ໂດຍການເປັນປະທານຂອງທ່ານ ວິໄລ ວົງຂະເສີມ ຮອງປະທານຄະນະບໍລິຫານງານ ສກລ,ມີທ່ານນາງ ແມເຣຍ ພີກົວແຊັດ ຜູ້ຈັດການໂຄງການປົກປ້ອງສັງຄົມທາງດ້ານສຸຂະພາບຈາກອົງການແຮງງານສາກົນ (ILo),ມີບັນດາຜູ້ຕາງໜ້າຈາກພາກສ່ວນກ່ຽວຂ້ອງສູນກາງ, ທ້ອງຖິ່ນພ້ອມດ້ວຍຄະນະຮັບຜິດຊອບເຂົ້າຮ່ວມ.
ການຈັດຊຸດຝຶກອົບຮົມໃນຄັ້ງນີ້ເພື່ອເຮັດໃຫ້ຜູ້ເຂົ້າຮ່ວມມີຄວາມຮູ້ກ່ຽວກັບລະບົບປະກັນສັງຄົມ ແລະ ປະກັນສຸຂະພາບແຫ່ງຊາດ,ເພື່ອສ້າງຄວາມເຂັ້ມແຂງໃຫ້ພະນັກງານກຳມະບານຕອບສະໜອງໄດ້ຢ່າງຖືກຕ້ອງຕໍ່ການສອບຖາມຈາກສະມາຊິກກ່ຽວກັບສິດ ແລະ ຜົນປະໂຫຍດຂອງເຂົາເຈົ້າພາຍໃຕ້ລະບົບປະກັນສັງຄົມ ແລະ ປະກັນສຸຂະພາບ.
ທ່ານ ວິໄລ ວົງຂະເສີມ ກ່າວວ່າ:ສກລໄດ້ປະສານສົມທົບກັບພາກສ່ວນທີ່ກ່ຽວຂ້ອງໃນການເຄື່ອນໄຫວເພື່ອເຮັດໃຫ້ຜູ້ອອກແຮງງານໄດ້ຮັບຮູ້ ແລະ ເຂົ້າໃຈສິດທິພື້ນຖານຂອງເຂົາເຈົ້າຕໍ່ການຈ້າງງານທີ່ຖືກກົດໝາຍ, ການເຂົ້າເຖິງການປົກປ້ອງທາງສັງຄົມ, ການສົ່ງເສີມຜູ້ອອກແຮງງານໃຫ້ເຂົ້າເຖິງການປະກັນສັງຄົມເພື່ອຮັບປະກັນຄວາມປອດໄພໃນການອອກແຮງງານໃນສະຖານທີ່ເຮັດວຽກ ຊຶ່ງຜູ້ອອກແຮງງານສ່ວນຫຼາຍແມ່ນເຮັດວຽກໃນຂະແໜງກະສິກຳ ແລະ ການຈ້າງງານໃນຂະແໜງດັ່ງກ່າວແມ່ນບໍ່ທັນເປັນລະບົບ ເກີດມີຄວາມສ່ຽງ, ເຮັດວຽກທີ່ມີຄວາມສ່ຽງດ້ານສານເຄມີ ໂດຍບໍ່ມີການໃສ່ເຄື່ອງປ້ອງກັນສານເຄມີ ເປັນສາເຫດນໍາໄປສູ່ຄວາມບໍ່ຮັບປະກັນໃນການດຳລົງຊີວິດຂອງຜູ້ອອກແຮງງານ ແລະ ຄອບຄົວຂອງເຂົາເຈົ້າ.ຂໍຮຽກຮ້ອງມາຍັງບັນດາທ່ານທີ່ເຂົ້າຮ່ວມຈົ່ງພ້ອມກັນຍົກສູງຄວາມຮັບຜິດຊອບ, ຄົ້ນຄວ້າ ແລະ ແລກປ່ຽນບົດຮຽນຊຶ່ງກັນ ແລະ ກັນ, ປືກສາຫາລືໃນສ່ວນທີ່ພວກເຮົາຍັງຂາດ ເວົ້າລວມ, ເວົ້າສະເພາະບັນຫາກ່ຽວກັບສຸຂະພາບ ແລະ ການປົກປ້ອງທາງສັງຄົມ ເພື່ອເປັນການປະກອບສ່ວນຮັບປະກັນຄຸນນະພາບ, ຍົກສູງຊີວິດການເປັນຢູ່ຂອງຜູ້ອອກແຮງງານ ການຈ້າງງານທີ່ເປັນທຳ ຮັບປະກັນໄດ້ຜົນປະໂຫຍດຂອງຊາດ, ຜົນປະໂຫຍດຂອງຜູ້ອອກແຮງງານໃຫ້ດີຂຶ້ນ, ພັດທະນາເສດຖະກິດ-ສັງຄົມຂອງຊາດໃຫ້ຈະເລີນກ້າວໜ້າຂຶ້ນໄປເລື້ອຍໆ.
ຂ່າວ-ພາບ:ບຸນຕອມ
ຄໍາເຫັນ