ທ່ານ ຄໍາໃບ ດໍາລັດ, ຮອງປະທານສະພາແຫ່ງຊາດ ແຫ່ງ ສປປ ລາວ ພົບປະກັບ ທ່ານ ຮາຄອບ ອາຊາກຢານ (Ha kob Arshakyan) ຮອງປະທານສະພາແຫ່ງຊາດ ແຫ່ງ ສາທາລະນະລັດ ອາເມນີໃນວັນທີ 19 ຕຸລານີ້ ທີ່ນະຄອນຫຼວງວຽງຈັນ.
ໃນໂອກາດດັ່ງກ່າວທ່ານ ຄໍາໃບ ດໍາລັດໄດ້ ຕີລາຄາສູງ ຕໍ່ການເດີນທາງເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 (AIPA-45) ຂອງ ທ່ານ ແລະ ຄະນະ ຊຶ່ງເປັນການໃຫ້ກໍາລັງໃຈ ແລະ ສະໜັບສະໜູນການປະຕິບັດພັນທະສາກົນຂອງ ສະພາແຫ່ງຊາດລາວ ໃນການເປັນປະທານ ໄອປາ (AIPA) ກໍຄື ເປັນເຈົ້າພາບກອງປະຊຸມໄອປາ ຄັ້ງນີ້ ໃຫ້ສໍາເລັດຜົນຢ່າງຈົບງາມ ແລະ ທັງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ກໍຄືລະຫວ່າງ ສອງອົງການນິຕິບັນຍັດໃຫ້ນັບມື້ນັບຂະຫຍາຍຕົວ ແລະ ເປັນຮູບປະທໍາຍິ່ງໆຂຶ້ນ;
ທ່ານ ຄຳໃບ ດຳລັດໄດ້ເນັ້ນວ່າ: ການພົວພັນຮ່ວມມື ລະຫວ່າງ ສປປ ລາວ ແລະ ອາເມນີ ນັບແຕ່ໄດ້ສ້າງຕັ້ງສາຍພົວພັນການທູດ ນໍາກັນໃນວັນທີ 21 ເມສາ 1998 ເປັນຕົ້ນມາ, ໄດ້ຮັບການເສີມຂະຫຍາຍຢ່າງຕໍ່ເນື່ອງ ແລະ ພັດທະນາດີຂຶ້ນ, ເຖິງວ່າ ການແລກປ່ຽນຄະນະຜູ້ແທນຂັ້ນສູງ ແລະ ຂັ້ນຕ່າງໆ ຍັງບໍ່ທັນຫຼາຍ, ແຕ່ພວກເຮົາ ກໍຍັງພົບພໍ້ກັນ ໃນໂອກາດເຂົ້າຮ່ວມກອງປະຊຸມລັດຖະສະພາພາກພື້ນ ແລະ ສາກົນ ; ການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ລະຫວ່າງ 2 ປະເທດ ກໍຍັງບໍ່ທັນໄດ້ມີຫຍັງເທື່ອ ແລະ ຫວັງວ່າ ໃນອະນາຄົດ ຈະມີການພົວພັນຮ່ວມມືນໍາກັນຫຼາຍຂຶ້ນ.
ສະພາແຫ່ງຊາດລາວ ແລະ ສະພາແຫ່ງຊາດອາເມນີ ເຖິງວ່າຍັງບໍ່ມີການພົວພັນກັນຫຼາຍ ແຕ່ສອງຝ່າຍ ກໍໄດ້ມີໂອກາດພົບປະຊຶ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ, ມີການແລກປ່ຽນສານຊົມເຊີຍ, ສານອວຍພອນ ໃນໂອກາດວັນສຳຄັນຕ່າງໆ ຂອງ 2 ປະເທດ. ໃນໄລຍະຜ່ານມາ, ສອງອົງການນິຕິບັນຍັດ ຍັງບໍ່ທັນມີການແລກປ່ຽນຄະນະຜູ້ແທນນໍາກັນເທື່ອ.
ທ່ານ ຄຳໃບ ດຳລັດ ໄດ້ສະເໜີ ໃຫ້ສອງສະພາແຫ່ງຊາດ ຊຸກຍູ້ ໃຫ້ມີການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ, ຂັ້ນກຳມາທິການ ແລະ ຄະນະມິດຕະພາບລັດຖະສະພາຂອງສອງປະເທດ ໃຫ້ເປັນປົກກະຕິນໍາກັນ, ສະເໜີ ຊຸກຍູ້ ແລະ ສົ່ງເສີມໃຫ້ລັດຖະບານຂອງສອງປະເທດ ເອົາໃຈໃສ່ໃນການຈັດຕັ້ງປະຕິບັດການຕົກລົງເຫັນດີນໍາກັນໃຫ້ມີປະສິດທິຜົນດີຂຶ້ນກວ່າເກົ່າ, ສືບຕໍ່ຮ່ວມມື, ຊ່ວຍເຫຼືອ ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ.
(ຂ່າວ: ສຳນານ, ພາບ: ສຸກສະຫວັນ)
ดูข้อมูลเชิงลึกและโฆษณา
ความรู้สึกทั้งหมด
88แชร์ 2 ครั้ง
ถูกใจ
แสดงความคิดเห็น
แชร์
ຄໍາເຫັນ