 |
ໃນພິທີ, ສະຫາຍ ສິງຄໍາ ວົງພະຈັນ ກໍາມະການຄະນະບໍລິຫານງານພັກຮອງເລຂາທິການສະພາແຫ່ງຊາດໄດ້ຂຶ້ນຜ່ານມະຕິຂອງຄະນະເລຂາທິການສູນກາງພັກວ່າດ້ວຍການປະດັບຫຼຽນກາລະນຶກ 70 ປີ ວັນສ້າງຕັ້ງພັກປປ ລາວ ສະບັບເລກທີ 441/ຄລສພ, ລົງວັນທີ 14 ມີນາ 2025; ຜ່ານລາຍຊື່ສະມາຊິກພັກທີ່ໄດ້ຮັບຫຼຽນກາລະນຶກ 70 ປີ ພັກປປ ລາວ. ການປະດັບຫຼຽນກາລະນຶກໃນຄັ້ງນີ້, ມີທັງໝົດ 49 ສະຫາຍ. ໃນນັ້ນ, ມີສະມາຊິກພັກບໍານານ 27 ສະຫາຍ, ຍິງ 7 ສະຫາຍ ແລະ ສະມາຊິກພັກປະຈໍາການ 22 ສະຫາຍ, ຍິງ 4 ສະຫາຍ ຊຶ່ງບັນດາສະຫາຍທີ່ໄດ້ຮັບການປະດັບຫຼຽນຄັ້ງນີ້ ແມ່ນຜູ້ທີ່ມີຜົນງານ, ຄຸນງາມຄວາມດີ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕະຫຼອດໄລຍະຜ່ານມາ.
 |
ໂອກາດນີ້, ສະຫາຍ ໄຊສົມພອນ ພົມວິຫານ ໄດ້ໃຫ້ກຽດໂອ້ລົມເພື່ອເປັນທິດໃນການຈັດຕັ້ງປະຕິບັດວຽກງານໃນຕໍ່ໜ້າເປັນຕົ້ນແມ່ນ ຕາມລັດຖະທຳມະນູນມາດຕາ 53 ໄດ້ກຳນົດໃຫ້ສະພາແຫ່ງຊາດເປັນອົງການຕົວແທນແຫ່ງສິດ ແລະຜົນປະໂຫຍດຂອງປະຊາຊົນບັນດາເຜົ່າ, ເປັນອົງການສູງສຸດແຫ່ງອໍານາດລັດ. ສະນັ້ນ, ການພິຈາລະນາຮັບຮອງເອົາການສ້າງ ແລະ ປັບປຸງກົດໝາຍ, ການພິຈາລະນາຕົກລົງຮັບຮອງເອົາບັນຫາສໍາຄັນພື້ນຖານຂອງປະເທດຊາດ ຕ້ອງຮັບປະກັນການຜັນຂະຫຍາຍແນວທາງນະໂຍບາຍຂອງພັກ ໃຫ້ເປັນອັນລະອຽດເຂົ້າໃນກົດໝາຍ, ມະຕິຂອງສະພາແຫ່ງຊາດ ເພື່ອກຳນົດມາດຕະການ ເຮັດໃຫ້ແນວທາງນະໂຍບາຍຂອງພັກ ໄດ້ຮັບການຈັດຕັ້ງປະຕິບັດ, ທັງຮັບປະກັນການນໍາເອົາຜົນປະໂຫຍດມາສູ່ປະເທດຊາດ ກໍຄືປະຊາຊົນບັນດາເຜົ່າ.
 |
ພ້ອມກັນນີ້, ສະຫາຍ ໄຊສົມພອນ ພົມວິຫານ ກໍເນັ້ນໃຫ້ ຄະນະບໍລິຫານງານພັກສະພາແຫ່ງຊາດ ຕ້ອງໄດ້ເພີ່ມທະວີການຈັດຕັ້ງຜັນຂະຫຍາຍແນວທາງນະໂຍບາຍຂອງພັກໂດຍສະເພາະການຄົ້ນຄວ້າປັບປຸງກົງຈັກການຈັດຕັ້ງຂອງສະພາແຫ່ງຊາດ ຕາມມະຕິຂອງຄະນະບໍລິຫານງານສູນກາງພັກສະບັບເລກທີ 03/ຄບສພ,ລົງວັນທີ 12 ມີນາ 2025 ວ່າດ້ວຍການປັບປຸງກົງຈັກການຈັດຕັ້ງ ຊຶ່ງໄດ້ກຳນົດກົງຈັກການຈັດຕັ້ງຂອງ ສະພາແຫ່ງຊາດ ຊຸດທີ X ດ້ວຍການຫຼຸດຜ່ອນກົງຈັກການຈັດຕັ້ງຂອງສະພາແຫ່ງຊາດ ທີ່ມີໃນປັດຈຸບັນ ໃຫ້ຍັງເຫຼືອ 5 ກຳມາທິການ ແລະ ຫ້ອງວ່າການສະພາແຫ່ງຊາດ. ຕໍ່ກັບວຽກງານດັ່ງກ່າວ, ສະເໜີໃຫ້ຄະນະປັບປຸງກົງຈັກສຸມໃສ່ລົງເລິກຄົ້ນຄວ້າກ່ຽວກັບທີ່ຕັ້ງ, ພາລະບົດບາດ, ສິດ ແລະ ໜ້າທີ່;ໂຄງປະກອບກົງຈັກການຈັດຕັ້ງ ແລະ ບຸກຄະລາກອນ 4 ແຕ່ລະກຳມາທິການ ທີ່ເປັນເປົ້າໝາຍໂຮມເຂົ້າກັນ ເພື່ອຈັດວາງຄືນໃໝ່ ໃຫ້ມີຄວາມສອດຄ່ອງກັບວຽກງານໃນໄລຍະໃໝ່, ຮັບປະກັນໃຫ້ກົງຈັກການຈັດຕັ້ງມີຄວາມກະທັດຮັດ, ການປະຕິບັດໜ້າທີ່ວຽກງານໃຫ້ມີປະສິດທິຜົນ. ນອກນີ້, ກໍຍັງຊີ້ນໍາວຽກງານອື່ນໆທີ່ສຳຄັນ ຕື່ມອີກ.
 |
 |
(ຂ່າວ-ພາບ: ວັນເພັງ)
ຄໍາເຫັນ