ສະພາການຄ້າ ຄໍາມ່ວນ ພົບປະແລກປ່ຽນ ກັບ ຫໍການຄ້ານະຄອນພະນົມ

ໂອກາດນີ້, ຄະນະຜູ້ແທນທັງສອງຝ່າຍໄດ້ປຶກສາຫາລືແລກປ່ຽນຫຼາຍບັນຫາສໍາຄັນເປັນຕົ້ນແມ່ນການກໍານົດທິດທາງແຜນການຮ່ວມມື ທາງດ້ານການຄ້າ-ການລົງທຶນ, ການຂົນສົ່ງ ແລະ ການທ່ອງທ່ຽວ ແລະ ກິດຈະກຳອື່ນໆ ທີ່ຕິດພັນກັບບົດບາດໜ້າທີ່ຄວາມຮັບຜິດຊອບຂອງຕົນ ເພື່ອແນໃສ່ສົ່ງເສີມການດຳເນີນທຸລະກິດ, ການຄ້າ, ອຸດສາຫະກໍາ, ຫັດຖະກໍາ, ກະສິກໍາ, ການເງິນ ແລະ ການບໍລິການຂອງສອງປະເທດ, ເວົ້າສະເພາະແຂວງຄໍາມ່ວນ ແລະ ຈັງຫວັດນະຄອນພະນົມ, ພ້ອມນີ້ ຍັງຈະໄດ້ທົບທວນຄືນບາງວຽກງານທີ່ໄດ້ເຫັນດີເປັນເອກະພາບກັນໃນກອງປະຊຸມ ພົບປະຫາລື ລະຫວ່າງ ສະພາການຄ້າ ແລະ ອຸດສາຫະກໍາແຂວງຄໍາມ່ວນ ກັບ ສະພາອຸດສາຫະກໍາ ແລະ ຫໍການຄ້າ ຈັງຫວັດນະຄອນພະນົມ ທີ່ຈັດຂຶ້ນໃນຄັ້ງວັນທີ 6 ມີນາ 2024 ຢູ່ແຂວງຄໍາມ່ວນຜ່ານມາ. ທັງນີ້ ກໍເພື່ອເປັນການຊຸກຍູ້ສົ່ງເສີມດ້ານການຄ້າ-ການລົງທຶນ ແລະ ສ້າງເງື່ອນໄຂອໍານວຍຄວາມສະດວກໃນການເຄື່ອນໄຫວດໍາເນີນທຸລະກິດຂອງສອງແຂວງ, ທັງເປັນການເພີ່ມທະວີການພົວພັນຮ່ວມມື ແລະ ສືບຕໍ່ເສີມຂະຫຍາຍຄວາມສຳພັນ ລະຫວ່າງສອງແຂວງ ກໍຄືສະພາການຄ້າ ແລະ ອຸດສາຫະກໍາ ແຂວງຄໍາມ່ວນ ແລະ ສະພາອຸດສາຫະກໍາ ຈັງຫວັດນະຄອນພະນົມ ໃຫ້ນັບມື້ນັບແໜ້ນແຟ້ນຍິ່ງຂຶ້ນ.

(ຂ່າວ: ມະນີວັນ)