ກອງປະຊຸມເຜີຍແຜ່ ແລະ ສະເໜີແຜນພັດທະນາໂຄງການປູກຕົ້ນໄມ້ແບບຍືນຍົງ ຢູ່ແຂວງຄຳມ່ວນ ຂອງບໍລິສັດ ພັດທະນາເສດຖະກິດສີຂຽວ ຫວຽດ-ລາວ ຈັດຂຶ້ນໃນວັນທີ 25 ກັນຍາ ນີ້ ທີ່ຫ້ອງວ່າການແຂວງຄຳມ່ວນ ໂດຍມີທ່ານ ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ, ທ່ານ ຫງວຽນ ແທັງ ດຶກ ປະທານສະພາບໍລິຫານ ບໍລິສັດ ພັດທະນາເສດຖະກິດສີຂຽວ ລາວ-ຫວຽດ ຈຳກັດ, ມີພະແນກການຂັ້ນແຂວງ, ບັນດາເມືອງ, ຂະແໜງການທີ່ກ່ຽວຂ້ອງຂອງຝ່າຍບໍລິສັດ ແລະ ພາກລັດຂັ້ນແຂວງຄຳມ່ວນເຂົ້າຮ່ວມ.
ບໍລິສັດ ພັດທະນາເສດຖະກິດສີຂຽວ ຫວຽດ-ລາວ ຈຳກັດ ໄດ້ເຜີຍແຜ່ ແລະ ນຳສະເໜີ ແຜນພັດທະນາໂຄງການປູກຕົ້ນໄມ້ແບບຍືນຍົງ (ໄມ້ໂພໂລເນຍ) ຊຶ່ງເປັນປະເພດໄມ້ທີ່ໃຫຍ່ໄວ ຢູ່ພື້ນທີ່ແຂວງຄຳມ່ວນ ໂດຍໄນໄລຍະຕົ້ນ ບໍລິສັດມີຈຸດປະສົງຈະພັດທະນາຢູ່ບ້ານນາແສ ເມືອງມະຫາໄຊ ໃນເນື້ອທີ່ 150 ເຮັກຕາ ຊຶ່ງໃນເນື້ອທີ່ດັ່ງກ່າວຈະປະກອບມີ ສູນເພາະຊຳ ແລະ ສວນສາທິດປູກໄມ້ ເພື່ອເປັນຕົວແບບໃຫ້ແກ່ການຂະຫຍາຍໂຄງການ ໄປຍັງບ້ານ ແລະ ເມືອງອື່ນໆຕໍ່ໄປ ໂດຍສະເພາະການສົ່ງເສີມການປູກໄມ້ໃນພາກປະຊາຊົນ ໃນຮູບແບບ 2+3 ຄື: ປະຊາຊົນມີ ດິນ ແລະ ແຮງງານ ສ່ວນບໍລິສັດມີ ທຶນ, ເຕັກໂນໂລຊີ ແລະ ການຕະຫຼາດ.
ການຂະຫຍາຍຕົວທາງດ້ານເສດຖະກິດທີ່ວ່ອງໄວ, ແຫຼ່ງຊັບພະຍາກອນນັບມື້ບົກແຫ້ງລົງເລື້ອຍໆ ແລະ ການເຊື່ອມໂຊມຂອງສິ່ງແວດລ້ອມ ໄດ້ກາຍເປັນສິ່ງທ້າທາຍທີ່ຮ້າຍແຮງຕໍ່ການພັດທະນາແບບຍືນຍົງ. ຫຼາຍປະເທດໃນໂລກກຳລັງປະເຊີນໜ້າກັບຫຼາຍບັນຫາກ່ຽວກັບສະພາບສິ່ງແວດລ້ອມ ໄປພ້ອມກັບການເກີດໄພທຳມະຊາດ, ສະພາບດິນຟ້າອາກາດມີການປ່ຽນແປງ. ເພື່ອຕອບສະໜອງຄວາມຮຽກຮ້ອງຕ້ອງການຕໍ່ການຂະຫຍາຍຕົວທາງດ້ານເສດຖະກິດແບບຍືນຍົງ ຊຶ່ງມີຄວາມຈຳເປັນຈະຕ້ອງພັດທະນາເສດຖະກິດສີຂຽວ ຊຶ່ງແມ່ນທາງເລືອກທີ່ຖືກຕ້ອງ ແລະ ຍາວນານ.
ກອງປະຊຸມດັ່ງກ່າວນີ້ ແມ່ນໄດ້ນຳສະເໜີໃນຫຼາຍຫົວຂໍ້ ເປັນຕົ້ນ: ບັນຫາສິ່ງທ້າທາຍຈາກການປ່ຽນແປງດິນຟ້າອາກາດ, ແຜນພັດທະນາການປູກໄມ້, ການພັດທະນາເສດຖະກິດສີຂຽວແບບຍືນຍົງ ໂດຍຜ່ານຮູບແບບກະສິກຳ-ປ່າໄມ້, ການນໍາໃຊ້ເຕັກໂນໂລຊີໃນການຄຸ້ມຄອງ ແລະ ປ້ອງກັນ ກະສິກໍາ-ປ່າໄມ້, ການວາງແຜນຍຸດທະສາດດ້ານການພັດທະນາ ແລະ ອື່ນໆ.
ຂ່າວ: ກອງຄຳ
ຄໍາເຫັນ