້ຊັບພະຍາກອນທີ່ເປັນຢາຢ່າງກວ້າງຂວາງ ແລະ ສົມເຫດສົມຜົນ ແລະ ທົ່ວສັງຄົມມີຄວາມຮັບຜິດຊອບຫຼາຍຂຶ້ນເປັນເຈົ້າການໃນການຮ່ວມມືຊ່ວຍອົງການຈັດຕັ້ງລັດໃນການປົກປັກຮັກສາພັດທະນາຊັບພະຍາກອນທີ່ເປັນຢາ. ນອກນັ້ນ, ຍັງເປັນທ່າແຮງດ້ານເສດຖະກິດ ວັດທະນະທໍາສັງຄົມສາມາດສ້າງສິ່ງແວດລ້ອມທີ່ດີ ມີຄວາມຍືນຍົງຄູ່ກັບຊາດລາວ ກາຍເປັນມໍລະດົກຕົກທອດຮອດຮູ່ນລູກຫຼານຕໍ່ໆໄປ ກ້າວໄປສູ່ການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ.
(ຂ່າວ-ພາບ: ຍຸພິນທອງ-ຕຸໄລເພັດ)
ຄໍາເຫັນ