ສານປະຊາຊົນແຂວງເຊກອງ ຕັດສິນຄະດີຮັບປະກັນຄວາມຖືກຕ້ອງຍຸຕິທໍາ

ທ່ານ ນາງ ສີວິໄລ ຜາວິໄລ ຮັກສາການປະທານສານປະຊາຊົນແຂວງເຊກອງ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 10 ຂອງສະພາປະຊາຊົນແຂວງ (ສພຂ) ເຊກອງ ຊຸດທີ IV ໃນວັນທີ 30 ທັນວາ 2025 ໃຫ້ຮູ້ວ່າ: ໃນປີ 2025 ມີຄະດີເຂົ້າມາສານທັງໝົດ 169 ເລື່ອງ, ແກ້ໄຂແລ້ວ 146 ເລື່ອງ ເທົ່າກັບ 86.39%, ຍັງຄ້າງພວມດໍາເນີນ 23 ເລື່ອງ ເທົ່າກັບ 13.61%. ໃນນີ້, ສານປະຊາຊົນແຂວງມີຄະດີຄ້າງມາແຕ່ປີ 2024 ຈໍານວນ 20 ເລື່ອງ ແລະເຂົ້າໃໝ່ໃນປີ 2025 ຈໍານວນ 92 ເລື່ອງ ລວມທັງໝົດ 112 ເລື່ອງ, ແກ້ໄຂແລ້ວ 100 ເລື່ອງ, ຍັງຄ້າງ 12 ເລື່ອງ.ສານປະຊາຊົນເຂດ I ມີຄະດີຄ້າງມາແຕ່ປີ 2024 ຈໍານວນ 18 ເລື່ອງ ແລະ ເຂົ້າໃໝ່ປີ 2025 ຈໍານວນ 18 ເລື່ອງ ລວມທັງໝົດ 46 ເລື່ອງ, ແກ້ໄຂແລ້ວ 39 ເລື່ອງ, ຍັງຄ້າງ 7 ເລື່ອງ ແລະສານປະຊາຊົນເຂດ II ມີຄະດີເຂົ້າໃໝ່ປີ 2025 ຈໍານວນ 11 ເລື່ອງ, ແກ້ໄຂແລ້ວ 7 ເລື່ອງ, ຍັງຄ້າງ 4 ເລື່ອງ.

ທ່ານ ນາງ ສີວິໄລ ຜາວິໄລ ໃຫ້ຮູ້ຕື່ມວ່າ: ເພື່ອເຮັດໃຫ້ການແກ້ໄຂຄະດີມີປະສິດທິພາບ-ປະສິດທິຜົນ. ໃນປີ 2026 ນີ້, ຕ້ອງເພີ່ມທະວີນນໍາພາຂອງຄະນະພັກຕໍ່ການປະຕິບັດພາລະບົດບາດ, ສິດ ແລະໜ້າທີ່ໃນການປົກປ້ອງກົດໝາຍ ແລະຄວາມຍຸຕິທໍາໃນສັງຄົມ; ສ້າງກົນໄກວຽກງານບໍລິຫານສານ-ບໍລິຫານຄະດີໃຫ້ມີຄຸນນະພາບ; ກໍ່ສ້າງຜູ້ພິພາກສາ-ພະນັກງານ ຂອງສານໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຈັນຍາບັນ-ຈັນຍາທໍາ, ເປັນແບບຢ່າງນໍາໜ້າໃນການເຄົາລົບ ແລະປະຕິບັດລະບຽບກົດໝາຍ; ສູ້ຊົນປະຕິບັດຕົວເລກຄາດໝາຍໃນການແກ້ໄຂຄະດີ ບັນລຸຕາມແຜນການທີ່ວາງອອກໃນແຕ່ລະໄລຍະ ຄື: ແກ້ໄຂຄະດີອາຍາໃຫ້ໄດ້ 90%, ຄະດີແພ່ງ, ຄະດີການຄ້າໃຫ້ໄດ້ 75% ຂຶ້ນໄປ, ຄະດີຄອບຄົວ, ຄະດີແຮງງານ, ຄະດີເດັກໃຫ້ໄດ້ 85% ຂຶ້ນໄປ ແລະອັດຕາການຂໍອຸທອນບໍ່ໃຫ້ເກີນ 15% ຂອງຈໍານວນຄະດີທັງໝົດ.

(ຂ່າວ: ສັນຍາ)