ກອງປະຊຸມພົບປະແລກປ່ຽນບົດຮຽນ ລະຫວ່າງ ສະພາປະຊາຊົນແຂວງເຊກອງ ສປປ ລາວ ແລະ ສະພາປະຊາຊົນ ແຂວງຢາລາຍ ສສ ຫວຽດນາມ ຈັດຂຶ້ນໃນວັນທີ 17 ສິງຫາຜ່ານມາ ທີ່ ແຂວງເຊກອງ, ໂດຍມີ ທ່ານ ຕຸລາວັນ ວົງໄຊ ຄະນະປະຈຳພັກແຂວງ ຮອງປະທານສະພາປະຊາຊົນແຂວງເຊກອງ, ທ່ານ ນາງ ຮວີ່ງ ຖຸຍ ເວີນ ກຳມະການພັກແຂວງ ຮອງປະທານສະພາປະຊາຊົນແຂວງຢາລາຍ ພ້ອມຄະນະທັງສອງຝ່າຍ ເຂົ້າຮ່ວມ.
ການພົບປະຄັ້ງນີ້ ແມ່ນເປັນເທື່ອທຳອິດ ເຊິ່ງສອງຝ່າຍ ໄດ້ລາຍງານໃຫ້ກັນຊາບ ສະພາບຈຸດພິເສດ, ທ່າແຮງອັນບົ່ມຊ້ອນຂອງແຂວງ, ລະບົບໂຄ່ງຮ່າງການຈັດຕັ້ງ ແລະ ສະພາບການເຄື່ອນໄຫວຈັດຕັ້ງປະຕິບັດຫນ້າທີ່ວຽກງານຂອງສະພາປະຊາຊົນແຂວງໃນໄລຍະຜ່ານມາ; ຈາກນັ້ນ, ກໍໄດ້ພ້ອມແລກປ່ຽນບົດຮຽນ ກ່ຽວກັບການຍົກລະດັບທາງດ້ານພາສາ, ແລກປ່ຽນວິທີການຕິດຕາມກວດກາ ບັນດາໂຄງການລົງທຶນຂອງລັດ ແລະ ການແກ້ໄຂຄຳຮ້ອງທຸກຂອງປະຊາຊົນ, ການສ້າງກົນໄກຮ່ວມມື ເພື່ອແລກປ່ຽນຂໍ້ມູນຂ່າວສານ ໂດຍການຢ້ຽມຢາມ ຖອດຖອນບົດຮຽນ ລະຫວ່າງ ສະພາປະຊາຊົນແຂວງເຊກອງ ແລະ ສະພາປະຊາຊົນແຂວງຢາລາຍ.
ພ້ອມນັ້ນ, ສອງຝ່າຍ ໄດ້ຕີລາຄາສູງຕໍ່ການພົບປະໃນຄັ້ງນີ້ ແມ່ນເປັນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ກໍຄື ແຂວງເຊກອງ ກັບ ແຂວງຢາລາຍ ໃຫ້ແໜ້ນແຟ້ນຍິ່ງຂຶ້ນ ໂດຍເປົ້າໝາຍ ແລະ ຈຸດປະສົງ ຂອງການພົບປະຄັ້ງນີ້, ທັງສອງຝ່າຍ ຈະພ້ອມກັນນໍາເອົາເນື້ອໃນ, ຜົນສໍາເລັດ ໄປນໍາສະເໜີຕໍ່ການນໍາແຂວງຂອງຕົນ ເພື່ອເປັນບ່ອນອີງໃຫ້ແກ່ການຮ່ວມມື, ປະສານງານ ແລະ ແລກປ່ຽນບົດຮຽນຮ່ວມກັນໃນຕໍ່ໜ້າ ແນໃສ່ຍົກສູງຄຸນນະພາບ ການເຄື່ອນໄຫວວຽກງານຂອງສະພາປະຊາຊົນສອງແຂວງ ໃຫ້ດີຂຶ້ນເລື້ອຍໆ.
ຂ່າວ: ອັດສະວິນ
ຄໍາເຫັນ